អន្តរជាតិ
អាមេរិកចែកព័ត៌មានចារកម្មបន្ថែមដល់រដ្ឋអារ៉ាប់ដើម្បីកម្ចាត់ក្រុមឧទ្ទាមយេម៉ែន
× រដ្ឋាភិបាលក្រុងវ៉ាស៊ីនតោន ត្រៀមពង្រីកការផ្តល់របាយការណ៍ចារកម្មជាមួយអារ៉ាប៊ីសាអូឌីតដើម្បីបង្កើនសមត្ថភាពប្រយុទ្ធជាមួយក្រុមឧទ្ទាមគាំទ្រដោយអ៊ីរ៉ង់ Houthis។ ការប្រកាសផ្តល់របាយការណ៍ចារកម្មបន្ថែមនេះកើតឡើងប៉ុន្មានថ្ងៃប៉ុណ្ណោះក្រោយពេលដែល អាមេរិក សន្យាថានឹងផ្តល់ជំនួយសពា្វវុធគាំទ្ររដ្ឋអារ៉ាប់ដើម្បីទម្លាក់គ្រាប់នៅយេម៉ែន។
សហរដ្ឋអាមរិកឯកភាពថានឹងផ្តល់បន្ថែម របាយការណ៍ចារកម្មច្រើនជាមុនអោយអារ៉ាប៊ីសាអូឌីត ដើម្បីធានាថា ការវាយប្រហារតាមផ្លូវអាកាសរបស់រដ្ឋអារ៉ាប់ប្រឆាំងក្រុមឧទ្ទាមនៅយេម៉ែនកាន់តែមានប្រសិទ្ធភាព។ មន្ត្រីក្រុងវ៉ាស៊ីនតោនមិនបានបង្ហាញអត្តសញ្ញាណម្នាក់បានបញ្ជាក់ ការផ្តល់បន្ថែមរបាយការណ៍ចារកម្មនេះគឺរួមមានទាំងការណ៍ចែករំលែករបាយការណ៍រសើប ឬសម្ងាត់នានាជុំវិញទីតាំងរបស់ក្រុមឧទ្ទាម Houthis នៅក្នុងប្រទេសយេម៉ែន ដើម្បីធានាថា ការវាយប្រហារអាចមានប្រសិទ្ធភាពខ្ពស់។
ការចែករំលែករបាយការណ៍បន្ថែមអោយអារ៉ាប៊ីសាអូឌីតនេះ អាមេរិករំពឹងថា កងម្លាំងផ្លូវអាកាសនេះនឹងមានសមត្ថភាពកំណត់ទីតាំងសត្រូវច្បាស់លាស់ជាងពេលបច្ចុប្បន្ន ហើយចៀសវាងការវាយប្រហារច្រឡំទីតាំងជនស៊ីវិលផង។ ចំនួនជនស៊ីវិលបន្តស្លាប់បាត់បង់ជីវិតដោយសារការទម្លាក់គ្រាប់បែករបស់រដ្ឋអារ៉ាប់នេះ កំពុងក្លាយជាក្តីបាម្ភសម្រាប់សហគមន៍អន្តរជាតិ ជាពិសេសមហាអំណាចតំបន់ដូចជាអ៊ីរ៉ង់ជាដើម។ អ៊ីរ៉ង់ រុស្ស៊ី ចិន សុទ្ធតែប្រឆាំងការវាយប្រហារផ្លូវអាកាស និងទាមទារអោយបណ្តារដ្ឋអារ៉ាប់បញ្ឈប់ការទម្លាក់គ្រាប់រួចជំរុញអោយភាគីជម្លោះបង្កើតបទឈប់បាញ់អចិន្ត្រៃយ៍មួយ។ ចុងក្រោយពួកគេអាចឈានទៅចរចាបញ្ចប់វិបត្តិនយោបាយបាន។
សហរដ្ឋអាមេរិកបច្ចុប្បន្នព្យាយាមគាំទ្រអារ៉ាប៊ីសាអូឌីតអោយទប់ស្កាត់ក្រុមឧទ្ទាមយេម៉ែនមិនអោយពង្រឹងកម្លាំងនិងដណ្តើមអំណាចដោយប្រើប្រាស់ចុងកាំភ្លើង។ ប៉ុន្តែការគាំទ្ររបស់អាមេរិកនេះកំពុងក្លាយជាក្តីបារម្ភមួយ។ អនុរដ្ឋមន្ត្រីការបរទេសអាមេរិកបានប្រកាសថា រដ្ឋាភិបាលក្រុងវ៉ាស៊ីនតោនត្រៀមលក្ខណៈដើម្បីផ្តល់របាយការណ៍ចារកម្ម និងពន្លឿនការផ្គត់ផ្គង់អាវុធយុទ្ធភ័ណ្ឌដល់បណ្តារដ្ឋអារ៉ាប់ដែលចូលរួមទម្លាក់គ្រាប់បែកប្រឆាំងក្រុម Houthis យេម៉ែន។
សហរដ្ឋអាមេរិកគាំទ្រមេដឹកនាំរដ្ឋាភិបាលដែលកំពុងភៀសខ្លួនលោក Hardi ហើយរដ្ឋបាលលោក អូបាម៉ា ក៏គាំទ្រការប្រើប្រាស់សង្គ្រាមផ្លូវអាកាសប្រឆាំងក្រុមឧទ្ទាមផងដែរ បើទោះជាមានការរិះគន់ពីសំណាក់បណ្តាប្រទេសមួយចំនួនក៏ដោយ។ យ៉ាងណាមិញការផ្តល់សព្វាវុធទៅអោយអារ៉ាប៊ីសាអូឌីត ដើម្បីកម្ចាត់ក្រុមឧទ្ទាមនេះ កំពុងបង្កើនក្តីបារម្ភ ព្រោះគេមិនដឹងថាអាវុធនោះយកមកប្រើដើម្បីកម្ចាត់ក្រុមឧទ្ទាមឬសម្លាប់ជនស៊ីវិលឡើយ។ របាយការណ៍ថ្មីបានបង្ហាញថា ការវាយប្រហារចុងក្រោយបានសម្លាប់ជនស៊ីវិលជាពិសេសក្មេងៗ ដោយសារទីតាំងនោះជាសាលារៀន ហើយភ្នាក់ងារកាកបាទក្រហមបានព្រមានរួចហើយពីការបន្តវាយប្រហារនេះ៕
© រក្សាសិទ្ធិដោយ thmeythmey.com