អន្តរជាតិ
នយោបាយអន្តរជាតិ
លោកពូទីនត្រូវការរដ្ឋាភិបាលគីមជុងអ៊ុនដើម្បីសម្លុតអាមេរិក ![](https://image.thmeythmey.com/pictures/2015/04/09/942015103121putin.jpg)
×![]()
ទំនាក់ទំនងរុស្ស៊ី និងកូរ៉េខាងជើងកាន់តែជិតស្និទ្ធគ្នាខ្លាំងក្នុងរយៈពេលមួយឆ្នាំចុងក្រោយនេះ។ ក្រោយដួលរលំសហភាពសូវៀត ទំនាក់ទំនងប្រទេសទាំងពីរមិនសូវស្អិតល្មួតប៉ុន្មានទេ។ ទំនាក់ទំនងជិតស្និទ្ធនេះ កើតឡើងក៏ដោយសារភាគីទាំងសងខាងមើលឃើញពីប្រយោជន៍ និងចាំបាច់ត្រូវពឹគ្នាទៅវិញទៅមកដែរ។ រុស្ស៊ីត្រូវការសត្រូវអាមេរិកកូរ៉េខាងជើងដើម្បីសំលុត គំរាមអាមេរិក ដោយចង់ប្រើអាវុធនុយក្លេអ៊ែរ ដោយសារសំណុំរឿងអ៊ុយក្រែន។ ចំណែកកូរ៉េខាងជើងរត់រករុស្ស៊ីអោយជួយការពារខ្លួនក្នុងសំណុំរឿងរំលោភសិទ្ធិមនុស្សធ្ងន់ធ្ងរ ដែលអាមេរិកចង់អោយតុលាការព្រហ្មទណ្ឌអន្តរជាតិអូសមេដឹកនាំកំពូលកូរ៉េខាងជើងទៅកាត់ទោសថែមទៀត។ និយាយអោយខ្លីទៅ សម្ព័ន្ធមិត្តទាំងពីរបង្កើតឡើងក្នុងន័យជាមិត្តដើម្បីប្រយោជន៍ជាងមិត្តស្មោះត្រង់។
សូមស្តាប់ការបកស្រាយរបស់លោក សៅ ផលនិស្ស័យ
កូរ៉េខាងជើង និងរុស្ស៊ីជាមិត្តភក្តិជិតស្និទ្ធគ្នាតាំងពីយូរយារណាស់មកហើយ ។ ប៉ុន្តែទំនាក់ទំនងរវាងប្រទេសទាំងពីរមិនសូវជាជិតស្និទ្ធប៉ុន្មានទេក្រោយពេលដែលសហភាពសូវៀតរលំរលាយដើមទសវត្សឆ្នាំ៩០ ។ រុស្ស៊ីមិនសូវមានឥទ្ធិពលដូចសហភាពសូវៀតឡើយ ហើយម្យ៉ាងរុស្ស៊ីក៏មិនសូវបានជួយជ្រោមជ្រែងកូរ៉េខាងជើងប៉ុន្មានដែរចាប់តាំងពីពេលនោះមក ព្រោះកូរ៉េខាងជើងធ្លាក់ក្រោមឥទ្ធិពលផ្តាច់មុខរបស់ចិនវិញម្តង។
ម្យ៉ាងក្រោយដួលរលំសហភាពសូវៀត រុស្ស៊ីបានប្រកាសទទួលស្គាល់សាធារណរដ្ឋកូរ៉េ ឬកូរ៉េខាងត្បូង ដែលសកម្មភាពនេះបានធ្វើអោយរបបដឹកនាំក្រុងព្យុងយ៉ាងខឹងសម្បារជាខ្លាំង។ យ៉ាងណាមិញបរិបទនយោបាយពិភពលោកបានផ្លាស់ប្តូរ រុស្ស៊ីសម្លឹងឃើញកូរ៉េខាងជើងជាឧបករណ៍នយោបាយមួយសម្រាប់ដាក់គំនៀបសហគមន៍អន្តរជាតិ និងសហរដ្ឋអាមេរិក ចំណែកកូរ៉េខាងជើងឯណោះវិញ មើលឃើញពីអំណាចរបស់រុស្ស៊ីដែលអាចជួយទំនុកបម្រុង និងការពារបីបាច់ថែរក្សាខ្លួនអោយរួចផុតពីសំណាញ់ច្បាប់អន្តរជាតិបាន។
កូរ៉េខាងជើងក៏នៅចងចាំគុណបុណ្យរបស់សហភាពសូវៀត និងក្រុងប៉េកាំង ដែលជួយជ្រោមជ្រែង និងបន្សល់ទុករបបដឹកនាំកុម្មុយនីស្តផ្តាច់ការរហូតមកទល់បច្ចុប្បន្ន បើមិនមានអន្តរាគម៍ជារឿយរបស់សហភាពសូវៀត ម្ល៉េះរបបដឹកនាំត្រកូលគីម ម្ល៉េះសមរលំរលាយតាំងពីសម័យសង្គ្រាមកូរ៉េបាត់ទៅហើយ។
គេនៅចាំច្បាស់ថា កាលឆ្នាំ ១៩៥០ មេដឹកនាំសូវៀត ស្តាលីន នេះឯងជាអ្នកសម្រេចអនុញ្ញាតអោយជីតាគីមជុងអ៊ុន គឺលោក គីមអ៊ីលស៊ុង នាំទ័ពវាយដណ្តើមទឹកដីភាគខាងត្បូង ប៉ុន្តែកាលនោះសហភាពសូវៀតហាក់ស្ទាក់ស្ទើរមិនចង់លូកដៃជ្រៅក្នុងបញ្ហាកូរ៉េឡើយ។ នេះក៏ដោយសារខ្លាចមានការប្រឈមមុខដាក់គ្នាជាមួយសហរដ្ឋអាមេរិកកាលនោះ។
ស្លេះនិយាយរឿងគុណស្រ័យសិនទៅចុះ ដោយយើងត្រលប់ទៅមើលការរត់ទៅជិតគ្នាយ៉ាងស្អិតល្មួតរវាងរដ្ឋទាំងពីរវិញម្តង។ កាលពីឆ្នាំមុន រដ្ឋាភិបាលក្រុងម៉ូស្គូបានប្រកាសថា ខ្លួនសម្រេចអញ្ជីញមេដឹកនាំកំពូលកូរ៉េខាងជើង គីមជុងអ៊ុន មកទស្សនកិច្ចនៅរុស្ស៊ីក្នុងខែឧសភាឆ្នាំ ២០១៥ នៅពេលរុស្ស៊ីប្រារព្ធខួបជ័យជម្នះលើទ័ពណាស៊ីសម័យសង្គ្រាមលោកលើកទី។
កាលនោះគេមិនរំពឹងថា មេដឹកនាំកំពូលហ៊ានទទួលការអញ្ជើញរបស់លោក វ្ល៉ាឌីមៀ ពូទីនឡើយ ព្រោះសូម្បីតែទឹកចិនជាមហាមិត្តនោះក៏មេដឹកនាំកូរ៉េខាងជើងម្នាក់នេះមិនហ៊ានទាំងឈានជើងចូលដែរ។ ប៉ុន្តែ ក្រោយទទួលបានការអញ្ជើញ លោក គីមជុងអ៊ុនស្រាប់តែប្រកាសទទួលថា លោកនឹងទៅទស្សនកិច្ចនៅប្រទេសរុស្ស៊ីតបតាមការអញ្ជើញរបស់លោកពូទីន។ គ្មានអ្វីចម្លែក ដែល គីមជុងអ៊ុនហ៊ានទទួលសំណើរនេះ ព្រោះកាលឆ្នាំមុនប្រមុខរដ្ឋស្តីទីកូរ៉េខាងជើង Kim Jong nam បានចូលរួមក្នុងកម្មវិធីអូឡាំពិក Sochi ផងដែរ។
ហើយអ្វីដែលសំខាន់ គេឃើញមន្ត្រីជាន់ខ្ពស់កូរ៉េខាងជើងរត់ទៅជួបលោក ពូទីន ស្ងាត់ៗ ដែលកាលនោះកូរ៉េខាងជើងមានបំណងពឹងពាក់អោយរដ្ឋាភិបាលក្រេមឡាំងប្រើសិទ្ធិជំទាស់ក្នុងនាមជាសមាជិកអចិន្ត្រៃយ៍នៃក្រុមប្រឹក្សាសន្តិសុខដើម្បការពាររបបដឹកនាំក្រុងព្យុងយ៉ាងអោយផុតពីការកាត់ទោស។
របបដឹកនាំក្រុងព្យុងយ៉ាង រងការចោទប្រកាន់ថាបានប្រព្រឹត្តបទឧក្រិដ្ឋប្រឆាំងមនុស្សជាតិ ដោយធ្វើទុក្ខបុកម្នេញប្រជាជនខ្លួន។ បើសិនជាករណីនេះកើតមានមែន មេដឹកនាំកូរ៉េខាងជើងរួមទាំងលោក គីម ជុងអ៊ុនផង រួចមិនផុតពីការកាត់ទោសនៅតុលាការព្រហ្មទណ្ឌអន្តរជាតិឡើយ។ របបដឹកនាំក្រុងព្រុងយ៉ាងរំពឹងថា បើខ្លួនប្រឹងយកចិត្តរុស្ស៊ីនៅពេលនេះ ខ្លួនអាចមានខ្នងបង្អែកធំ ដូចក្រុងប៉េកាំងដែរ ដូច្នេះតុលាការដែលអាហ្វ្រិកហៅថាតុលាការចក្រពត្តិនោះ មិនអាចធ្វើអ្វីតាមចិត្តដែរ។
ចំណែករុស្ស៊ីបច្ចុប្បន្នក៏កំពុងត្រូវការមិត្តដែរ ដើម្បីទប់ទល់ជាមួយសហរដ្ឋអាមេរិក ក្នុងសំណុំរឿងអ៊ុយក្រែន។ ក្រៅពីជ្រោមជ្រែងអ៊ីរ៉ង់ របបដឹកនាំលោក ពូទីនក៏មិនមើលរំលងរបបក្រុងព្យុងយ៉ាងដែរ ដ្បិត កូរ៉េខាងជើងមាននុយក្លអ៊ែរ អាចក្រឡុកពិភពលោកបាន ជាពិសេសធ្វើអោយអាមេរិកឈឺក្បាល។ បើអាមេរិកហ៊ានដាក់គំនៀបលើរុស្ស៊ី ឬធ្វើអោយប៉ះពាល់ខ្លាំងដល់ប្រយោជន៍រុស្ស៊ី អាមេរិកក៏ត្រូវដេកព្រួយរឿងឧបទ្វីបកូរ៉េដូចគ្នា។
ជាឧទាហរណ៍ បច្ចប្បន្ននេះ រដ្ឋបាលលោក អូបាម៉ាកំពុងពិចារណាបញ្ជូនសព្វាវុធទៅអោយកងកម្លាំងអ៊ុយក្រែនដើម្បីប្រយុទ្ធជាមួយក្រុមឧទ្ទាម។ រុស្ស៊ីព្រមានរួចហើយពីលទ្ធផលនៃការបំពាក់អាវុធអោយទ័ពអ៊ុយក្រែន។ ដែលនេះមានន័យថា ចង់មិនចង់អាមេរិកត្រូវប្រុងប្រយ័ត្នជាងមុន និងមិនហ៊ានធ្វើអ្វីតាមតែអំពើរចិត្តខ្លួនឡើយ។
© រក្សាសិទ្ធិដោយ thmeythmey.com