អន្តរជាតិ
នយោបាយអន្តរជាតិ
រដ្ឋបាលលោកអូបាម៉ាពិចារណាលុបឈ្មោះគុយបាពីបញ្ជីរដ្ឋឧបត្ថម្ភក្រុមភេរវជន ![](https://image.thmeythmey.com/pictures/2015/04/08/obama_cuba.jpg)
×![]()
ក្រសួងការបរទេសអាមេរិកបានប្រកាសថាខ្លួនកំពុងត្រៀមបញ្ជូនការស្នើលុបចោលឈ្មោះរដ្ឋអាមេរិកឡាទីនគុយបាចេញពីបញ្ជីរដ្ឋដែលឧបត្ថម្ភគាំទ្រក្រុមភេរវជនទៅកាន់ប្រធានាធិបតី។អាមេរិកពិចារណាធ្វើដូច្នេះដោយសារគុយបានិងអាមេរិកសម្រេចស្តារចំណងការទូតជាមួយគ្នាឡើងវិញកាលពីចុងឆ្នាំមុនហើយអាមេរិកប្រកាសត្រៀមបើកស្ថានទូតរបស់ខ្លួនឡើងវិញនៅក្រុងហាវ៉ាណាផង។
មានសំឡេង
ត្រឹមប៉ុន្មានថ្ងៃប៉ុណ្ណោះមុនពេលដែលប្រធានាធិបតីបារ៉ាក់អូបាម៉ាចូលរួមក្នុងសន្និសីទកំពូលរដ្ឋអាមេរិកដែលលោកនឹងជួបពិភាក្សាទល់មុខគ្នាជាមួយសមភាគីគុយបាប្រធានាធីបតីរ៉ាអ៊ូលកាស្ត្រូក្រសួងការបរទេសអាមេរិកបានប្រកាសថាខ្លួនកំពុងត្រៀមបញ្ជូនឯកសារស្នើសុំលុបឈ្មោះគុយបាចេញពីបញ្ជីរដ្ឋគាំទ្រភេរវកម្មទៅកាន់ប្រធានាធិបតី។ក្រសួងការបរទេសអាមេរិកកំពុងមរមាញឹកត្រួតពិនិត្យមើលបញ្ជីឈ្មោះរដ្ឋគាំទ្រចលនាភេរវកម្មហើយស្ថាប័ននេះនឹងរៀបចំសេចក្តីសម្រេចចុងក្រោយស្តីពីការដកគុយបាចេញពីបញ្ជីខ្មៅនេះជូនទៅប្រធានាធិបតីអូបាម៉ាចុងសប្តាហ៍នេះ។
គួររម្លឹកបន្តិចកាលពីខែធ្នូឆ្នាំ២០១៤ប្រធានាធិបតីអាមេរិកលោកបារ៉ាក់អូបាម៉ានិងលោកប្រធានាធិបតីគុយបារ៉ាអ៊ូលកាស្ត្រូបានព្រមព្រៀងគ្នាភ្ជាប់ចំណងការទូតជាមួយគ្នាឡើងវិញ។ព្រឹត្តិការណ៍ជាប្រវត្តិសាស្ត្រនេះបានធ្វើឲ្យពិភពលោកទាំងមូលភ្ជាក់ផ្អើលដ្បិតប្រទេសទាំងពីរបានក្លាយជាសត្រូវជាមួយគ្នាអស់ជាង៥ទសវត្សមកហើយនោះពោលចាប់តាំងពីមានវិបត្តិមីស៊ីលនៅគុយបាឆ្នាំ១៩៦១។
ក្រោយប្រកាសស្តារចំណងមិត្តភាពជាមួយសត្រូវហើយលោកអូបាម៉ាបានបញ្ជាឲ្យក្រសួងការបរទេសខ្លួនត្រួតពិនិត្យមើលលើការដកឈ្មោះបញ្ជីប្រទេសដែលគាំទ្រនិងឧបត្ថម្ភក្រុមភេរវជនព្រោះថាដោយសារបញ្ហានេះហើយអាមេរិកមិនអាចបង្កើនការស្តារចំណងការទូតជាមួយគុយបាបានរហ័សជាងបច្ចុប្បន្ននេះ។គុយបាត្រូវបានគេបញ្ចូលក្នុងបញ្ជីខ្មៅរដ្ឋផ្តល់ជំនួយដល់ភេរវជននេះកាលពីឆ្នាំ១៩៨២ជាមួយប្រទេសមួយចំនួនទៀតដូចជាអ៊ីរ៉ង់ស៊ូដង់និងស៊ីរីក្រោយពេលគុយបានផ្តល់ជំនួយដល់ក្រុមប្រឆាំងរដ្ឋាភិបាលដែលនិយមលទ្ធិម៉ាកនៅប្រទេសកូឡុំប៊ី។
ចំណែកកិច្ចប្រជុំកំពូលរដ្ឋអាមេរិកនោះចាប់ផ្តើមនៅថ្ងៃ១០ដល់ថ្ងៃ១១មេសា។ហើយនៅថ្ងៃពុធនេះលោកអូបាម៉ានឹងចាកចេញទៅចូលរួមក្នុងកិច្ចប្រជុំនៅប្រទេសចាម៉ៃហ្កាហើយបន្ទាប់មកលោកនឹងបន្តទៅចូលរួមកិច្ចប្រជុំបន្តនៅក្នុងប្រទេសប៉ាណាម៉ាផងដែរ។គេរំពឹងថាមេដឹកនាំនៃប្រទេសទាំងពីរនាក់នឹងមានពេលវេលាសម្រាប់ពិភាក្សាជាលក្ខណៈទ្វេភាគីដើម្បីជំរុញឲកិច្ចសហប្រតិបត្តិការរវាងគុយបានិងសហរដ្ឋអាមេរិកល្អប្រសើរនៅពេលអនាគត។ការដកឈ្មោះគុយបាចេញពីបញ្ជីខ្មៅអនុញ្ញាតឲ្យអាមេរិកដកទណ្ឌកម្មនិងការហ៊ុំព័ទ្ធសេដ្ឋកិច្ចប្រឆាំងគុយបាផង។
បច្ចុប្បន្ននេះប្រជាជនគុយបាទូទៅបង្ហាញក្តីរីករាយនិងមានក្តីសង្ឃឹមខ្ពស់ចំពោះការភ្ជាប់ចំណងការទូតរវាងប្រទេសទាំងពីរជាពិសេសការដកការហ៊ុំព័ទ្ធសេដ្ឋកិច្ចរបស់អាមេរិកប្រឆាំងប្រទេសគុយបាផងដែរ។ពួកគេរំពឹងថាជីវភាពរស់នៅប្រចាំថ្ងៃរបស់គេនឹងបានប្រសើរឡើងស្របពេលដែលរដ្ឋាភិបាលលោកអូបាម៉ាកំពុងបញ្ចុះបញ្ចូលឲសភាបញ្ចប់ទណ្ឌកម្មដែលដាក់ប្រឆាំងសេដ្ឋកិច្ចគុយបាអស់ជាច្រើនទសវត្សមកហើយនេះផងដរ៕
© រក្សាសិទ្ធិដោយ thmeythmey.com