អន្តរជាតិ
នយោបាយអន្តរជាតិ
លោកអូបាម៉ា៖ ហ៊ីឡារីគ្លីនតុនជាបេក្ខជនសក្តិសមសម្រាប់តំណែងប្រធានាធិបតី ![](https://image.thmeythmey.com/pictures/2015/04/12/clintobam4g0601_468x408.jpg)
×![]()
ក្នុងសន្និសីទកំពូលថ្នាក់តំបន់ក្នុងប្រទេសប៉ាណាម៉ា ប្រធានាធិបតីអាមេរិកបារ៉ាក់ អូបាម៉ា បានថ្លែងកោតសរសើរអតីតរដ្ឋមន្ត្រីការបរទេស និងជាបេក្ខជនប្រធានាធិបតីសម្រាប់ឆ្នាំ ២០១៦ ហ៊ីឡារី គ្លីនតុន។ លោកបានបញ្ជាក់ថាលោកស្រី ហ៊ីឡារីគ្លីនតុន ជាបេក្ខជនប្រធានាធិបតីម្នាក់ដែលសមត្ថភាពខ្ពស់ និងជាមនុស្សម្នាក់សក្តិសមបំផុតសម្រាប់តំណែងប្រធានាធិតីអាមេរិក។
ស្របពេលដែលលោកស្រី ហ៊ីឡារី គ្លីនតុន ប្រកាសថា លោកស្រីនឹងចាប់ផ្តើមយុទ្ធនាការឃោសនាបោះឆ្នោតសម្រាប់តំណែងប្រធានាធិបតីអាមេរិកនៅថ្ងៃអាទិត្យនេះផងនោះ ម្សិលមិញប្រធានាធិបតីអាមេរិកលោក បារ៉ាក់ អូបាម៉ា បានថ្លែងកោតសរសើរលោកស្រី ហ៊ីឡារី គ្លីនតុនឥតដាច់។ ក្នុងសន្និសីទកំពូលថ្នាក់តំបន់នៅក្នុងប្រទេសប៉ាណាម៉ា ប្រធានាធិបតីអាមេរិកខាងលើ បានព្យាយាមរំលឹកពីអនុស្សាវរីយ៍ ដែលលោកមានជាមួយអតីតបេក្ខជនប្រធានាធិបតី និងអតីតរដ្ឋមន្ត្រីការបរទេសក្នុងរដ្ឋបាលរបស់លោក។ មិនត្រឹមតែកោតសរសើរប៉ុណ្ណោះទេ លោក អូបាម៉ាបានបញ្ជាក់ថាលោកចាត់ទុកលោកស្រីគ្លីនតុន ជាមិត្តភក្តិជិតស្និទ្ធរបស់លោកផងដែរ។
ប្រមុខរដ្ឋអាមេរិកខាងលើ បានបញ្ជាក់ថា លោកស្រី ហ៊ីឡារី គ្លីនតុន ជាដៃគូប្រជែងដ៏ឆ្នើម ជារដ្ឋមន្ត្រីការបរទេសដែលមានសមត្ថភាព និងជាមនុស្សម្នាក់ដែលសក្តិសមនឹងតំណែងប្រធានាធិបតីអាមេរិកបំផុតផងដែរ។ លោកស្រី ហីឡារីគ្លីនតុន មានវ័យ ៦៧ឆ្នាំ នឹងក្លាយជាបេក្ខជនសំខាន់បំផុតមួយរបស់បក្សប្រជាធិបតេយ្យក្នុងការបោះឆ្នោតប្រធានាធិបតីសម្រាប់ឆ្នាំ ២០១៦ខាងមុខ។ នៅថ្ងៃអាទិត្យនេះលោកស្រីអតីតប្រមុខការទូតអាមេរិកនេះប្រហែលជានឹងបង្ហាញផែនការឃោសនាបោះឆ្នោតថែមទៀតផង។ បើយោងតាមរបាយការណ៍ស្ទង់មតិកន្លងមក ចំនួនសមាជិកគណបក្សប្រជាធិបតេយ្យប្រហែល ៦០ភាគរយអះអាងថា គេនឹងបោះឆ្នោត គាំទ្រលោកស្រី ហ៊ីឡារី គ្លីនតុនជាបេក្ខជនប្រធានាធិបតីអាមេរិកផង។ ប្រហែលជាការបោះឆ្នោតឆ្នាំក្រោយនេះជាពេលវេលាដែលកំណត់អោយសហរដ្ឋអាមេរិកមានប្រធានាធិបតីស្ត្រីលើកដំបូងបំផុតក្នុងប្រវត្តិសាស្ត្រ។
ប៉ុន្តែក្នុងរយៈពេលប៉ុន្មានសប្តាហ៍ចុងក្រោយនេះ បញ្ហាមួយចំនួនបានធ្វើអោយប្រជាប្រិយភាពលោកស្រី ហ៊ីឡារី គ្លីនតុន ប្រឈមមុខបញ្ហា។ នោះគឺការទម្លាយព័ត៌មានថាលោកស្រីប្រើប្រាស់សារអេឡិចត្រូនិកបុគ្គលសម្រាប់បំពេញការងារក្នុងពេលលោកស្រីកាន់តំណែងជារដ្ឋមន្ត្រីការបរទេស ពោលគឺពីឆ្នាំ ២០០៩ ដល់ឆ្នាំ ២០១។
យ៉ាងណាក៏ដោយ គេសង្កេតឃើញបេក្ខជនពីររូបទៀតដែលមានសមត្ថភាពនិងអាចមានលទ្ធភាពឈរឈ្មោះជាប្រធានាធិបតីដែរ។ ទីមួយលោកស្រី Elizabeth Warren និងទីពីរលោក Joe Biden អនុប្រធានាធិបតីអាមេរិកបច្ចុប្បន្ន។ ប៉ុន្តែពួកគេទាំងពីរនាក់មិនទាន់ចេញមុខប្រកាសជាផ្លូវការនៅឡើយទេចំពោះការឈ្មោះប្រកួតប្រជែងនេះ។ដោយឡែកខាងគណបក្សសាធារណរដ្ឋឯណោះវិញ គេសង្កេតឃើញមានបេក្ខជនជាច្រើននាក់បានប្រកាសថាខ្លួននឹងចូលរួមប្រកួតប្រជែងក្នុងការបោះឆ្នោតប្រធានាធិបតីក្នុងឆ្នាំ ២០១។ បេក្ខជនដែលមានឈ្មោះបោះសម្លេងមានដូចជា សមាជិកព្រឹទ្ធសភាលោក Rand Paul លោក Ted Cruz លោក Jeb Bush ជាដើម៕
© រក្សាសិទ្ធិដោយ thmeythmey.com