អន្តរជាតិ
នយោបាយអន្តរជាតិ
ប្រមុខការពារជាតិអាមេរិករីករាយ ដែលកូរ៉េខាងជើងបាញ់មីស៊ីលស្វាគមន៍លោក ![](https://image.thmeythmey.com/pictures/2015/04/10/0124-north-korea-missile_full_600.jpg)
×![]()
កូរ៉េខាងជើងបានបាញ់មីស៊ីលពីរគ្រាប់ទៅលើអាកាសនៅភាគខាងលិចនៃឈូងសមុទ្រប្រទេសខ្លួនស្របពេលដែលរដ្ឋមន្ត្រីក្រសួងការពារជាតិអាមេរិកកំពុងបំពេញបេសកកម្មខ្លួននៅក្នុងតំបន់អាស៊ីបូព៌ា។វត្តមានរបស់មន្ត្រីជាន់ខ្ពស់ការពារអាមេរិកនេះនឹងធ្វើឲ្យមានការតំឡើងសាច់ដុំដាក់គ្នានិងភាពតានតឹងកាន់តែខ្លាំងនៅក្នុងឧបទ្វីបកូរ៉េ។ ប៉ុន្តែប្រមុខការពារជាតិអាមេរិកនិយាយបែបលេងសើចថា លោករីករាយ បើគីមជុងអ៊ុនបាញ់មីស៊ីលស្វាគមន៍ដំណើរទស្សនកិច្ចរបស់លោក។
ម្សិលមិញនេះរដ្ឋាភិបាលរ៉េខាងត្បូងបានបញ្ជាក់ថាក្រុងព្យុងយ៉ាងបានបាញ់មីស៊ីលខ្នាតតូចពីរគ្រាប់ទៅលើលំហអាកាសនៅឆ្នេរភាគខាងលិចនៃប្រទេស។ហើយការបាញ់នេះគឺស្របពេលដែលរដ្ឋមន្ត្រីការពារជាតិសហរដ្ឋអាមេរិកកំពុងបំពេញបេសកកម្មនៅក្នុងប្រទេសជប៉ុននិងត្រៀមបន្តទៅកាន់កូរ៉េខាងត្បូង។
បើយោងតាមរដ្ឋមន្ត្រីក្រសួងការពារជាតិកូរ៉េខាងត្បូងលោក Kim Min-seok កាលពីថ្ងៃអង្គារកន្លងទៅនេះកូរ៉េខាងជើងបានបាញ់មីស៊ីលរយៈចំងាយខ្លីពីរដើមនៅឆ្នេរខាងលិចប្រទេសកូរ៉ខាងជើងដែលការបាញ់គឺបានបន្តក្រោយពីកូរ៉េខាងជើងបានបាញ់គ្រាប់មីស៊ីលបួនគ្រាប់ម្តងរួចទៅហើយកាលពីថ្ងៃសុក្រសបា្តហ៍មុននេះ។
អ្វីគួរកត់សម្គាល់នោះការបាញ់គ្រាប់មីស៊ីលរបស់កូរ៉េខាងជើងជាបន្តបន្ទាប់នេះហាក់ដូចជាការសា្វគមន៍និងបង្ហាញសាច់ដុំទៅកាន់ប្រមុខការពារជាតិសហរដ្ឋអាមេរិកលោក Ash Carterដែលកំពុងផ្តើមទស្សនកិច្ចនៅក្នុងប្រទេសជាសម្ពន្ធ័របស់ខ្លួននៅតំបន់អាស៊ីបូព៌ារួមមានជប៉ុននិងកូរ៉េខាងត្បូងដើម្បីពិភាក្សាពីបញ្ហានៃការវិវត្តន៍នៃអាវុធនុយក្លែអ៊ែររបស់កូរ៉េខាងជើង។
ជាមួយគ្នានេះប្រមុខការពារជាតិសហរដ្ឋអាមេរិកលោក Ash Carter បានប្រតិកម្មទៅនឹងការបាញ់គ្រាប់មីស៊ីលនេះថា « វាគ្រាន់តែជាការបង្ហាញថាតើភាពតានតឹងនៅក្នុងឧបទ្វីបកូរ៉េមានស្ថានភាពបែបណា ហើយហេតុផលនេះដែលលោកត្រូវបំពេញបេសកកម្មនៅទីនេះ»។លោក Carter ក៏បានបន្ថែមទៀតថា «ប្រសិនបើការបាញ់នោះគឺជាការសារស្វារគមន៍មែននោះខ្ញុំពិតជារីករាយ»។
មួយវិញទៀតលោក Carter ក៏បានបញ្ជាក់ថាកូរ៉េខាងត្បូងគួរតែមានការបំពាក់ប្រពន្ធ័ការពារជាមួយនឹងការបាញ់គ្រាប់មីស៊ីល។ហើយបើសិនកូរ៉េខាងជើងនៅតែបន្តសកម្មភាពបែបនេះជម្រើសចុងក្រោយគឺមានតែការតំឡើងបន្ទាយការពារកម្រិតខ្ពស់ (THAAD) ដែលរុស្ស៊ីនិងចិនបានប្រឆាំងមិនឲ្យមាននៅក្នុងឧបទ្វីបកូរ៉េ។
យ៉ាងណាក៏ដោយនេះមិនមែនលើកទីមួយដែលកូរ៉េខាងជើងបាញ់គ្រាប់មីស៊ីលនៅក្នុងដែនសមុទ្រដែលជាព្រំប្រទល់រវាងកូរ៉េទាំងពីរនោះហើយក៏គ្មានសញ្ញាណាមួយដែលធ្វើឲ្យអាមេរិកត្រូវតក់ស្លុតជាមួយនឹងការបាញ់គ្រាប់់នេះព្រោះមានទាហានអាមេរិករាប់ពាន់នាក់កំពុងឈរជើងនៅក្នុងទឹកដីកូរ៉េខាងត្បូងស្រាប់។
គួររម្លឹកផងដែរគិតចាប់ពីពេលដែលកូរ៉េខាងត្បូងនិងសហរដ្ឋអាមេរិកបានចាប់ផ្តើមសមយុទ្ធយោធាប្រចាំឆ្នាំទ្វេភាគីចាប់ពីខែមីនាកន្លងមកការប្រឈមមុខគ្នានៅឧបទ្វីបកូរ៉េបានឡើងកំដៅពីមួយថ្ងៃទៅមួយថ្ងៃ។ក្នុងនោះរដ្ឋាភិបាលក្រុងព្យ៉ុងយ៉ាងក៏បានប្រកាសសង្គ្រាមជាមួយសហរដ្ឋអាមេរិកក៏ដូចជាកូរ៉េខាងត្បូងផងដែរលើការរំលោភដែនអធិបតេយ្យជាពិសេសនោះនៅក្នុងដែនសមុទ្រដែលជាព្រំប្រទល់រវាងប្រទេសទាំងពីរ៕
© រក្សាសិទ្ធិដោយ thmeythmey.com