ជាតិ
នយោបាយជាតិ
វប្បធម៌សន្ទនា៖CPPបើកឲ្យCNRPរិះគន់ក្នុងន័យស្ថាបនា តែកុំឲ្យតែជេរប្រមាថ ![](https://image.thmeythmey.com/pictures/2015/05/07/vorun_sovann.jpg)
×![]()
លោក ឈឹម ផលវរុណ អ្នកនាំពាក្យគណបក្សប្រជាជនកម្ពុជា មានប្រសាសន៍ថា គណបក្សរបស់លោក នៅតែបើកទូលាយឲ្យគណបក្សសង្គ្រោះជាតិ រិះគន់នូវចំណុចខ្វះខាតរបស់រដ្ឋាភិបាល ក្នុងន័យ ស្ថាបនា ក្នុងការអភិវឌ្ឍន៍ប្រទេសជាតិ ប៉ុន្ដែការរិះគន់នោះមិនត្រូវមានការជេរប្រមាថនោះទេ។ គណបក្សប្រជាជនកម្ពុជា បានចេញលិខិតទៅកាន់ថា្នក់មូលដ្ឋានគ្រប់លំដាប់ថ្នាក់របស់ខ្លួន ឲ្យតាមដានស្ដាប់ និងកត់ត្រាឲ្យបានច្បាស់នូវការបំពាន ដោយជេរប្រមាថមកលើគណបក្សប្រជាជនកម្ពុជា ពីសំណាក់ថ្នាក់ដឹកនាំគណបក្សសង្គ្រោះជាតិ។ ទាក់ទងនឹងបញ្ហានេះ លោក យឹម សុវណ្ណ អ្នកនាំពាក្យគណបក្សសង្គ្រោះជាតិ គាំទ្រចំពោះយន្ដការរបស់គណបក្សប្រជាជននេះ។ លោកថា គណបក្សរបស់លោក នឹងអប់រំដល់ថ្នាក់មូលដ្ឋានរបស់ខ្លួន ដោយពង្រឹងក្រមសីលធម៌ និងគោរពវប្បធម៌សន្ទនា។
«មិនមែនមិនឲ្យគណបក្សសង្គ្រោះជាតិរិះគន់ ទិតៀនរដ្ឋាភិបាលទេ តែការរិះគន់នោះក្នុងន័យស្ថាបនា ក្នុងន័យប្រទេសប្រជាធិបតេយ្យ ហើយការរិះគន់ត្រូវមានមូលដ្ឋានច្បាស់លាស់ មិនមែនរិះគន់ដើម្បីវាយប្រហារ ឬដោយជេរប្រមាថរដ្ឋាភិបាលទេ»។ នេះជាការបញ្ជាក់របស់លោក ឈឹម ផលវរុណ អ្នកនាំពាក្យគណបក្សប្រជាជន ដែលកំពុងតែពន្យល់ពីបន្ថែមពីអត្ថន័យក្នុងការហាមមិនឲ្យគណបក្សសង្គ្រោះជាតិជេរប្រមាថមកលើគណបក្សប្រជាជន។
ថ្លែងប្រាប់សារព័ត៌មានថ្មីៗនៅថ្ងៃព្រហស្បតិ៍នេះ លោក ឈឹម ផលវរុណ បញ្ជាក់ថា គណបក្សសង្គ្រោះជាតិ គឺជាដៃគូរនយោបាយក្នុងការសន្ទនាជាមួយរដ្ឋាភិបាល និងជាកញ្ចក់សម្រាប់ឆ្លុះ រដ្ឋាភិបាល ដូច្នេះគណបក្សសង្គ្រោះជាតិនៅតែអាចរិះគន់រាល់ចំណុចខ្វះខាតរបស់រដ្ឋាភិបាល ក្នុងស្ថាបនាអភិវឌ្ឍប្រទេស«គណបក្សសង្គ្រោះជាតិគឺជាគណបក្សក្រៅរដ្ឋាភិបាល ហើយក៏ជាដៃគូរសន្ទនា និងជាកញ្ចុះឆ្លុះដល់រដ្ឋាភិបាល។ ហើយគណបក្សសង្គ្រោះជាតិអាចរិះគន់ឲ្យយល់ពីដំណោះស្រាយ ឲ្យយល់ចំណុចនៃការយល់ឃើញខុសគ្នា ដើម្បីស្ថាបនា ដោះស្រាយជាមួយគ្នា។ តែហាមការរិះគន់ដោយញុះញង់ វាយប្រហារ ជេរប្រមាថ (អាក្បាលយួន អាយ៉ង់យួន) គ្មានមូលដ្ឋាន»។ នេះជាការបញ្ជាក់រសប់លោក ឈឹម ផលវរុណ។
ដោយឡែកលោក រស់ រ៉ាវុធ សាស្ត្រាចារ្យនយោបាយ យល់ឃើញថា វប្បធម៌សន្ទនាដែលអ្នកនយោបាយកំពុងអនុវត្ត តែមិនឲ្យមានការរិះគន់បែបជេរប្រមាថនេះ គឺដោយសារតែអ្នកនយោបាយ ចង់កាត់បន្ថយអំពើហិង្សានានាក្នុងសង្គម និងការពង្រឹងក្រមសីលធម៌របស់អ្នកនយោបាយ។ ហើយការមិនឲ្យជេរប្រមាថនេះមិនមែនបិទសិទ្ធិប្រជាពលរដ្ឋ ឬគណបក្សប្រឆាំងក្នុងរិះគន់ទិតៀនចំណុចខ្វះខាតរដ្ឋាភិបាលទេ។
លោកសាស្ត្រាចារ្យរូបនេះពន្យល់យ៉ាងដូច្នេះថា៖«វប្បធម៌សន្ទនាគឺសន្ទនារកឃើញចំណុចជាប់គាំង។តែមិនមែនមិនឲ្យទិតៀនទេ។ ព្រោះបើអ្នកនយោបាយបិទសិទ្ធិរាល់ការរិះគន់ ទិតៀន បំពេញបន្ថែមចំណុចខ្វះខាត កែលំអខ្លួននោះ អ្នកនយោបាយដូចជាបិទផ្លូវប្រជាធិបតេយ្យខ្លួនឯង»។
គណបក្សប្រជាជនកម្ពុជា បានចេញលិខិតទៅកាន់ថា្នក់មូលដ្ឋានគ្រប់លំដាប់ថ្នាក់របស់ខ្លួន ឲ្យតាមដានស្ដាប់ និងកត់ត្រាឲ្យបានច្បាស់នូវការបំពាន ដោយជេរប្រមាថមកលើគណបក្សប្រជាជន ពីសំណាក់ថ្នាក់ដឹកនាំគណបក្សសង្គ្រោះជាតិ ជាពិសេសលោក កឹម សុខា។
ទាក់ទងនឹងបញ្ហានេះ លោក យឹម សុវណ្ណ អ្នកនាំពាក្យគណបក្សសង្គ្រោះជាតិ គាំទ្រចំពោះយន្ដការរបស់គណបក្សប្រជាជននេះ។ លោកថា គណបក្សរបស់លោក នឹងអប់រំដល់ថ្នាក់មូលដ្ឋានរបស់ខ្លួន ដោយពង្រឹងក្រមសីលធម៌ និងគោរពវប្បធម៌សន្ទនា«ធម្មតាអ្នកនយោបាតែងតែមានការរិះគន់ដើម្បីផលប្រយោជន៍ជាតិ តែចាប់ពីនេះទៅយើងគួរតែដោះស្រាយ ពាក្យណាគួរនិយាយ ពាក្យណាមិនគួរនិយាយ។ យើងគួរតែចៀសវាង ការជេរប្រមាថ ការគំរាមកំហែងគ្នា ។ ហើយយើងនឹងជំរុញឲ្យមានគោរពវប្បធម៌សន្ទនា។ យើងតែងតែអប់រំដល់ថ្នាក់មូលដ្ឋាន ក្នុងការអនុវត្តក្រមសីលធម៌ខ្លួន ហើយនឹងបើកកិច្ចប្រជុំពន្យល់ពីក្រមសីលធម៌អ្នកនយោបាយយកពិភាក្សាគ្នា»។ នេះជាការអះអាងរបស់លោក យឹម សុវណ្ណ។
កន្លងមកលោកនាយករដ្ឋមន្ត្រី ហ៊ុន សែន ក៏ធ្លាប់បានប្រមានបោះឆ្នោតទម្លាក់លោក កឹម សុខា ចេញពីតំណែងអនុប្រធានទី១ នៃរដ្ឋសភាផងដែរ បើសិនជាលោក កឹម សុខា នៅតែបន្ដការជេរប្រមាថមកលើរដ្ឋាភិបាលរបស់លោក៕
© រក្សាសិទ្ធិដោយ thmeythmey.com