អន្តរជាតិ
នយោបាយអន្តរជាតិ
ក្រុមគាំទ្រក្រុមជីហាតអុកឡុកទូរទស្សន៍TV5Monde មួយក្បាច់ ព្រមានរដ្ឋាភិបាលបារាំង
× កាលពីយប់ថ្ងៃពុធ ការផ្សាយព័ត៌មានរបស់ទូរទស្សន៍អន្តរជាតិ TV5Monde បានរងភាពរអាក់រអួល។ យប់ថ្ងៃពុធ គេឃើញតែរូបភាពអេក្រង់ខ្មៅងងឹត ពេលគេបើកប៉ុស្តិ៍TV5Mondeនេះឡើង។ ក្នុងវេបសាយទូរទស្សន៍វិញ គេឃើញមានឃ្លាប្រយោគជា ភាសាអារ៉ាប់ ចុះផ្សាយក្នុងរយៈពេលខ្លី។ ព្រឹកថ្ងៃព្រហស្បតិ៍ម្សិលមិញ ទូរទស្សន៍TV5Mondeមានលទ្ធភាពបានត្រឹមតែផ្សាយកម្មវិធី ដែលថតទុករួចប៉ុណ្ណោះ។
នៅយប់ថ្ងៃពុធ ក្នុងវេបសាយរបស់ទូរទស្សន៍ផ្សាយជាភាសាបារាំងTV5Monde ក្នុងរយៈពេលខ្លី តែប៉ុន្មានម៉ោងប៉ុណ្ណោះ ក្រុមមនុស្សដែលគេគិតថា ជាអ្នកគាំទ្រក្រុមជីហាតរដ្ឋអ៊ីស្លាមបានចុះផ្សាយមុខមាត់របស់សកម្មជនជីហាតម្នាក់ជំនួសអោយរូបតំណាងTV5Monde វិញ។ អត្តសញ្ញាណនិងប្រវត្តិរូបរបស់បណ្តាជនជិតដិតនឹងទាហានបារាំងដែលធ្វើប្រតិបត្តិការកំចាត់ក្រុមជីហាតក៏ត្រូវបានចុះផ្សាយក្នុងទំព័រហ្វេសប៊ុករបស់ទូរទស្សន៍ដែរ។ ក្រុមអ្នកគាំទ្រជីហាតទាំងនេះបានចុះផ្សាយសារមួយបរិហារអន្តរាគមន៍យោធាបារាំង និងប្រធានាធិបតីបារាំង ថាបានធ្វើខុសមិនអាចអត់ឱនអោយបាន ព្រោះបានធ្វើសង្គ្រាមដែលមិនផ្តល់ផលប្រយោជន៍អ្វីទាល់តែសោះ។ សកម្មជនទាំងនេះក៏បានប្រាប់ដែរថា វេបសាយរបស់ក្រុមរដ្ឋអ៊ីស្លាមដែលគេហៅថាCyberCaliphate កំពុងតែតាមរកមុខក្រុមគ្រួសារទាហានដែលលក់ខ្លួនអោយអាមេរិក។
នាយករដ្ឋមន្ត្រីបារាំង ម៉ានុយអែល វ៉ាល់ បានបរិហារទង្វើនេះ ថាប៉ះពាល់សេរីភាពសារព័ត៌មាននិងការបញ្ចេញមតិយោបល់។ ថ្ងៃព្រហស្បតិ៍ម្សិលមិញ សមាជិករដ្ឋាភិបាលបារាំងបានប្រជុំជាមួយថ្នាក់ដឹកនាំទូរទស្សន៍បារាំង ដើម្បីវាយតម្លៃពីស្ថានភាពនៃការគំរាមកំហែងនិងចាត់វិធានការការពារពីការវាយប្រហារក្នុងវេបសាយ។ ពេលនេះ អាជ្ញាធរបារាំងកំពុងស៊ើបអង្កេតរកមុខជនដៃដល់។ បារាំងចង់ដឹងថា ការឈ្លានពានការផ្សាយព័ត៌មាន និងវេបសាយរបស់TV5Monde ពិតជាបង្កឡើងដោយក្រុមជីហាតរដ្ឋអ៊ីស្លាមមែនរឺយ៉ាងណា។
បារាំងមិនទាន់ច្បាស់ក្នុងចិត្តថា ក្រុមជីហាតរដ្ឋអ៊ីស្លាមពិតជាបានធ្វើសកម្មភាពបែបនេះទេ ព្រោះថា ទោះជាក្រុមមនុស្សដែលបង្កបទល្មើសនេះ បានប្រាប់ថា មកពីក្រុមជីហាតរដ្ឋអ៊ីស្លាមក្តី ក៏គេនៅមិនទាន់ឃើញ CyberCaliphateរបស់ក្រុមជីហាតចុះផ្សាយព័ត៌មានទាក់ទងហេតុការណ៍រអាក់រអួលTV5Mondeដែរ។ គួររំលឹកដែរថា កាលពីខែមករាក៏ធ្លាប់មានមនុស្សមួយចំនួនអះអាងថាមកពីក្រុមរដ្ឋអ៊ីស្លាម ហើយបានចូលឈ្លានពានវេបសាយCentCom របស់មជ្ឈមណ្ឌលបញ្ជាការតំបន់មជ្ឈិមបូព៌ារបស់មន្ទីរប៉ង់តាហ្កូនដែរ។
ទូរទស្សន៍អន្តរជាតិTV5Monde ផ្សាយព័ត៌មានជាភាសាបារាំង តាមប្រទេសចំនួន២០០ ជាបណ្តាញទូរទស្សន៍ធំបំផុតលំដាប់ទី២ក្នុងពិភពលោក បន្ទាប់ពីទូរទស្សន៍អាមេរិក MTV៕
© រក្សាសិទ្ធិដោយ thmeythmey.com