អន្តរជាតិ
នយោបាយអន្តរជាតិ
រុស្ស៊ី៖ លោក ស៊ីជីនពីងក្លាយភ្ងៀវសំខាន់បំផុតក្នុងខួបជ័យជម្នះសង្គ្រាមលោកលើកទី២
×
រុស្ស៊ីរៀបចំខួបលើកទី៧០ ដើម្បីរំលឹកពីជ័យជម្នះលើកងទ័ពណាស៊ីអាឡឺម៉ង់ក្នុងសម័យសង្គ្រាមលោកលើកទី២ នៅថ្ងៃទី០៩ នេះ។ ក្នុងកម្មវិធីនេះនឹងមានវត្តមានមេដឹកនាំមេដឹកនាំប្រទេសជាច្រើនដែលមានចំណងមិត្តភាពជិតស្និទ្ធជាមួយក្រុងម៉ូស្គូ។ ប៉ុន្តែភ្ងៀវដែលមានឥទ្ធិពលនិងសំខាន់បំផុតសម្រាប់រុស្ស៊ីលើកនេះគឺសមភាគីចិន លោក ស៊ីជីនពីង ដ្បិតកម្មវិធីលើកនេះគ្មានវត្តមានមេដឹកនាំប្រទសលោកខាងលិចឡើយ។
ថ្ងៃសៅរ៍នេះរុស្ស៊ីរៀបចំកម្មវិធីខួបលើកទី៧០ រំលឹកពីជ័យជម្នះលើកងទ័ពណាស៊ីអាឡឺម៉ង់ និងបិទបញ្ចប់សង្គ្រាមលោកលើកទី។ ក្នុងកម្មវិធីនេះ គេសង្កេតឃើញមានវត្តមានប្រធានាធិបតីចិន លោក ស៊ី ជីនពីង ប៉ុន្តែមិនមានវត្តមានមេដឹកនាំប្រទេសមហាអំណាចលោកខាងលិចទេ។ វេទិកាដែលគ្មានលោកខាងលិចនេះ បានធ្វើឲ្យប្រមុខរដ្ឋចិន ក្លាយជាមនុស្សពិសេស និងមានឥទ្ធិពលបំផុតម្នាក់ ហើយទស្សនកិច្ចរបស់លោក ស៊ី ជីងពីងទៅកាន់រុស្ស៊ីដើម្បីចូលរួមក្នុងកម្មវីធីនេះក៏បញ្ជាក់យ៉ាងច្បាស់ពីចំណងមិត្តភាពស្អិតល្មួតរបស់ប្រទេសទាំងពីរដែរ។
ប្រធានាធិបតីចិនបានអញ្ជើញទៅដល់រុស្ស៊ីកាលពិម្សិលមិញនេះ ដោយលោកបានជួបពិភាក្សាជាលក្ខណៈទ្វេភាគីផងជាមួយប្រធានាធិបតីរុស្ស៊ី វ្ល៉ាឌីមៀ ពូទីន ហើយមេដឹកនាំទាំងពីរក៏បានចុះហត្ថលេខាលើកិច្ចព្រមព្រៀងសេដ្ឋកិច្ចមួយចំនួនផង។ ចំណងមិត្តភាពរវាងក្រុងប៉េកាំងនិងក្រុងម៉ូស្គូកាន់តែល្អូកល្អឺនខ្លាំងក្រោយពេលដែលលោកខាងលិចព្យាយាមធ្វើឲ្យរុស្ស៊ីឯកោរ និងដាក់ទណ្ឌកម្មច្រើនជំហានប្រឆាំងរុស្ស៊ី ក្រោយផ្ទុះឡើងវិបត្តិនៅអ៊ុយក្រែន។
ដោយឡែក ថ្ងៃជ័យជម្នះនិងបញ្ចប់សង្គ្រាមលោកលើកទី២នេះ សំខាន់សម្រាប់ក្រុងប៉េកាំង និងក្រុងម៉ូស្គូ ដោយភាគីទាំងអះអាងអាងប្រជាជននៃប្រទេសទាំងពីរឈឺចាប់និងរងទុក្ខវេទនាជាខ្លាំងព្រោះតែឥទ្ធិពលនៃសង្គ្រាមនេះ។ លោក ស៊ីជីនពីង បានអញ្ជើញលោក ពូទីន ដោយផ្ទាល់រួចរាល់ហើយដើម្បីឲ្យប្រមុខរដ្ឋរុស្ស៊ីនេះទៅទស្សនកិច្ចនិងចូលរួមក្នុងកម្មវិធីរំលឹកពីជ័យជម្នះរបស់ក្រុងប៉េកាំងក្នុងសង្គ្រាមលោកលើកទី២ នៅថ្ងៃ ០៣ ខែកញ្ញាខាងមុខផងដែរ។
ក្រោយបញ្ចប់កម្មវិធីនៅក្រុងម៉ូស្គូ កងទ័ពជើងទឹកចិន និងរុស្ស៊ីនឹងចាប់ផ្តើមលំហាត់យោធារួមគ្នាមួយនៅក្នុងសមុទ្រម៉េឌីទែរ៉ាណេ ដើម្បីពង្រឹងកិច្ចសហប្រតិបត្តិការសន្តិសុខរវាងប្រទេសទាំងពីរ និងជាសារមួយផ្ញើរទៅកាន់ប្រទេសលោកខាងលិចផង។ រុស្ស៊ី ចាប់ដៃចិន ដើម្បីបញ្ចេញសាច់ដុំយោធាដាក់ លោកខាងលិច។ ចាប់តាំងពីរុស្ស៊ីក្រសោបយកទឹកដី Crimea ពីអ៊ុយក្រែន សមាជិកបក្សសម្ព័ន្ធយោធាណាតូ ក្រោមការដឹកនាំរបស់ក្រុងវ៉ាស៊ីនតោន ចាប់ផ្តើមកសាងកម្លាំងទ័ពនៅអឺរ៉ុបខាងកើត និងរៀបចំសមយុទ្ធយោធាបន្តបន្ទាប់គ្នានៅក្បែរព្រំដែនរុស្ស៊ីថែមទៀតផង។
តាមពិតទៅ រដ្ឋាភិបាលក្រុងម៉ូស្គូ មុនប្រារព្ធពិធីនេះឡើយបានះអញ្ជើញមេដឹកនាំជាច្រើននាក់មកចូលរួម ក្នុងនោះមានទាំងប្រមុខរដ្ឋកូរ៉េខាងជើង គីម ជុងអ៊ុនផង។ ប៉ុន្តែខួបរំលឹកជ័យជម្នះសង្គ្រាមលោកលើកទី២លើកទី៧០លើកនេះ ខុសប្លែកពីលើកមុនៗ មេដឹកនាំលោកខាងលិច ដូចជាប្រធានាធិបតីអាមេរិក អធិការបតីអាឡឺម៉ង់ ប្រធានាធិបតីបារាំងជាដើមមិនមានវត្តមាននៅក្នុងកម្មវិធីនៅក្រុងម៉ូស្គូឡើយ ដោយសារពួកគេអន់ចិត្តនឹងលោកពូទីនរឿងលូកលាន់បញ្ហាអ៊ុយក្រែន។ ហើយម្យ៉ាងបណ្តារដ្ឋនៅអឺរ៉ុបបានសម្រេចរៀបចំខួបរំលឹកជ័យជម្នះសង្គ្រាមលោកលើកទី២តាំងពីម្សិលមិញ ពោលគឺមួយថ្ងៃមុនរុស្ស៊ី៕
© រក្សាសិទ្ធិដោយ thmeythmey.com