អន្តរជាតិ
អាមេរិក៖ បុរសម្នាក់ជាប់គុកជិត៣០ឆ្នាំហើយតុលាការទើបតែរកឃើញថាគ្មានកំហុស ![](https://image.thmeythmey.com/pictures/2015/04/08/ray_hinton.jpg)
×![]()
បុរសម្នាក់រស់នៅរដ្ឋAlabama សហរដ្ឋអាមេរិកត្រូវបានគេដោះលែងឲ្យមានសេរីភាពវិញក្រោយពេលជាប់គុកអស់ជិត៣០ឆ្នាំបន្ទាប់ពីព្រះរាជអាជ្ញាតុលាការបានទទួលស្គាល់ថាគ្មានភស្តុតាងណាដែលអាចបញ្ជាក់ថាបុរសម្នាក់នោះប៉ុនប៉ងប្រព្រឹត្តបទឧក្រិដ្ឋកម្មនោះទេ។នេះពើយោងតាមកាសែតnew york post ។
កាសែតក៏បានរាយការណ៍ថាលោកRay Hintonអាយុ៥៨ឆ្នាំបានដើរចេញពីពន្ធនាគារJefferson ទីក្រុង Birmingham នឹងបានឱបសមាជិកក្រុមគ្រួសាររបស់គាត់ជាមួយនឹងការហូរទឹកភ្នែក។លោកHinton បានប្រាប់អ្នកយកព័ត៌មានថាលោកបានចំណាយពេលជិត៣០ឆ្នាំរស់នៅក្នុងគុកដោយភាពអយុត្តិធម៌។
លោកHinton ត្រូវបានផ្តន្ទាទោសពីបទសម្លាប់អ្នកគ្រប់គ្រងភោជនីយដ្ឋានអាហារfast-food ពីរនាក់កាលពីឆ្នាំ១៩៨៥នៅក្នុងទីក្រុងBirminghamហើយការចោទប្រកាន់នេះគឺផ្អែកលើគ្រាប់កាំភ្លើងនៅកន្លែងកើតហេតុតែមួយគត់ដែលអាចជាគ្រាប់កាំភ្លើងរបស់ម្ដាយលោកHinton ។
តុលាការកំពូលអាមេរិកបានសម្រេចនៅឯការជំនុំជម្រះជាលើកដំបូងមុនថាអំណះអំណាងរបស់មេធាវីការពារក្តីតំណាងលោកHinton គឺមិនគ្រប់គ្រាន់តាមរដ្ឋធម្មនុញ្ញនោះទេនេះគឺដោយសារតែលោកHinton គ្មានប្រាក់១០០០ដុល្លារដើម្បីជួលអ្នកជំនាញធ្វើតេស្ដបញ្ជាក់អំពីគ្រាប់កាំភ្លើងនោះបាន។
លោកមេធាវីBryan Stevensonដែលជានាយកអង្គការគំនិតផ្តួចផ្តើមយុត្តិធម៌ក្នុងរដ្ឋ Alabamaបានឱ្យដឹងថានៅពេលគាត់បានដឹងរឿងក្ដីនេះ គាត់បានជួលអ្នកជំនាញឯករាជ្យដើម្បីធ្វើតេស្ដគ្រាប់កាំភ្លើងនៅកន្លែងកើតហេតុឡើងវិញ ហើយលទ្ធផលបានបង្ហាញគ្រាប់កាំភ្លើងនោះមិនមែនជាគ្រាប់កាំភ្លើងដែលត្រូវគេបាញ់សម្លាប់មនុស្សពីរនាក់នោះទេ។
ក្រោយពេលទទួលបានលទ្ធផលនេះហើយ លោកBryan បានស្នើឲ្យតុលាការពិនិត្យឡើងវិញលើភស្តុតាងនោះ ប៉ុន្តែមន្ត្រីបានបដិសេធ។ រហូតមកដល់ពេលនេះ ទើបតុលាការបានបើកសវនការជាថ្មីម្ដងទៀត ហើយបានចាត់ឲ្យគេសាកល្បងគ្រាប់នេះជាថ្មីម្តងទៀត លទ្ធផលបានបង្ហាញថាគ្រាប់កាំភ្លើងនេះ មិនមែនជារបស់ម្តាយលោកHinton នោះទេ។ មេធាវីBryan បាននិយាយនៅក្រៅមន្ទីរឃុំឃាំងថា៖ «លោកHinton ត្រូវបានគេផ្តន្ទាទោសដោយសារតែគាត់ក្រីក្រ»៕
© រក្សាសិទ្ធិដោយ thmeythmey.com