អន្តរជាតិ
នយោបាយអន្តរជាតិ
មីយ៉ាន់ម៉ាគាំទ្រគំនិត«ខ្សែក្រវាត់សេដ្ឋកិច្ចវិថីសូត្រ»របស់ចិនពេញទំហឹង
×
គម្រោង «ខ្សែក្រវាត់មួយវិថីមួយ»ជាគំនិតផ្តួចផ្តើមរបស់ក្រុងប៉េកាំងដែលគំនិតនេះបានទទួលការស្វាគមន៍ពីបណ្តាប្រទេសនៅតំបន់អាស៊ី។អនុប្រធានបក្សកាន់អំណាចមីយ៉ាន់ម៉ាបានប្រកាសគាំទ្រគំនិតផ្តួចផ្តើមរបស់ចិនយ៉ាងពេញទំហឹងដោយរំពឹងថាគម្រោងនេះនឹងជួយជំរុញការផ្សាភ្ជាប់រវាងប្រទេសនៅអាស៊ីនិងជំរុញការវិនិយោគនិងពាណិជ្ជកម្មជាពិសេសរវាងចិននិងមីយ៉ាន់ម៉ា។
លោក មុំ ពិទូរ្យ លម្អិតព័ត៌មាននេះ
គណបក្សកាន់អំណាចមីយ៉ាន់ម៉ាបានថ្លែកោតសរសើរនិងគាំទ្រពេញទំហឹងចំពោះគម្រោងមួយរបស់ចិនដែលមានឈ្មោះថា«ខ្សែក្រវាត់មួយវិថីមួយ»។ក្នុងបទសម្ភាសន៍ជាមួយភ្នាក់ងារព័ត៌មានចិនស៊ីនហ៊ួរអនុប្រធានបក្សកាន់អំណាចមីយ៉ាន់ម៉ាលោកHtayOoបានប្រកាសថាគណបក្សរបស់លោកនិងប្រជាជនមីយ៉ាន់ម៉ាគាំទ្រគំនិតផ្តួចផ្តើមរបស់រដ្ឋាភិបាលចិនលោកស៊ីជីនពីងចំពោះការបង្កើតខ្សែក្រវាត់សេដ្ឋកិច្ចវិថីសូត្រនិងមួយទៀតវិថីសូត្រសមុទ្រសម្រាប់សតវត្សទី២។
លោកជឿជាក់យ៉ាងមុតមាំថាគំនិតផ្តួចផ្តើមនេះនឹងជួយត្រួសត្រាយផ្លូវសម្រាប់ការវិនិយោគនិងជំនួញសេដ្ឋកិច្ចជាពិសេសនាំមកនូវអត្ថប្រយោជន៍យ៉ាងច្រើនដល់មីយ៉ាន់ម៉ានិងចិនក៏ដូចជាតំបន់អាស៊ីទាំងមូលផងដែរ។មិនត្រឹមតែលើកឡើងពីអត្ថប្រយោជន៍ផ្នែកសេដ្ឋកិច្ចដែលនាំមកដោយគំនិតផ្តួចផ្តើមរបស់ក្រុងប៉េកាំងនោះទេអនុប្រធានបក្សកាន់អំណាចមីយ៉ាន់ម៉ាខាងលើក៏ចាត់ទុកវាជាកម្លាំងចលករជំរុញការកសាងទំនុកចិត្តគ្នាលើផ្នែកនយោបាយរវាងរដ្ឋនៅតំបន់អាស៊ីទាំងមូលដ្បិតការផ្សាភ្ជាប់នេះជារឿងមិនអាចខ្វះបានឡើយ។
គួរបញ្ជាក់បន្តិចថាតាំងពីមីយ៉ាន់ម៉ាទទួលបានឯករាជ្យក្នុងឆ្នាំ១៩៤៨ប្រទេសទាំងពីរចិននិងមីយ៉ាន់ម៉ាបានបង្កើតចំនងមិត្តភាពយ៉ាងរឹងមាំជាមួយគ្នាដោយប្រទេសជិតខាងទាំងពីរផ្អែកតាមគោលការណ៍សន្តិសហវិជ្ជមានដែលមានប្រាំចំណុច។តាមពិតទៅមីយ៉ាន់ម៉ានិងចិនមានចំណងទំនាក់ទំនងទ្វេភាគីស្អិតល្មួតតាំងពីរពេលដែលមានរដ្ឋប្រហារឆ្នាំ១៩៦២និងពេលដែលមីយ៉ាន់ម៉ាស្ថិតក្រោមការដឹកនាំនៃរបបយោធា។
ក្របខណ្ឌយុទ្ធសាស្ត្របីកម្រិតដែលត្រូវប្រទេសទាំងពីរអនុវត្តកន្លងមក។កម្រិតទីមួយគឺបង្កើនការសហកានិងរៀនសូត្រពីគ្នាទៅវិញទៅមកររវាងប្រជាជនមីយ៉ាន់ម៉ានិងប្រជាជនចិនព្រោះប្រជាជនជាតួអង្គសំខាន់ក្នុងការជំរុញកិច្ចសហប្រតិបត្តិការទ្វេភាគី។
ចំណុចពីរគឺការបង្កើតកិច្ចសហប្រតិបត្តិការរវាងបក្សកម្មុយនីស្តចិននិងបក្សសហភាពសាមគ្គីនិងអភិវឌ្ឍន៍មីយ៉ាន់ម៉ា។និងទីបីគឺការសហប្រតិបត្តិការរវាងរដ្ឋាភិបាលចិននិងរដ្ឋាភិបាលមីយ៉ាន់ម៉ាតាមរយៈការផ្លាស់ប្តូរទស្សនកិច្ចរវាងមន្ត្រីជាន់ខ្ពស់នៃប្រទេសទាំងពីររាល់ឆ្នាំ។
ដោយឡែកមេដឹកនាំមីយ៉ាន់ម៉ាខាងលើក៏បានលើកឡើងផងដែរថាក្នុងនាមលោកជាមេដឹកនាំមីយ៉ាន់ម៉ាមួយរូបលោកមិនអាចព្រងើយកន្តើយចំពោះគំនិតផ្តួចផ្តើមថ្មីនេះបានឡើយហើយលោកបានស្នើឲ្យបណ្តាប្រទេសនៅតំបន់អាស៊ីផ្សេងទៀតចូលរួមសហការគ្នាគាំទ្រគំនិតនេះហើយចូលរួមអនុវត្តទាំងអស់គ្នាដើម្បីឲ្យគំនិតនេះចេញជារូបរាងឡើងពិតប្រាកដ។
គួរបញ្ជាក់ថាគំនិតផ្តួចផ្តើមរបស់ចិនដែលមានឈ្មោះថា« ខ្សែក្រវាត់មួយវិថីមួយ»ត្រូវបានបង្កើតឡើងក្នុងគោលដៅបង្ខិតប្រទេសនានាឲ្យកាន់តែជិតគ្នាតាមរយៈការផ្សារភ្ជាប់ទាំងបីផ្នែកនៅក្នុងតំបន់អាស៊ី។គម្រោងល្បីល្បាញនេះនឹងជួយបង្កើតក្របខណ្ឌនៃការផ្សារភ្ជាប់តាមច្រករបៀងសេដ្ឋកិច្ចនានានិងបង្កើនកិច្ចសហប្រតិបត្តិការសេដ្ឋកិច្ចតាមផ្លូវទឹកជាពិសេសតាមរយៈផ្លូវសមុទ្រតែម្តង៕
© រក្សាសិទ្ធិដោយ thmeythmey.com