អន្តរជាតិ
នយោបាយអន្តរជាតិ
កូរ៉េខាងត្បូងចោទជប៉ុនថាចង់ឲ្យប្រវត្តិសាស្ត្រជូរចត់កើតឡើងម្តងទៀត
×
រដ្ឋាភិបាលទីក្រុងសេអ៊ូលថ្កោលទោសជប៉ុនពាក់ពន្ធ័នឹងការអនុញ្ញាតឲ្យបោះពុម្ពផ្សាយនិងដាក់បញ្ចូលសៀវភៅដែលទាក់ទងភូមិសាស្ត្រដែលបានបកស្រាយផ្ទុយប្រវត្តិសាស្ត្រស្តីពីការទាមទារតំបន់ជម្លោះកោះ។បន្ថែមពីនេះកូរ៉េខាងត្បូងបានព្រមានអគ្គរាជទូតជប៉ុនថាសកម្មភាពនេះគឺជាការរៀបចំរបស់ជប៉ុនដែលមានបំណងចង់ឲ្យអាណានិគមវិលត្រលប់មកវិញ។
ម្សិលមិញនេះរដ្ឋាភិបាលកូរ៉េខាងត្បូងបានប្រតិកម្មយ៉ាងខ្លាំងទៅនឹងការអនុម័យល់ព្រមដាក់បញ្ចូលសៀវភៅទាក់ទងនឹងប្រវត្តិសាស្ត្រនិងភូមិសាស្ត្រលើតំបន់វិវាទរវាងប្រទេសទាំងពីរនៅក្នុងកម្មវិធីអប់រំដែលបានធ្វើការបកស្រាយផ្ទុយពីព្រឹត្តិការណ៍ប្រវត្តិសាស្ត្រ។
នៅក្នុងសេចក្តីថ្លែងការណ៍របស់ក្រសួងដដែលក៏បានចោទប្រកាន់រដ្ឋាភិបាលជប៉ុនថាការដាក់បញ្ចូលសៀវភៅដែលទាក់ទងទៅនឹងតំបន់ភូមិសាស្ត្រវិវាទគឺជាការបណ្តុះគំនិតក្មេងជំនាន់ក្រោយដើម្បីបន្តការទាមទារនិងប្រឆាំងកូរ៉េខាងត្បូងលើការគ្រប់គ្រងតំបន់វិវាទបច្ចុប្បន្ន។ជាពិសេសរដ្ឋាភិបាលជប៉ុនកំពុងតែទាញអោយប្រវត្តិសាស្ត្រវិលត្រលប់មកវិញ។
យ៉ាងណាមិញរដ្ឋមន្ត្រីក្រសួងអប់រំលោកHakubun Shimomura បានបញ្ជាក់ថាសៀវភៅដែលបានដាក់បង្រៀននៅក្នងកម្មវិធីអប់រំគឺជាឯកសារយោងដ៏សំខាន់ដែលបង្ហាញពីតំបន់វិវាទគឺស្ថិតក្រោមអធិបតេយ្យរបស់ជប៉ុន។លោកបានបន្ថែមទៀតថានេះគឺកាត្វកិច្ចមួយដែលរដ្ឋាភិបាលត្រូវបង្រៀនដល់ក្មេងជំនាន់ក្រោយឲ្យបានដឹងអំពីអធិបតេយ្យរបស់ខ្លួន។
គួររម្លឹកផងដែរជប៉ុនធ្លាប់បានកាន់កាប់ឧបទ្វីបកូរ៉េចាប់ពីឆ្នាំ១៩១០រហូតដល់ជប៉ុនចាញ់សង្គ្រាមលោកលើកទី២ឆ្នាំ១៩៤។អ្វីដែលគួរកត់សសម្គាល់នោះអំឡុងពេលនៃការគ្រប់គ្រងដោយជប៉ុនគឺជាប្រវត្តិសាស្ត្រដ៏ឈឺចាប់មួយរបស់ប្រជាជាតិកូរ៉េដែលត្រូវបានទាហានជប៉ុនធ្វើទុក្ខបុកម្នេញចាប់បង្ខំឲ្យធ្វើការនិងស្ត្រីត្រូវបានបង្ខំអោយបម្រើជាទាសករផ្លូវភេទទៀតផង។
យ៉ាងណាក៏ដោយក្រោយបញ្ចប់អាណានិគមប្រទេសទាំងពីរនៅបន្តមានវិវាទជាមួយគ្នាទៅលើការគ្រប់គ្រងតំបន់ពីររួមមានកោះ Dokdo បច្ចុប្បន្ននៅក្នុងអធិបតេយ្យរបស់កូរ៉េខាងត្បូងនិងកោះ Takeshima បច្ចុប្បន្នស្ថិតក្រោមការគ្រប់គ្រងរបស់ជប៉ុន។ដោយឡែកក្រៅពីវិវាទជាមួយនឹងកូរ៉េខាងត្បូងជប៉ុនក៏មានបញ្ហាលើដែនកោះជាមួយចិនផងដែរជាពិសេសនោះលើវិវាទដែនកោះសេនកាគូ៕
© រក្សាសិទ្ធិដោយ thmeythmey.com