អន្តរជាតិ
នយោបាយអន្តរជាតិ
×![]()
×![]()
ស្ថានភាពនៅក្នុងឧបទ្វីបកូរ៉េ បានត្រលប់ទៅរកភាពស្ងប់ស្ងាត់មួយរយៈ ក្រោយពីកូរ៉េខាងត្បូង និង សម្ពន្ធ័មិត្តរបស់អាមេរិក បញ្ចប់សមយុទ្ធយោធាប្រចាំឆ្នាំរួមគ្នា។ យ៉ាងណាមិញ ភាពតានតឹងចាប់ផ្តើមសារជាថ្មី បន្ទាប់ពីរដ្ឋាភិបាលកូរ៉េខាងជើង បានព្រមានបាញ់ប្រហារ កម្ទេចនាវាកូរ៉េខាងត្បូងគ្រប់ពេលវេលា ប្រសិននាវាកូរ៉េខាងត្បូងហ៊ានចូលដែនអធិបតេយ្យរបស់ខ្លួន ។
លោក មុំ ពិទូ លម្អិតព័ត៌មាននេះ
រដ្ឋាភិបាលក្រុងព្យុងយ៉ាងបានព្រមាន ថានឹងកម្ទេចនាវាចម្បាំងរបស់កូរ៉េខាងត្បូង ប្រសិនបើនាវាទាំងនោះនៅតែបន្តឆ្លងកាត់ហួសតំបន់ព្រំដែនសមុទ្ររវាងប្រទេសទាំងពីរ។ ការគំរាមនេះ កើតឡើងជាលើកទី២ លើកទីមួយកើតឡើងនៅដើមឆ្នាំ២០១៥ បន្ទាប់ពីមានការប្រកាសសង្គ្រាមជាមួយអាមេរិក ក្នុងអំឡុងពេលសមយុទ្ធយោធាប្រចាំឆ្នាំរវាងកូរ៉េខាងត្បូង និង អាមេរិក។
បើយោងតាមការចុះផ្សាយរបស់ភា្នក់ងារពត៌មាន KCNA ចាប់ពីមានការព្រមាននេះតទៅ រដ្ឋាភិបាលកូរ៉េខាងជើង នឹងបាញ់កម្ទេចនាវាដោយមិនប្រកាសជាមុនឡើយ ហើយនាវានោះសំដៅលើនាវាកូរ៉េខាងត្បូង និង អាមេរិក ដែលបានបំពានព្រំដែនសមុទ្រភាគខាងលិចរបស់ខ្លួន។
ឆ្លើយតបនឹងការព្រមាននេះដែរ មន្ត្រីយោធារបស់កូរ៉េខាងត្បូងបានបញ្ជាក់ថា ចាប់ពី សង្គ្រាមបានបញ្ចប់ កូរ៉េខាងត្បូងមិនដែលឆ្លងកាត់តំបន់ព្រំដែននោះទេ។ បន្ថែមពីនេះ លោកបានចាត់ទុកការគំរាមរបស់កូរ៉េខាងជើង ថាជាសកម្មភាពភ្លីភ្លើ។ លោកបានបញ្ជាក់ថា ពេលខ្លះកូរ៉េខាងត្បូង បានទៅក្បែរតំបន់ព្រំដែននោះដែរ តែដើម្បីបញ្ឈប់ទូកនេសាទខុសច្បាប់របស់ចិនប៉ុណ្ណោះ។
សូមបញ្ជាក់ថាបន្តិចថា ក្រោយពីបញ្ចប់សង្គ្រាម ឆ្នាំ១៩៥០-១៩៥៣ ឧបទ្វីបកូរ៉េត្រូវបានបែងចែកជាពីរ ពោលគឺកូរ៉េខាងត្បូង និង កូរ៉េខាងជើង។ យ៉ាងណាក៏ដោយ ដោយសារភាពមិនច្បាស់លាស់ ក្នុងបែងចែកដែន អធិបតេយ្យ ជាពិសេសលើដែនសមុទ្រភាគជើង បានធ្វើឲ្យភាពតានតឹងនៅតែបន្តនៅក្នុងដែន សមុទ្ររវាងប្រទេសទាំងពីរ។
អ្វីដែលគួរកត់សម្គាល់នោះ ភាពមិនច្បាស់លាស់លើការកំណត់ដែនសមុទ្រនេះ បានធ្វើឲ្យ មានការប៉ះទង្គិចគ្នាជាច្រើនលើកច្រើនសារមកហើយរវាងប្រទេសទាំងពីរ។ ក្នុងនោះរួមមាន ឧបទ្ទវហេតុ នៃការបើកបុកគ្នារវាងកងកម្លាំងទាហានល្បាតប្រទេសទាំងពីរ ក្នុងអំឡុងឆ្នាំ ១៩៩៩ និង ២០០០ ដែលបានបណ្តាលឲ្យទាហានទាំងសងខាងបានស្លាប់៕
© រក្សាសិទ្ធិដោយ thmeythmey.com
