សេដ្ឋកិច្ចអន្តរជាតិ
អន្តរជាតិ
ត្រឹមឆ្នាំ២០១៤ចិនជំពាក់បំណុលបរទេសប្រមាណជា៨៩៥ ពាន់លានដុល្លារ ![](https://image.thmeythmey.com/pictures/2015/04/09/942015173935china.jpg)
×![]()
អង្គភាពនិយ័តករប្តូរប្រាក់បរទេសរបស់ប្រទេសចិនបានឲ្យដឹងថាមកដល់ពេលនេះបំណុលដែលប្រទេសចិនជំពាក់បរទេស នៅក្នុងឆ្នាំ ២០១៤ បានកើនឡើងដល់ជាង ៨៩៥ ពាន់លានដុល្លារ ឬស្មើនឹង ២,៥ ភាគរយបើធៀបនឹងឆ្នាំ ២០១៣ ។
បើតាមការផ្សាយរបស់ CCTV អង្គភាពរដ្ឋបាលប្តូរប្រាក់បរទេសរបស់រដ្ឋចិន ហៅកាត់ (SAFE) បានបញ្ជាក់ផងដែរថា ទោះបីជាបំណុលដែលប្រទេសចិនជំពាក់បរទេស មានការកើនឡើងក៏ដោយ ក៏ចិននៅតែអាចគ្រប់គ្រងលើហានិភ័យនៃការសងបំណុលបាន។
បំណុលបរទេសសរុបរបស់ប្រទេសចិនគិតត្រឹមឆ្នាំ ២០១៤ កន្លងទៅនេះ គឺស្មើនឹង ៨,៦ ភាគរយនៃផលិតផលក្នុងស្រុកសរុប (GDP) របស់ប្រទេសចិន ខណៈពេលដែលបំណុលរយៈពេលខ្លីរបស់ចិន គឺស្មើនឹង ១៧,៨ ភាគរយ នៃប្រាក់បម្រុងរូបិយប័ណ្ណបរទេសរបស់ប្រទេសនេះ។
SAFEក៏បានពន្យល់បន្ថែមថាអនុបាតបំណុលទាំងនោះនៅក្នុងស្ដង់ដារសុវត្ថិភាពដែលត្រូវបានទទួលស្គាល់ជាអន្តរជាតិ។ បំណុលសរុបខាងលើនេះ គឺមិនបានរួមបញ្ចូលទាំងបំណុលរបស់តំបន់រដ្ឋបាលពិសេសហុងកុងនិងម៉ាកាវឬតៃវ៉ាន់នោះទេ។
បើគិតតាមរចនាសម្ព័ន្ធរូបិយវត្ថុបំណុលរបស់ប្រទេសចិនគិតជាប្រាក់ដុល្លារអាមេរិក គឺមានចំនួន ៨០ ភាគរយនៃបំណុលបរទេសធំៗ បន្ទាប់មកគឺមានបំណុលជាប្រាក់អឺរ៉ូ៦ ភាគរយនិងប្រាក់យ៉េនរបស់ជប៉ុន ៤ ភាគរយផងដែរ៕
© រក្សាសិទ្ធិដោយ thmeythmey.com