អន្តរជាតិ
នយោបាយអន្តរជាតិ
រុស្ស៊ីផ្តើមពង្រីកឥទ្ធិពលនៅអាស៊ីប៉ាស៊ីហ្វិកដោយចែចូវរបបសឹកថៃនិងវៀតណាម ![](https://image.thmeythmey.com/pictures/2015/04/07/putin-speech_2431558b.jpg)
×![]()
បន្ទាប់ពីចាកចេញពីប្រទេសវៀតណាម នាយករដ្ឋមន្ត្រីរុស្ស៊ី Dmitry Medvedev នឹងបន្តដំណើរទស្សនកិច្ចមកកាន់ប្រទេសថៃ។ ដំណើរទស្សនកិច្ចរបស់នាយករដ្ឋមន្ត្រីរុស្ស៊ីមកកាន់ប្រទេសថៃនេះ ជាដំណើរទស្សនកិច្ចជាន់ខ្ពស់ដំបូងបំផុតក្នុងរយៈពេល ២៥ឆ្នាំ ពោលគឺចាប់តាំងពីសហភាពសូវៀតដួលរលំ។ដំណើរទស្សនកិច្ចនេះបញ្ជាក់ថា រុស្ស៊ីប្រហែលជាកំពុងព្យាយាមពង្រីកតួនាទីខ្លួនក្នុងតំបន់អាស៊ីប៉ាស៊ីហ្វិក ហើយនិងចែចូវប្រទេសថៃ ស្របពេលដែលថៃនេះរងការថ្កោលទោសពីសហគមន៍អន្តរជាតិសហរដ្ឋអាមេរិកនិងសហភាពអឺរ៉ុបក្រោយរដ្ឋប្រហារឆ្នាំមុន។ គេរំពឹងថា ដំណើរទស្សនកិច្ចរបស់ប្រមុខរដ្ឋាភិបាលរុស្ស៊ីលើកនេះ នឹងត្រួសត្រាយផ្លូវអោយប្រទេសនេះពង្រឹងនិងពង្រីកឥទ្ធិពលព្រមទាំងសហប្រតិបត្តិការជាមួយប្រទេសសំខាន់ក្នុងតំបន់អាស៊ីប៉ាស៊ីហ្វិក ដូចជាវៀតណាមនិងថៃជាដើម។
សូមស្តាប់ការបកស្រាយរបស់លោក សៅ ផលនិស្ស័យ ៖
ចាប់តាំងពីសហភាពសូវៀតរលំរលាយទៅ រុស្ស៊ីមិនសូវមានឈ្មោះបោះសម្លេង និងមានឥទ្ធិពលខ្លាំងប៉ុន្មានទេនៅក្នុងពិភពលោក។ ចំណែកចំណងទំនាក់ទំនងរវាងរុស្ស៊ីជាមួយបណ្តាប្រទេសដែលជាសម្ព័ន្ធមិត្តនៅអាស៊ីប៉ាស៊ីហ្វិកក៏ហាក់ដូចជាមិនមានការវិវឌ្ឍន៍គួរអោយកត់សម្គាល់ប៉ុន្មានឡើយក្នុងរយៈពេលប៉ុន្មានទសវត្សចុងក្រោយនេះ។ យ៉ាងណាក៏ដោយ បច្ចុប្បន្ននេះរដ្ឋាភិបាលរុស្ស៊ីក្រោមការដឹកនាំរបស់លោក វ្ល៉ាឌីមៀ ពូទីន កំពុងប្រឹងប្រែងពង្រឹងនិងពង្រីកតួនាទីរបស់ខ្លួនឡើងវិញនៅក្នុងតំបន់អាស៊ីប៉ាហ្វិកក្នុងនាមជាមហាអំណាចពិភពលោកមួយ។ បច្ចុប្បន្នតំបន់អាស៊ីប៉ាស៊ីហ្វិកបានក្លាយជាតំបន់ប្រកួតប្រជែងគ្នារវាងមហាអំណាចពិភពលោក រួមមានសហរដ្ឋអាមេរិក រុស្ស៊ី និងចិនផង។
កាលពីថ្ងៃ អាទិត្យកន្លងទៅ ប្រមុខរដ្ឋាភិបាលក្រុងម៉ូស្គូលោក Dmitry Medvedev បានធ្វើទស្សនកិច្ចជាផ្លូវការរយៈពេលពីរថ្ងៃនៅក្នុងប្រទេសវៀតណាមដែលជាមិត្តចាស់របស់ខ្លួន។ នាយករដ្ឋមន្ត្រីរុស្ស៊ីខាងលើទៅទស្សនកិច្ចនៅវៀតណាមដោយមានបំណងចង់ជជែកពិភាក្សាជាមួយសមភាគីវៀតណាម ដើម្បីត្រួសត្រាយផ្លូវដល់ប្រទេសទាំងពីរក្នុងការពង្រីកចំណងសេដ្ឋកិច្ចទ្វេភាគី។ ក្នុងដំណើរទស្សនកិច្ចនេះលោក Medvedev បានជួបពិភាក្សាជាមួយមេដឹកនាំវៀតណាមមានទាំងនាយករដ្ឋមន្ត្រី ង្វៀន តាន់ឌុង និងបណ្តាមេដឹកនាំបក្សកម្មុយនីស្តផងដែរ។ ក្រោយបញ្ចប់ទស្សនកិច្ចនៅវៀតណាម នាយករដ្ឋមន្ត្រីរុស្ស៊ីបន្តដំណើរទៅជួបប្រមុខរបបសឹកក្រុងបាងកកដើម្បីពិភាក្សាពីការបង្កើនកិច្ចសហប្រតិបត្តិការផ្នែកសេដ្ឋកិច្ច និងវិស័យយោធាផង។ ខណៈពេលដែលថៃស្ថិតក្រោមការរិះគន់របស់លោកខាងលិច រុស្ស៊ីមើលឃើញពីឱកាសល្អសម្រាប់ពង្រឹងចំណងការទូតជាមួយរាជាណាចក្រថៃ។
១. វៀតណាមត្រៀមបង្កើតតំបន់សេដ្ឋកិច្ចសេរីជាមួយសហភាពសេដ្ឋកិច្ចរុស្ស៊ីអឺរ៉ាស៊ី
ក្នុងដំណើរទស្សនកិច្ចក្នុងប្រទេសវៀតណាម លោកនាយករដ្ឋមន្ត្រីរុស្ស៊ី និងនាយករដ្ឋមន្ត្រីវៀតណាម ង្វៀនតាន់ឌុងបានជជែកពិភាក្សាគ្នាលើជំនុចសំខាន់ៗជាច្រើនពាក់ព័ន្ធការបង្កើតតំបន់ពាណិជ្ជកម្មសេរីភាពរវាងវៀតណាមនិងសហភាពសេដ្ឋកិច្ចអឺរ៉ាស៊ីផង។ ភាគីទាំងពីរបានអះអាងថាប្រទេសទាំងពីរបានសម្រេចឯកភាពគ្នាលើចំណុចសំខាន់ជាច្រើនជុំវិញបញ្ហានេះ ហើយគេរំពឹងថានៅពាក់កណ្តាលឆ្នាំនេះ វៀតណាមនឹងអាចចុះហត្ថលេខាលើឯកសារបង្កើតតំបន់ពាណិជ្ជកម្មសេរីជាមួយស្ថាប័នសេដ្ឋកិច្ចដឹកនាំដោយរុស្ស៊ីនេះបាន។ ការបង្កើតអោយមានតំបន់ពាណិជ្ជកម្មសេរីនេះនឹងជំរុញអោយវៀតណាមនិងរុស្ស៊ីពង្រីកចំណងពាណិជ្ជកម្មទ្វេភាគីបានយ៉ាងងាយ ហើយវានឹងជួយអោយវៀតណាម-រុស្ស៊ីបង្កើនទំហំពាណិជ្ជកម្មដល់ ១០ពាន់លានដុល្លារអាមេរិកក្នុងឆ្នាំ ២០២០តាមការគ្រោងទុកផងដែរ។
២.រុស្ស៊ីត្រៀមសាងសង់រោងចក្រនុយក្លេអ៊ែរអោយវៀតណាម
ដោយឡែកក្រៅពីជជែកពិភាក្សាលើគម្រោងបង្កើតតំបន់ពាណិជ្ជកម្មសេរី មេដឹកនាំរុស្ស៊ីនិងវៀតណាមក៏បានពិភាក្សាពីគម្រោងវិនិយោគទ្វេភាគីសំខាន់ៗផ្សេងទៀត ពាក់ព័ន្ធវិស័យថាមពល វិស័យយោធា និង វិស័យឧស្សាហកម្មជាដើម។ វៀតណាមបានចុះកិច្ចព្រមព្រៀងជាច្រើនជាមួយសហព័ន្ធរុស្ស៊ី ហើយវៀតណាមចង់អោយរុស្ស៊ីសាងសង់រោងចក្រនុយក្លេអ៊ែរសម្រាប់ខ្លួនផងដែរ។ លោក Medvedev សង្ឃឹមថារុស្ស៊ីនឹងអាចចាប់ផ្តើមសាងសង់រោងចក្រថាមពលនុយក្លេអ៊ែរនៅវៀតណាមឆាប់ៗបំផុតនាពេលខាងមុខនេះ ហើយទន្ទឹមនឹងនោះ មជ្ឈមណ្ឌលវិទ្យាសាស្ត្រនុយក្លេអ៊ែរ និងបច្ចេកវិទ្យាក៏នឹងត្រូវសាងសង់ឡើងព្រមជាមួយគ្នាដែរ។
៣.រុស្ស៊ីព្យាយាមចែរចូវរបបសឹកក្រុងបាងកក
ក្រោយបញ្ចប់ការទស្សនកិច្ចដែលពោរពេញដោយផ្លែផ្កានៅវៀតណាម ប្រមុខរដ្ឋាភិបាលវៀតណាមមិនបានបង្អង់យូរដោយបន្តដំណើរទៅជួបប្រមុខរបបសឹកក្រុងបាងកក ប្រាយុទ្ធ ចាន់អូចានៅថ្ងៃអង្គារនេះ។ នេះជាលើកដំបូងបំផុតក្នុងរយៈពេល ២៥ឆ្នាំហើយដែលមានវត្តមានមន្ត្រីកំពូលរុស្ស៊ីទៅទស្សនកិច្ចនៅថៃ។ នាយករដ្ឋមន្ត្រី Medvedev រំពឹងថានឹងលើកយកបញ្ហាចំណងសេដ្ឋកិច្ចទ្វេរភាគី និងសហប្រតិបត្តិការផ្នែកយោធាមកពិភាក្សាជាមួយឧត្តមសេនីយ៍ ប្រាយុទ្ធ។ មន្ត្រីរដ្ឋាភិបាលក្រុងបាងកកបានបង្ហើបថា កិច្ចព្រមព្រៀងរវាងរដ្ឋាភិបាលចំនួន ៥ និងកិច្ចព្រមព្រៀងរវាងវិស័យឯកជន ៥ផ្សេងទៀតនឹងត្រូវគេចុះហត្ថលេខាក្នុងដំណើរទស្សនកិច្ចនេះ។ ថៃបានកោតសរសើររុស្ស៊ីដែលមិនផ្លាស់ប្តូរគោលជំហររបស់ខ្លួនក្នុងការសហប្រតិបត្តិការជាមួយរដ្ឋាភិបាលថៃ ទោះជាមានការផ្លាស់ប្តូររបបដឹកនាំ និងនយោបាយនៅក្នុងប្រទេសថៃក្តី។ រុស្ស៊ីកំពុងព្យាយាមពង្រឹងចំណងការទូតនិងកិច្ចសហប្រតិបត្តិការសេដ្ឋកិច្ចជាមួយថៃ ស្របពេលដែលទំនាក់ទំនងថៃ និងលោកខាងលិចធ្លាក់ចុះក្រោយរដ្ឋប្រហារថ្ងៃ ២២ឧសភាឆ្នាំមុន។ លោកខាងលិចនៅព្យាយាមដាក់សម្ពាធអោយរបបសឹកថៃផ្ទេរអំណាចទៅអោយរបបស៊ីវិលវិញតាមរយៈការបោះឆ្នោតតាមបែបប្រជាធិបតេយ្យអោយឆាប់រហ័ស។
ទំហំពាណិជ្ជកម្មទ្វេភាគីនៃប្រទេសទាំងពីរកើនឡើងដល់ ១៥០ពាន់លានដុល្លារអាមេរិកកាលពីឆ្នាំមុន ហើយទស្សនកិច្ចលើកនេះនឹងជំរុញអោយទំហំពាណិជ្ជកម្មកើនឡើងបន្ថែមទៀត។ រុស្ស៊ីនាំចេញប្រេង ឧស្ម័ន ដែកថែប ជាដើមទៅកាន់ប្រទេសថៃ ខណៈថៃនាំចេញអង្ករ ឡាន ចំណីអាហារ ទៅកាន់ប្រទេសរុស្ស៊ី។ បច្ចុប្បន្ននេះ រុស្ស៊ីស្វែងរកការនាំចេញសព្វាវុធបន្ថែមទៅកាន់ប្រទេសថៃ ស្របពេលដែលរដ្ឋាភិបាលក្រុងបាងកកចាប់អារម្មណ៍ចំពោះបច្ចេកវិទ្យាកម្មវិធីនុយក្លេអ៊ែរស៊ីវិលរបស់រុស្ស៊ី ផងដែរ។
© រក្សាសិទ្ធិដោយ thmeythmey.com