អន្តរជាតិ
នយោបាយអន្តរជាតិ
×![]()
ក្នុងដំណើរទស្សនកិច្ច ទៅកាន់ប្រទេសរុស្ស៊ីនាយករដ្ឋមន្ត្រីក្រិកថ្មីបានប្រកាសប្រាប់ប្រធានាធិបតីរុស្ស៊ីថា លោកនឹងប្រឹងប្រែងក្នុងនាមជាសមាជិកសហភាពអឺរ៉ុបដើម្បីលើកកម្ពស់និងជំរុញការរឹតបន្តឹងទំនាក់ទំនងរវាងសមាជិកសហភាពអឺរ៉ុប។ មេដឹកនាំក្រិករូបនេះបានសង្កត់ធ្ងន់ថាបញ្ហាអឺរ៉ុបជាច្រើនមិនអាចដោះស្រាយចេញបើគ្មានការចូលរួមនិងសហការពីរុស្ស៊ី។
លោក ជាវ សំណាង លម្អិតព័ត៌មាននេះ
នាយករដ្ឋមន្ត្រីថ្មីរបស់ក្រិកលោក Alexis Tsiprasបានថ្លែងប្រាប់ទៅកាន់ប្រធានាធីបតីរុស្ស៊ីលោក វ្ល៉ាឌីមៀ ពូទីនថា លោកនឹងប្រឹងប្រែងប្រើប្រាស់តួនាទីក្រិកជាសមាជិកសហភាពអឺរ៉ុបដើម្បីលើកកម្ពស់ការសន្ទនារវាងសមាជិកសហភាពអឺរ៉ុប និងប្រទេសរុស្ស៊ី។ នាយករដ្ឋមន្ត្រីក្រិកថ្មីនេះ បានថ្លែងយ៉ាងដូច្នេះថាស្របពេលដែលលោកជួបពិភាក្សាជាលក្ខណៈទ្វេភាគីជាមួយប្រមុខរដ្ឋរុស្ស៊ីក្នុងដំណើរទស្សនកិច្ចទៅកាន់ប្រទេសរុស្ស៊ី។
បើតាមសម្តីរបស់នាយករដ្ឋមន្ត្រីក្រិក ចំណងទំនាក់ទំនងរវាងសមាជិកសហភាពអឺរ៉ុបនិងរុស្ស៊ី ចាំបាច់ត្រូវកែលម្អ និងលើកកម្ពស់ឲ្យកាន់តែល្អប្រសើរជាងនេះ។មេដឹកនាំក្រិកនេះត្រៀមលក្ខណៈដើម្បីប្រើប្រាស់រាល់ស្ថាប័នសំខាន់ៗរបស់សហភាពអឺរ៉ុបដែលខ្លួនជាសមាជិក ដើម្បីជួយសម្រួលដល់ការស្តារនិងរឹតបន្តឹងចំណងមិត្តភាពនិងកិច្ចភិក្សាគ្នាជាមួយរដ្ឋាភិបាលក្រេមឡាំងផងដែរ។
ក្នុងសន្និសីទសារព័ត៌មានក្នុងប្រទេសរុស្ស៊ី មេដឹកនាំក្រិករូបនេះបានសង្កត់ធ្ងន់ថា បញ្ហាតំបន់អឺរ៉ុប រួមទាំងបញ្ហាសន្តិសុខផងនោះមិនអាចដោះស្រាយបានឡើយ ប្រសិនជាគ្មានការចូលរួមឬវត្តមានរបស់រុស្ស៊ី។ ជុំវិញវត្តមាននាយករដ្ឋមន្ត្រីក្រិកនៅរុស្ស៊ី គេធ្លាប់រំពឹងថាក្រិករត់រកលុយជំនួយពីរុស្ស៊ី ដើម្បីស្រាយវិបត្តិបំណុល។ប៉ុន្តែ បើទោះជាក្រិកកំពុងប្រឈមមុខនឹងវិបត្តិបំណុលក៏ដោយ ក៏នាយករដ្ឋមន្ត្រីក្រិកមិនបានហារមាត់ស្នើសុំជំនួយនោះឡើយ។
ចំណែកលោកពូទីនឯណោះវិញ បានលួចបង្ហើបថា លោកបានពិភាក្សាយ៉ាងយកចិត្តទុកដាក់ជាមួយមេដឹកនាំក្រិកលើអនាគតនៃទំនាក់ទំនងសហភាពអឺរ៉ុប ក្រិក និងរុស្ស៊ី។ លោកបានបញ្ជាក់ថាការសហការក្នុងនាមជាដៃគូយុទ្ធសាស្ត្រយូរអង្វែងជាមួយសហភាពអឺរ៉ុបឬក្រិកនៅតែជារឿងអាទិភាពសម្រាប់លោក ហើយលោករំពឹងថា ក្រិកនឹងដើរតួនាទីសំខាន់ក្នុងការបង្កើននិងរឹតបន្តឹងមិត្តភាពរវាងអឺរ៉ុបនិងរុស្ស៊ី។
ដោយឡែក ភាគីទាំងពីរក៏បានលើកឡើងពីបញ្ហានៅអ៊ុយក្រែនដែលមិនទាន់ឈាន់ដល់ទីបញ្ចប់ដូចគ្នា។ នាយករដ្ឋមន្ត្រីក្រិកលោក Tsiprasបានបង្ហាញឆន្ទៈប្រឆាំងទណ្ឌកម្មលោកខាងលិច ដែលប្រឆាំងរុស្ស៊ី និងគាំទ្រកិច្ចព្រមព្រៀងក្រុងMinsk ដែលត្រូវបានបង្កើតឡើងកន្លងមកដើម្បីបញ្ចប់ការប្រយុទ្ធរវាងក្រុមឧទ្ទាមនិងកងកម្លាំងរដ្ឋាភិបាលក្រុងគៀវ។
ប្រមុខរដ្ឋាភិបាលក្រិកខាងលើជឿជាក់ថា កិច្ចព្រមព្រៀងនេះជាគន្លឺះយ៉ាងសំខាន់ក្នុងការឈានទៅបញ្ចប់ជម្លោះប្រដាប់អាវុធ ប៉ុន្តែលោករំលឹកថា ការដាក់ទណ្ឌកម្មប្រឆាំងរុស្ស៊ីត្រឹមតែធ្វើឲ្យស្ថានការណ៍អាក្រក់ប៉ុណ្ណោះ។
បន្ថែមពីកិច្ចពិភាក្សាសំខាន់ជុំវិញទំនាក់ទំនងរុស្ស៊ីសហភាពអឺរ៉ុប នាយករដ្ឋមន្ត្រីក្រិកក៏បានពិភាក្សាជាមួយមេដឹកនាំកំពូលរដ្ឋាភិបាលក្រេមឡាំងពីបុណ្យរំលឹកខួបលើកទី៧០ នៃជ័យជម្នះលើកងកម្លាំងណាស៊ីអាល្លឺម៉ង់ក្នុងសម័យសង្គ្រាមលោកលើកទី។ មេដឹកនាំទាំងពីរចាត់ទុកព្រឹត្តិការណ៍ឈ្នះក្រុមណាស៊ី ជាថ្ងៃពិសេសបំផុតសម្រាប់តំបន់និងពិភពលោកទាំងមូលផង៕
© រក្សាសិទ្ធិដោយ thmeythmey.com
