ជាតិ
កម្ពុជា៖ អាស៊ានមិនមែនស្ថាប័នដោះស្រាយជម្លោះសមុទ្រចិនខាងត្បូង ![](https://image.thmeythmey.com/pictures/2015/05/08/asean-summit-opening.jpg)
×![]()
ម្សិលមិញនេះកម្ពុជាបានផ្ញើរសារទៅកាន់បណ្តាប្រទេសនានាសារជាថ្មីថា អាស៊ានមិនគួរពាក់ព័ន្ធក្នុងការដោះស្រាយជម្លោះសមុទ្រចិនខាងត្បូងរវាងចិន និងបណ្តាភាគីជម្លោះជាសមាជិកអាស៊ានឡើយ។ កម្ពុជាបានកោះហៅតំណាងទូតបរទេសទាំង ២៨ ប្រចាំកម្ពុជា ដោយប្រាប់ពីជំហរកម្ពុជាក្នុងជម្លោះដែនទឹកដ៏រ៉ាំរ៉ៃសមុទ្រចិនខាងត្បូងនេះ។ សម្រាប់កម្ពុជា ភាគីជម្លោះនីមួយៗគួរដោះស្រាយដាច់ដោយឡែកជាមួយមហាយក្សចិន មិនមែនយកអាស៊ានទាំងមូលទៅដោះស្រាយទេ។
មិនមែនជារឿងធម្មតាឡើយនៅពេលដែលកម្ពុជាក្នុងនាមជារដ្ឋមិនជាប់ពាក់ព័ន្ធជម្លោះសមុទ្រចិនខាត្បូងសោះ បានចេញមុខបញ្ជាក់ថា ជម្លោះសមុទ្រចិនខាងត្បូងមិនគួរដោះស្រាយតាមរយៈអាស៊ាននោះ។ យោងតាមទីភ្នាក់ងារព័ត៌មានReuters កម្ពុជាបានសង្កត់ធ្ងន់ថា ភាគីជម្លោះនីមួយៗគួរតែដោះស្រាយបញ្ហានេះជាមួយចិនដោយផ្ទាល់វិញទើបប្រសើរ។ រដ្ឋលេខាធិការក្រសួងការបរទេសកម្ពុជាលោកស្រីសឿង រដ្ឋចាវី បានថ្លែងប្រាប់អ្នកកាសែតនៅក្រោយជំនួបរវាងប្រមុខការទូតកម្ពុជានិងប្រធានបេសកម្មការទូតទាំងអស់ថា អាស៊ានមិនអាចដោះស្រាយជម្លោះដែនទឹកនេះបានឡើយ។ លោកស្រីបានបន្ថែមទៀតថា អាស៊ានមិនមែនជាស្ថាប័នយុត្តាធិការទេ ដូច្នេះមានតែតុលាការដែលអាចដោះស្រាយបញ្ហានេះនិងសម្រេចថាតើអ្នកណាត្រូវអ្នកណាខុស។
តាមពិតទៅកម្ពុជាធ្លាប់លើកឡើងពីការដោះស្រាយជម្លោះនេះជាច្រើនលើកច្រើនសាររួចមកហើយ ដោយកម្ពុជាមិនដែលគាំទ្រការដោះស្រាយជម្លោះដោយប្រើអាស៊ានជារួមទៅដោះស្រាយជាមួយចិនរឿងសមុទ្រចិនខាងត្បូងឡើយ។ សូមទាញការចាប់អារម្មណ៍បន្តិចផងដែរថា កាលពីប៉ុន្មានសប្តាហ៍មុនប្រមុខរាជរដ្ឋាភិបាលកម្ពុជាលោក ហ៊ុន សែន ក៏បានមានប្រសាសន៍ដូចគ្នានិងការលើកឡើងរបស់មន្ត្រីក្រសួងការបរទេសកម្ពុជាខាងលើដែរ។
ចិនចង់ដោះស្រាយតាមវិធីណា ដែលចិនអាចមានប្រៀបជាងភាគីជម្លោះ មិនមែនដោះស្រាយតាមរយៈអាស៊ានជារួម។ ក្រុងប៉េកាំងនេះក៏មិនចង់អោយយករឿងជម្លោះនេះទៅដោះស្រាយនៅតុលាការអន្តរជាតិនោះដែរ។ អ្វីដែលចិនចង់បានគឺដោះស្រាយទ្វេភាគីជាមួយភាគីជម្លោះនីមួយ។ គួររំលឹកបន្តិចដែល កាលពីឆ្នាំមុន ហ្វីលីពីនបានសម្រេចបញ្ជូនសំណុំរឿងសមុទ្រចិនខាងត្បូងទៅកាន់មជ្ឈត្តការអន្តរជាតិក្រុងឡាអេ តែចិនខឹងសម្បារជាខ្លាំង និងចោទប្រកាន់ហ្វីលីពីនថាកំពុងព្យាយាមបង្ករឿងថែមទៀតផង។
យ៉ាងណាក៏ដោយប្រទេសជាភាគីជម្លោះពីរដែលជាសមាជិកអាស៊ានផងនោះមានហ្វីលីពីន និងវៀតណាម សុទ្ធតែចង់អោយមានការរួមគ្នាក្នុងចំណោមប្រទេសទាំង ១០ដើម្បីតតាំងជាមួយក្រុងប៉េកាំង។ ទាំងវៀតណាម ទាំងហ្វីលីពីនធ្លាប់បន្ទោសកម្ពុជាកាលពីឆ្នាំ២០១២ ដោយសារកម្ពុជាក្នុងនាមជាប្រធានអាស៊ានមិនអាចចេញសេចក្តីថ្លែងការណ៍រួមរដ្ឋមន្ត្រីការបរទេសអាស៊ានបាន ដោយសាររឿងសមុទ្រចិនខាងត្បូងក្រោយកិច្ចប្រជុំ។ កម្ពុជាមានចំណងមិត្តភាពស្អិតល្មួតជាមួយក្រុងប៉េកាំង ដែលបច្ចុប្បន្ននេះកម្ពុជាក្លាយជាដៃគូយុទ្ធសាស្ត្រគ្រប់ជ្រុងជ្រោយរបស់ក្រុងប៉េកាំងរួចទៅហើយ។ ចំណែកចិនឯណោះវិញក្នុងនាមជាដៃគូយុទ្ធសាស្ត្រគ្រប់ជ្រុងជ្រោយរបស់កម្ពុជា បានផ្តល់ជំនួយសេដ្ឋកិច្ចផង យោធាផងដល់កម្ពុជាឥតដាច់។ ដោយសារតែភាពល្អូកល្អឺនរវាងកម្ពុជានិងចិននេះហើយ អ្នកវិភាគសន្និដ្ឋានថា ចិននឹងប្រើប្រាស់កម្ពុជាដើម្បីបង្កើតសម្លេងប្រឆាំងក្នុងកិច្ចប្រជុំអាស៊ាន ដោយមិនអាចអោយសមាជិកអាស៊ានរកសម្លេងឯកច្ឆ័នដើម្បីសម្រេចបញ្ហាអ្វីដែលប៉ះពាលដល់ប្រយោជន៍ក្រុងប៉េកាំងបានឡើយ៕
© រក្សាសិទ្ធិដោយ thmeythmey.com