អន្តរជាតិ
ក្រុមយុវជនបិទមុខអ៊ុយក្រែនរុះទម្លាក់រូបចម្លាក់សម័យកុម្មុយនិស្ត បញ្ឆេះកំហឹងរុស្ស៊ី ![](https://image.thmeythmey.com/pictures/2015/04/12/1104-statue-lenin-slavyansk.jpg)
×![]()
យប់ថ្ងៃសុក្រចូលព្រឹកថ្ងៃសៅរ៍ម្សិលមិញ នៅក្រុងKharkiv ភាគខាងកើតអ៊ុយក្រែន យុវជនបិទមុខមួយក្រុមបាននាំគ្នាទៅរុះទំលាក់រូបចម្លាក់សម័យសូវៀតចំនួន៣ ដឹកដាក់ឡានកាំម្ញ៉ុងទៅបាត់។ ហេតុការណ៍នេះបានកើតឡើង មួយថ្ងៃប៉ុណ្ណោះក្រោយអ៊ុយក្រែនអនុម័តច្បាប់ប្រឆាំងនិមិត្តរូបកុម្មុនិស្តនិងណាហ្ស៊ី។
នៅក្រុងKharkiv ភាគខាងកើត ក្រុមយុវជនបិទមុខមួយក្រុមបានយកខ្សែដែលភ្ជាប់ជាមួយឡានកាំម្ញ៉ុង ទៅទាក់ករូបចម្លាក់សម័យសូវៀត ហើយប្រើឡានកាំម្ញ៉ុងទម្លាក់ចុះមកដី។ ពេលពួកគេកំពុងរុះទំលាក់រូបចម្លាក់មួយចេញ ក៏មានប៉ូលិសអ៊ុយក្រែននៅឈរមើលដែរ តែប៉ូលិសមិនបានអន្តរាគមន៍ឡើយ។ លោក Guennadi Kernesជាចៅហ្វាយក្រុងគាំទ្ររុស្ស៊ីបានរិះគន់ភាពអសកម្មរបស់ប៉ូលិសនៅចំពោះមុខការបំផ្លិចបំផ្លាញទាំងនេះ។ ក្រុមប្រឆាំងអ៊ុយក្រែនវិញបានចោទរដ្ឋាភិបាលដែលលំអៀងទៅរកសហភាពអឺរ៉ុប ថាចង់បំផ្លាញប្រវត្តិសាស្ត្រ ប្រពៃណី រឺក៏និមិត្តរូបនៃភាពចងចាំក្នុងស្រុក។
ហេតុការណ៍រុះរើបំផ្លាញរូបចម្លាក់ទាំងនេះ បានកើតឡើងមួយថ្ងៃប៉ុណ្ណោះ ក្រោយពេលអ៊ុយក្រែនបានអនុម័តច្បាប់ហាមឃាត់រាល់និមិត្តរូបតំណាងសម័យកុម្មុយនិស្តសហភាពសូវៀត និងណាហ្ស៊ី ក្នុងទឹកដីអ៊ុយក្រែន។ ច្បាប់នេះត្រូវឆ្លងកាត់ការសម្រេចពីប្រធានាធិបតីប៉ូរ៉ូឆិនកូមួយដំណាក់កាលទៀត ទើបអាចប្រើបាន។ ច្បាប់មួយនេះចង់រុះរើចោលនូវរូបសំណាកនានារបស់លោកឡេនីន។
ទីកន្លែងមួយចំនួនដូចជាផ្លូវ រឺសហគ្រាស ដែលមានឈ្មោះបែបកុម្មុយនិស្ត ក៏ត្រូវតែប្តូរឈ្មោះចេញដែរ។ ច្បាប់នេះចែងដែរថា ជនដែលហ៊ានច្រៀងបទគោរពទង់ជាតិរុស្ស៊ីរបស់លោកពូទីន ក្នុងទឹកដីអ៊ុយក្រែន នឹងត្រូវទទួលទោសជាប់ពន្ធនាគារ។
កាលពីថ្ងៃសុក្រ នៅក្រុងអូដេសា ភាគខាងត្បូង ដែលសំបូរប្រជាជននិយាយភាសារុស្ស៊ី ប្រធានាធិបតីអ៊ុយក្រែន ពេត្រូ ប៉ូរ៉ូឆិនកូ បានថ្លែងសន្ទរកថាប្រៀបធៀបសកម្មភាពរដ្ឋាភិបាលលោកពូទីនទៅនឹងសកម្មភាពពួកណាហ្ស៊ីរបស់អ៊ីត្លែរ។ មើលទៅ ភ្លើងកំហឹងរវាងរដ្ឋាភិបាលអ៊ុយក្រែនជាមួយក្រុមបះបោរភាគខាងកើត និងរដ្ឋាភិបាលរុស្ស៊ីកាន់តែឆាបឆេះសន្ធោរសន្ធៅ ពិបាករកទឹកពន្លត់បានទៀតហើយ៕
© រក្សាសិទ្ធិដោយ thmeythmey.com