អន្តរជាតិ
នយោបាយអន្តរជាតិ
យន្តហោះចំបាំងបារាំង Rafale សង្ហាស៊ិចស៊ី ធ្វើអោយគេច្រណែនពេញពិភពលោក ![](https://image.thmeythmey.com/pictures/2015/04/11/rafale.jpg)
×![]()
អោយតែហាមាត់និយាយពីយន្តហោះចំបាំងRafaleរបស់បារាំង គេមើលឃើញតែគុណសម្បត្តិឥតខ្ចោះរបស់វាប៉ុណ្ណោះ។ អេហ្ស៊ីបបានទិញ Rafale ២៤គ្រឿងពីបារាំង កាលពីខែកុម្ភៈ ឥឡូវ ដល់វេនឥណ្ឌាវិញម្តង។ ក្នុងដំណើរទស្សនកិច្ចនៅបារាំង នៅថ្ងៃសុក្រម្សិលមិញ នាយករដ្ឋមន្ត្រី ណារិនដ្រា ម៉ូឌី មិនអាចទប់ចិត្តបាន ហើយបានចុះហត្ថលេខាទិញយក Rafale ៣៦គ្រឿងពីបារាំងដើម្បីបំពាក់ឲ្យកងទ័ពអាកាសឥណ្ឌា។
ហេតុអ្វីយន្តហោះចំបាំង Rafale មានមន្តស្នេហ៍ទាក់ទាញដូច្នេះ? Rafale មានរាងជាឌែលតា ផលិតដោយក្រុមហ៊ុនបារាំង Dassault និងដាក់អោយកងទ័ពបារាំងប្រើចាប់ពីឆ្នាំ ២០០១មក។ ក្នុងឆ្នាំ២០២៥-២០៣០ខាងមុខ បារាំងចង់ប្រើ Rafaleជំនួសយន្តហោះ៧ប្រភេទ ដែលកងទ័ពអាកាស និងកងទ័ពជើងទឹកកំពុងប្រើសព្វថ្ងៃ។
យន្តហោះRafale មានតួនាទីច្រើនមុខ ដូចជាការពារដែនអាកាស ចាប់អត្តសញ្ញាណសត្រូវ ហើយតួនាទីលេចធ្លោបំផុតនោះគឺការវាយប្រហារនុយក្លេអ៊ែរ។ ក្នុងបេសកកម្មទំលាក់គ្រាប់បែកនុយក្លេអ៊ែរ Rafale អាចដឹកមីស៊ីលMICAបាន៦ដើម មីស៊ីល ASMPA មួយដើម ហើយមានកន្លែងស្តុកសាំង២០០០លីត្របន្ថែមទៀត។ យន្តហោះនេះមានភាពឯករាជ្យ អាចហោះហើរបានជាង១២ម៉ោង មុននឹងត្រូវចាក់សាំង គឺលើសពីយន្តហោះMirage 2000 ដែលអាចហោះបានត្រឹម១០ម៉ោង។ Rafale មានល្បឿនលឿន ហើយអាចធ្វើដំណើរក្នុងផ្លូវស្មុគស្មាញ អាចវាយប្រហារបានចំងាយឆ្ងាយ និងអាចលេចមុខមកកំចាត់សត្រូវ ទាំងសត្រូវមិនបានគិតទុកជាមុន។
អានុភាពជាក់ស្តែងរបស់យន្តហោះចំបាំងRafale បានបង្ហាញឡើង ក្នុងអន្តរាគមន៍យោធានៅលីប៊ី កាលពីឆ្នាំ២០១១ ។ អ្នកជំនាញលើកឡើងថា Rafale ៤គ្រឿងបានធ្វើការវាយប្រហារយ៉ាងយូរ រហូតដល់៩ម៉ោង៣៥នាទី នៅលើដែនអាកាស ជារយៈពេលយូរជាប្រវត្តិសាស្ត្រសម្រាប់កងទ័ពអាកាស។ កាលនោះ Rafaleក៏បានចាក់សាំងក្នុងពេលកំពុងប្រតិបត្តិការក្នុងដែនអាកាសផងដែរ។
ដោយសារគុណសម្បត្តិទាំងអស់នេះ ប្រទេសមួយចំនួនដូចជាស្វ៊ីស កូរ៉េ ប្រេស៊ីល រឺក៏ម៉ារ៉ុក សុទ្ធតែប៉ុនប៉ងចង់បានRafaleគ្រប់គ្នា។ ប៉ុន្តែ ចង់ទិញយន្តហោះRafaleក៏មិនមែនស្រួលដែរ គឺត្រូវតែមានទំនាក់ទំនងការទូតល្អជាមួយបារាំងជាម្ចាស់វាសិន។
កន្លងមក ធ្លាប់មានការបន្ថោកគុណសម្បត្តិរបស់Rafale ប្រហែលដោយសារភាពច្រណែនក៏ថាបាន។ ទោះយ៉ាងនេះក្តី ក៏Rafaleនៅតែជាយន្តហោះចំបាំងដ៏ពូកែបំផុតក្នុងពិភពលោក។ ដោយឡែក បើប្រៀបនឹងយន្តហោះF-16របស់អាមេរិក Gripenរបស់ស៊ុយអែត រឺក៏Typhoonរបស់បណ្តាប្រទេសអឺរ៉ុប តម្លៃរបស់Rafaleហាក់ដូចជាខ្ពស់ហួសហេតុ។
មុនពេលឥណ្ឌាប្រកាសទិញប្រើ៣៦គ្រឿងនៅល្ងាចថ្ងៃសុក្រម្សិលមិញ សារព័ត៌មានបារាំង Le Monde បានចុះផ្សាយថា ឥណ្ឌាចង់ទិញរ៉ាហ្វាល់៦៣គ្រឿងភ្លាមៗ ក្នុងតម្លៃ៧៣០០លានអឺរ៉ូ។ មានន័យថា យន្តហោះ១គ្រឿង អាចមានតម្លៃដល់ទៅជិត១១៦លានអឺរ៉ូ៕
© រក្សាសិទ្ធិដោយ thmeythmey.com