អន្តរជាតិ
បុរសម្នាក់សម្លាប់គូដណ្ដឹងនិងសាច់ញាតិមួយគ្រួសារ ព្រោះតែខាងស្រីស្ទាក់ស្ទើរមិនចង់រៀបការ
×![]()
បុរសជនជាតិប៉ាគីស្ថានម្នាក់ ត្រូវបានប៉ូលីសសង្ស័យថាបានសម្លាប់គូដណ្តឹងនិងសាច់ញាតិរបស់នាង ៩ នាក់ផ្សេងទៀត បន្ទាប់ពីក្រុមគ្រួសារខាងស្រីបង្ហាញនូវការស្ទាក់ស្ទើរក្នុងការអនុញ្ញាតឲ្យនាងទៅរៀបការជាមួយបុរសជាគូដណ្ដឹងនោះ។ នេះបើយោងតាមកាសែត New York Post ។
ប្រភពដដែលក៏បានផ្សាយថា បុរសជាជនសង្ស័យនោះមានអាយុ ២៥ ឆ្នាំ ហើយត្រូវបានគេស្គាល់ថាគឺលោក Gul Ahmad Saeedបានរត់គេចចាប់តាំងពីពេលដែលគេបានសម្លាប់គូដណ្ដឹង ឪពុកម្តាយបងប្រុស និងបងស្រីរបស់ខាងស្រីកាលពីដើមឆ្នាំនេះ នៅពេលដែលពួកគេបានរារាំងពិធីរៀបអាពាហ៍ពិពាហ៍របស់ខ្លួន និងស្ត្រីជាគូដណ្ដឹងនោះ។
កាលពីថ្ងៃអាទិត្យមុនលោក Gul Ahmad បានវិលត្រឡប់មកកាន់ទីក្រុងដែលលោករស់នៅស្ថិតក្នុងភាគពាយព្យប្រទេសប៉ាគីស្ថានជាកន្លែងដែលគាត់បានបាញ់សម្លាប់គូដណ្តឹងឪពុកម្តាយនិងបងប្អូនរបស់នាងចំនួន ៧ រូបផ្សេងទៀត បន្ទាប់ពីពូខាងស្រីបានលើកឡើងពីការប្រឆាំងរបស់គាត់ ទៅនឹងពិធីរៀបការរបស់បុរសម្នាក់នោះជាមួយនឹងក្មួយស្រីរបស់គាត់។
ក្រោយពេលកើតហេតុ ក្រុមប៉ូលីសបានព្យាយាមស្វែងរកជនសង្ស័យប៉ុន្តែបុរសម្នាក់នោះ បានរត់គេចខ្លួនចូលទៅក្នុងតំបន់កុលសម្ព័ន្ធពាក់កណ្តាលស្វយ័តមួយ ស្ថិតនៅតាមបណ្តោយព្រំដែនជាមួយប្រទេសអាហ្គានីស្ថានជាកន្លែងដែលអាជ្ញាធររដ្ឋាភិបាលគ្មានឥទ្ធិពល ហើយប៉ូលីសក៏គេមិនអនុញ្ញាតឲ្យចូលទៅទីនោះបានដោយស្របច្បាប់នោះទេ។
អំពើឃាតកម្មនេះ បានកើតឡើងនៅក្នុងតំបន់អភិរក្សយ៉ាងខ្លាំងមួយ នៅក្នុងប្រទេសប៉ាគីស្ថាននិងជាកន្លែងដែលស្ត្រី មិនត្រូវបានគេលើកទឹកចិត្តឲ្យទៅសាលារៀនហើយមានជម្រើសតិចតួចក្នុងការជ្រើសរើសគូស្រករ៕
© រក្សាសិទ្ធិដោយ thmeythmey.com
