អន្តរជាតិ
×![]()
ដោយ: ថ្មីៗ
ប្រទេសមួយចំនួននៅតំបន់អាស៊ានដូចជាមីយ៉ាន់ម៉ា កម្ពុជា ឡាវ ថៃ នឹងប្រារព្ធពីធីបុណ្យចូលឆ្នាំដំណាលគ្នាក្នុងខែមេសានេះ។ សម្រាប់ប្រទេសថៃ ពិធីបុណ្យចូលឆ្នាំនឹងត្រូវរៀបចំឡើងទូទាំងប្រទេសទាំងមូល។ ពិធីចូលឆ្នាំថ្មីនេះនឹងត្រូវរៀបចំឡើងចាប់ពីថ្ងៃចន្ទសប្តាហ៍ក្រោយ ហើយបច្ចុប្បន្ននេះប្រជាជនថៃកំពុងត្រៀមខ្លួនប្រារព្ធពិធីបុណ្យប្រពៃណីនេះ និងត្រៀមរៀបចំកម្មវិធីទាក់ទាញភ្ងៀវទេសចរបរទេសផង។
ប្រទេសថៃនឹងរៀបចំបុណ្យចូលឆ្នាំប្រពៃណីនៅថ្ងៃចន្ទសប្តាហ៍ក្រោយនេះ នៅទូទាំងប្រទេសទាំងមូល។ បុណ្យចូលឆ្នាំថ្មីនេះត្រូវបានគេហៅថា ជាសង្ក្រាន្ត ដែលនឹងត្រូវប្រារព្ធឡើង ៣ថ្ងៃ ប៉ុន្តែនៅភាគខាងជើងដួចជាខេត្ត ឈៀងម៉ៃ បុណ្យនេះអាចនឹងរៀបចំឡើងក្នុងរយៈពេល ១សប្តាហ៍ឯណោះ។
តាមពិតទៅពិធីបុណ្យនេះរៀបចំឡើងដើម្បីអបអរនិងបញ្ជាក់ថារដូវក្តៅឈានដល់ទីបញ្ចប់ហើយ ហើយខែមេសានេះជាខែដែលក្តៅបំផុតសម្រាប់ប្រទេសថៃ។ ជាធម្មតាក្នុងពេលចូលឆ្នាំ ប្រជាជនថៃភាគច្រើននាំគ្នាទៅវត្តអារ៉ាម ដើម្បីបួងសួងសុំសេចក្តីសុខសម្រាប់ឆ្នាំថ្មី និងដើម្បីលាងសម្អាតរូបសំណាកព្រះ និងទីសក្តារៈបូជានានាផង។
ពាក្យថាសង្ក្រាន្តត្រូវបានគេស្គាល់ថាជាពិធីបុណ្យទឹកមួយ ដែលប្រជាជនថៃជឿជាក់ថា ទឹកអាចជួយជម្រះអោយអស់នូវឧបទ្រពចង្រៃ សំណាងអាក្រក់ជាដើមនោះ ដូច្នេះហើយទើបប្រជាជនថៃភាគច្រើននៅក្នុងពេលបុណ្យសង្ក្រាន្តនេះ ពួកគេចូលចិត្តបាចទឹកដាក់គ្នាទៅវិញទៅមក និងប៉ាតម្សៅគ្នាផងនោះ។ សង្ក្រាន្តចាប់ផ្តើមឡើងនៅថ្ងៃ១៣ខែមេសា ហើយនៅក្នុងអំឡុងចូលឆ្នាំ៣ថ្ងៃនេះ ប្រជាជនថៃចូលចិត្តជួបជុំក្រុមគ្រួសារ ហើយបោសម្អាតផ្ទះ ទៅវត្តដើម្បីសម្អាត និងស្រង់ព្រះជាដើមផងដែរ ដោយសាររយៈពេលនេះជាថ្ងៃឈប់សម្រាក។ នៅក្នុងទីក្រុងបាងកករយៈពេលបីថ្ងៃ នឹងមានភាពស្ងប់ស្ងាត់ខ្លាំង ព្រោះប្រជាជនភាគច្រើននាំគ្នាធ្វើដំណើរទៅកាន់ស្រុកកំណើត និងធ្វើដំណើរកំសាន្តទៅកាន់តំបន់ផ្សេងទូទាំងប្រទេស និងក្រៅប្រទេស។
ក្រៅពីរៀបចំទទួលឆ្នាំថ្មី និងបង្កើនបរិយាកាសរីករាយក្នុងចំណោមប្រជាជនថៃ ថៃក៏ព្យាយាមរៀបចំតុបតែងលម្អរ បង្កើតការទាក់ទាញភ្ងៀវទេសចរបរទេសអោយមកលេងកម្សាន្តនៅក្នុងប្រទេសថៃក្នុងរដូវកាលចូលឆ្នាំនេះ។ ល្បែងជះទឹកនិងប៉ាតម្សៅជាល្បែងដែលពេញនិយមបំផុត ហើយនៅតាមផ្លូវភ្ងៀវបរទេសអាចចូលរួមលេងកម្សាន្តបានផងដែរ។ ប៉ុន្តែយ៉ាងណាក៏ដោយជារៀងរាល់ឆ្នាំ គ្រោះថ្នាក់ចរាចរណ៍ក៏កើតមានឡើងច្រើនផងដែរដោយសារការលេងជះទឹកនេះផងដែរ៕
© រក្សាសិទ្ធិដោយ thmeythmey.com
