អន្តរជាតិ
នយោបាយអន្តរជាតិ
អាមេរិកផ្តល់អាវុធទៅរដ្ឋអារ៉ាប់ ខណៈអ៊ីរ៉ង់-តួកគីត្រៀមបញ្ចប់វិបត្តិយេម៉ែន ![](https://image.thmeythmey.com/pictures/2015/04/08/842015153946yemen.jpg)
×![]()
អាមេរិកត្រៀមផ្គត់ផ្គង់សព្វាវុធដល់សម្ព័ន្ធប្រទេសដឹកនាំដោយអារ៉ាប៊ីសាអូឌីតដែលកំពុងទម្លាក់គ្រាប់ប្រឆាំងក្រុមឧទ្ទាមប្រឆាំងរដ្ឋាភិបាលយេម៉ែន។ ការប្រកាសផ្តល់ជំនួយសព្វាវុធដល់កងម្លាំងក្រុមរដ្ឋអារ៉ាប់នេះ ធ្វើឡើងស្របពេលដែលវិបត្តិនៅយេម៉ែនកាន់តែធ្ងន់ធ្ងរឡើង ហើយមនុស្សជាច្រើនរយនាក់ត្រូវបានគេរាយការណ៍ថាបានស្លាប់បាត់បង់ជីវិតដោយសារការប៉ះទង្គិចគ្នានេះ ខណៈប្រជាជនរាប់នាក់កំពុងរត់ភៀសខ្លួនគេចពីគ្រោះថ្នាក់និងបាត់បង់ផ្ទះសម្បែង។ គេមិនបានដឹងថា សហគមន៍អន្តរជាតិបានធ្វើអ្វីខ្លះសម្រាប់ទប់ស្កាត់គ្រោះមហន្តរាយមនុស្សជាតិនោះឡើយ ព្រោះគ្មានការដាក់សម្ពាធអោយភាគីពាក់ព័ន្ធដាក់អាវុធនិងចូលតុចរចាដោះស្រាយជម្លោះដោយសន្តិវិធីឡើយ។យ៉ាងណារដ្ឋាភិបាលតួកគី និងអ៊ីរ៉ង់ដែលជាអ្នកគាំទ្រក្រុមឧទ្ទាមយេម៉ែនដែលនោះបានឯកភាពថានឹងរកដំណោះស្រាយបញ្ចប់សង្គ្រាមនៅយេម៉ែន។
សូមស្តាប់ការបកស្រាយរបស់លោក សៅផលនិស្ស័យ៖
ប្រជាជនយេម៉ែនរាប់រយនាក់បានស្លាប់បាត់បង់ជីវិតក្នុងការប៉ះទង្គិចគ្នានិងការទម្លាក់គ្រាប់បែករបស់រដ្ឋអារ៉ាប់ដឹកនាំដោយអារ៉ាប៊ីសាអូឌីត ។ ក្រៅពីមនុស្សបន្តស្លាប់ ប្រជាជនស្លូតត្រង់យេម៉ែនប្រហែលជាង១ម៉ឺននាក់ផ្សេងទៀត បាត់បង់ជម្រក និងបន្តរត់ភៀសខ្លួនដើម្បីគេចចេញពីគ្រោះថ្នាក់។ ការកើនឡើងនៃអ្នកស្លាប់បាត់បង់ជីវិត កង្វះខាតថ្នាំសង្កូវ ស្បៀងអាហារ ហើយការប្រយុទ្ធគ្នានៅបន្ត កំពុងបញ្ជាក់ថា វិបត្តិមនុស្សជាតិកំពុងកើតឡើងនៅក្នុងប្រទេសយេម៉ែន។ ប្រជាជនយេម៉ែនកំពុងស្រែកដង្ហើយរកការបញ្ចប់ការប្រយុទ្ធ និងរកអ្នកជួយស្រោចស្រង់ប្រទេសរបស់ខ្លួន មិនមែនស្វែងរកអ្នកទម្លាក់គ្រាប់បែកឡើយ។ ប៉ុន្តែទោះប្រជាជនទាំងស្រែករកជំនួយយ៉ាងណាក្តី គ្មានអ្នកណាម្នាក់យកចិត្តទុកដាក់ឡើយ មហាអំណាចតំបន់នៅបន្តលូកដៃដោយទម្លាក់គ្រាប់បែកឥតឈប់ សហគមន៍អន្តរជាតិបរាជ័យក្នុងការនាំជំនួយមនុស្សធម៌ទៅទ្រទ្រង់ជីវិតជនភៀសខ្លួននៅតំបន់គ្រោះថ្នាក់ដូចជាតំបន់ Aden។
អ្នកវិភាគមួយចំនួននាំគ្នារិះគន់សហគមន៍អន្តរជាតិជាពិសេសសហរដ្ឋអាមេរិក។ អ្វីដែលគួរអោយខ្មាសអៀនសម្រាប់សហគមន៍អន្តរជាតិនិងសហរដ្ឋអាមេរិក គឺការមិនជំរុញឬដាក់សម្ពាធអោយភាគីជម្លោះបង្កើតបទឈប់បាញ់និងចរចាគ្នាឡើយ តែបែរជាប្រកាសផ្តល់អាវុធគាំទ្ររដ្ឋអារ៉ាប់ប្រឆាំងក្រុមឧទ្ទាម Houthisទៅវិញ។ សហរដ្ឋអាមេរិកការពារទង្វើរបស់ខ្លួន ដោយអះអាងថាខ្លួនជួយអារ៉ាប៊ីសាអូឌីតប្រឆាំងក្រុមឧទ្ទាម ដែលចង់កាន់កាប់អំណាចដោយប្រើកម្លាំងបាយ។
១.សហរដ្ឋអាមេរិកប្រកាសផ្គត់ផ្គង់សពា្វវុធដល់ក្រុមរដ្ឋអារ៉ាប់ដែលទម្លាក់គ្រាប់បែកនៅយេម៉ែន
សហរដ្ឋអាមេរិកគាំទ្រអារ៉ាប៊ីសាអូឌីតអោយទប់ស្កាត់ក្រុមឧទ្ទាមយេម៉ែនមិនអោយពង្រឹងកម្លាំងនិងដណ្តើមអំណាចដោយប្រើប្រាស់ចុងកាំភ្លើង។ ប៉ុន្តែការគាំទ្ររបស់អាមេរិកនេះកំពុងក្លាយជាក្តីបារម្ភមួយ។ ជាក់ស្តែងកាលពីម្សិលមិញអនុរដ្ឋមន្ត្រីការបរទេសអាមេរិកបានប្រកាសថា រដ្ឋាភិបាលក្រុងវ៉ាស៊ីនតោនត្រៀមលក្ខណៈដើម្បីផ្តល់របាយការណ៍ចារកម្ម និងពន្លឿនការផ្គត់ផ្គង់អាវុធយុទ្ធភ័ណ្ឌដល់បណ្តារដ្ឋអារ៉ាប់ដែលចូលរួមទម្លាក់គ្រាប់បែកប្រឆាំងក្រុម Houthisយេម៉ែន។ សហរដ្ឋអាមេរិកគាំទ្រមេដឹកនាំរដ្ឋាភិបាលដែលកំពុងភៀសខ្លួនលោក Hardiហើយរដ្ឋបាលលោកអូបាម៉ាក៏គាំទ្រការប្រើប្រាស់សង្គ្រាមផ្លូវអាកាសប្រឆាំងក្រុមឧទ្ទាមផងដែរ បើទោះជាមានការរិះគន់ពីសំណាក់បណ្តាប្រទេសមួយចំនួនក៏ដោយ។ យ៉ាងណាមិញការផ្តល់សព្វាវុធទៅអោយអារ៉ាប៊ីសាអូឌីត ដើម្បីកម្ចាត់ក្រុមឧទ្ទាមនេះ កំពុងបង្កើនក្តីបារម្ភ ព្រោះគេមិនដឹងថាអាវុធនោះយកមកប្រើដើម្បីកម្ចាត់ក្រុមឧទ្ទាមឬសម្លាប់ជនស៊ីវិលឡើយ។ របាយការណ៍ថ្មីបានបង្ហាញថា ការវាយប្រហារចុងក្រោយបានសម្លាប់ជនស៊ីវិលជាពិសេសក្មេងៗ ដោយសារទីតាំងនោះជាសាលារៀន ហើយភ្នាក់ងារកាកបាទក្រហមបានព្រមានរួចហើយពីការបន្តវាយប្រហារនេះ។
២.អ៊ីរ៉ង់បន្តថ្កោលទោសការទម្លាក់គ្រាប់បែករបស់អារ៉ាប៊ីសាអូឌីត
តាំងពីថ្ងៃដំបូងនៃការទម្លាក់គ្រាប់បែកនៅយេម៉ែនមកម្ល៉េះ អ៊ីរ៉ង់ដែលគាំទ្រក្រុមឧទ្ទាមប្រឆាំងរដ្ឋាភិបាល បានថ្កោលទោសរដ្ឋអារ៉ាប់ ដោយលើកឡើងថាការទម្លាក់គ្រាប់រំលោភអធិបតេយ្យយេម៉ែន។ ការប្រើប្រាស់កម្លាំងដោយទម្លាក់គ្រាប់របស់អារ៉ាប៊ីសាអូឌីត ត្រូវបានរៀបចំឡើងដោយមានការអំពាវនាវពីប្រធានាធីបតីធ្លាក់ពីតំណែង Hardiហើយរដ្ឋអារ៉ាប់ជឿខ្លួនកំពុងការពាររដ្ឋាភិបាលស្របច្បាប់ដែលទទួលស្គាល់និងបង្កើតឡើងដោយមានការជ្រោមជ្រែងពីសហគមន៍អន្តរជាតិ។ រដ្ឋមន្ត្រីការបរទេសអ៊ីរ៉ង់ Mohammad JavadZarifបានថ្កោលទោសកម្មភាពនេះ និងមេដឹកនាំកំពូលសាសនាAyatollah Ali Khamenei បានស្នើអោយមានការបញ្ចប់ការវាយប្រហារនៅយេម៉ែនបន្តទៀតដែរ។
៣. អ៊ីរ៉ង់ និងតួកគីឯកភាពគ្នារកដំណោះស្រាយនយោបាយបញ្ចប់សង្គ្រាមនៅយេម៉ែន
ដោយសារបញ្ហាយេម៉ែនកាន់តែធ្ងន់ធ្ងរ តួកគីនិងអ៊ីរ៉ង់បានប្រកាសឯកភាពគ្នាស្វែងរកដំណោះស្រាយនយោបាយដើម្បីបញ្ចប់សង្គ្រាមនៅយេម៉ែន។ ក្នុងសន្និសីទសារព័ត៌មានរួមម្សិលមិញប្រធានាធិបតីអ៊ីរ៉ង់ Hassan Rouhani បានបញ្ជាក់ថា រដ្ឋាភិបាលក្រុងតេអ៊ីរ៉ង់ និងរដ្ឋាភិបាលក្រុងអង់ការ៉ា ត្រៀមខ្លួនដើម្បីជួយរកដំណោះស្រាយបញ្ចប់សង្គ្រាមនៅយេម៉ែន។ សមភាគីទាំងពីរបញ្ជាក់ថា បទឈប់បាញ់គួរតែជំហានដំបូងបំផុត ដើម្បីបើកផ្លូវទៅរកការចរចា។ យ៉ាងណាមិញ ប្រធានាធិបតីតួកគី លោក RecepTayyipErdogan មិនបាននិយាយពីបញ្ហាយេម៉ែនច្រើនឡើយ ហើយតួកគីនេះក៏ជាអ្នកគាំទ្រការទម្លាក់គ្រាប់បែកនៅយេម៉ែនដែរ។ ក្រោយមានការឯកភាពគ្នាហើយ នៅថ្ងៃពុធនេះ គេលេចលឺថា រដ្ឋមន្ត្រីការបរទេសអ៊ីរ៉ង់ គ្រោងធ្វើដំណើរទៅកាន់សាធារណរដ្ឋឥស្លាមប៉ាគីស្ថាន ដើម្បីជជែកពីការបញ្ចប់ជម្លោះនៅយេម៉ែន។ គេដឹងច្បាស់ថារដ្ឋមន្ត្រីការបរទេសរដ្ឋឥស្លាមអ៊ីរ៉ង់នឹងបញ្ចុះបញ្ចូលក្រុងឥស្លាមបាតកុំអោយចូលដៃចូលជើងជាមួយអារ៉ាប៊ីសាអូឌីតក្នុងការប្រឆាំងក្រុមឧទ្ទាមនៅយេម៉ែន។ គម្រោងដំណើរទស្សនកិច្ចនេះកើតឡើងក្រោយពេលប្រមុខរដ្ឋាភិបាលប៉ាគីស្ថាន Nawaz Sharif អំពាវនាវអោយអ៊ីរ៉ង់ចូលរួមដោយផ្ទាល់ដើម្បីដោះស្រាយបញ្ហាសន្តិសុខនៅឧបទ្វីបអារ៉ាប់ផង៕
© រក្សាសិទ្ធិដោយ thmeythmey.com