អន្តរជាតិ
នយោបាយអន្តរជាតិ
×![]()
រដ្ឋាភិបាលក្រុងម៉ានីល ប្រកាសអាសន្នដោយបញ្ជាក់ថាតំបន់ជម្លោះសមុទ្រចិនខាងត្បូងកំពុងស្ថិតនៅក្នងសភាពនៃការប្រឈមមុខគ្នាកាន់តែខ្លាំង។ សេចក្តីប្រកាសនេះ ធ្វើឡើងក្រោយពីកងទ័ពល្បាតជើងទឹកចិនបានព្យាយាមប្រជែងកងទ័ពហ្វីលីពីនយកកន្លែងចុះចតយន្តហោះល្បាតហ្វីលីពីន និង បណ្តេញកងទ័ពអាកាសហ្វីលីពីនឲ្យចេញពីកោះស្ព្រាតលី។
លោក ជាវ សំណាង លម្អិតព័ត៌មាននេះ
**audio2**
ក្រោយពីមានការប្រជែងគ្នារវាងទ័ពល្បាតរបស់ចិន និង យន្តហោះហ្វីលីពីននៅកន្លែងចុះចត លើកោះ Pagasa ម្សិលមិញនេះ រដ្ឋាភិបាលក្រុងម៉ានីល បានប្រកាសអាសន្នជុំវិញការប្រឈម មុខគ្នានេះ ដែលហ្វីលីពីនចាត់ទុកថា វាកំពុងរាលដាលដល់ដំណាក់កាលមួយដ៏គ្រោះថ្នាក់។ ការប្រជែងគ្នានេះ បានផ្ទុះឡើង ក្រោយមានការវាយប្រហារគ្នា តាមរយៈការចេញសេចក្តីថ្លែងការណ៍ថ្កោលទោសការបំពានលើតំបន់ជម្លោះទៅវិញទៅមក រវាងរដ្ឋាភិបាលក្រុងប៉េកាំង និង រដ្ឋាភិបាលក្រុងម៉ានីល ។
លោក Alexander Lopez នាយទាហានជើងទឹកហ្វីលីពីន បានឲ្យដឹងថា យន្តហោះល្បាតរបស់ហ្វីលីពីនចំនួន៧ បានរងនូវការព្រមានពីកងទាហានល្បាតជើងទឹករបស់ចិន នៅលើកោះ Pagasa ជាកន្លែងដែលកងទ័ពអាកាសហ្វីលីពីនចុះចតកាលពីកន្លងមក។ លោកបន្ថែម ទៀតថា ការប្រឈមមុខគ្នានេះ បានចាប់ផ្តើមតាំងពីពាក់កណ្តាលខែមេសាមកម្ល៉េះ។
មូលហេតុនៃការប្រកាសឲ្យចេញពីតំបន់ជម្លោះនេះ ដោយសារកងទាហានល្បាតចិន បានចាត់ទុកកងទាហានអាកាសរបស់ហ្វីលីពីន ថាជាជនបរទេស និងបានរំលោភចូលអធិតេយ្យរបស់ខ្លួន ហើយបានបញ្ជាឲ្យកងទ័ពទាំងនោះចេញពីតំបន់នោះ ដើម្បីបញ្ជៀសនូវការប្រឈមមុខដាក់គ្នាកាន់តែធ្ងន់ធ្ងរ និង ការយល់ច្រលំដោយប្រការណាមួយ។
ឆ្លើយតបជាមួយនឹងការបណ្តេញរបស់កងទាហានល្បាតចិន ហ្វីលីពីនបាន បញ្ជាក់ថាពួកគេមិនបានបំពានទៅលើអធិបតេយ្យចិននោះទេ ពោលគឺការហោះហើររបស់គេ គឺស្ថិតនៅក្នុងលំហអន្តរជាតិ។
គួររម្លឹកផងដែរ នៅក្នុងឱកាសនៃកិច្ចប្រជុំកំពូលអាស៊ានលើទី២៦ រដ្ឋាភិបាលហ្វីលីពីន និង វៀតមណាម ក៏បានលើកឡើងនូវបញ្ហាជម្លោះចិន ដើម្បីឲ្យរដ្ឋាភិបាលសមាជិកអាស៊ាន ចេញសេចក្តីថ្លែងការណ៍ថ្កោលទោសលើសកម្មភាពបំពានរបស់ចិន ដែលបានបំពានលើតំបន់ជម្លោះផងដែរ។ ក៏ប៉ុន្តែ មិនមានមតិឯកច្ឆ័ន គាំទ្រនោះទេ។
ឆ្លើយតបនឹងការចោទប្រកាន់របស់ហ្វីលីពីន និង វៀតណាម រដ្ឋមន្ត្រីការបរទេសចិន បានចេញសេចក្តីថ្លែងការណ៍មួយ ដោយបានទទូចសុំហ្វីលីពីន បញ្ឈប់សកម្មភាពរបស់ខ្លួន លើការគ្រប់គ្រងលើតំបន់ជម្លោះផងដែរ។ បន្ថែមពីនេះ លោករដ្ឋមន្ត្រី ក៏បានបញ្ជាក់ថា ហ្វីលីពីន បានសាងសង់មូលដ្ឋានទ័ព ព្រលានយន្តហោះ និង កំពង់ផែនៅកោះរបស់ខ្លួន ជាច្រើនឆ្នាំ ដែលបានបំពានលើសេចក្តីថ្លែងការណ៍ដែលបានធ្វើតាំងពីឆ្នាំ២០០២ ។ ក៏ប៉ុន្តែ ដើម្បីធានាឲ្យបានសន្តិសុខ និងសន្តិភាពក្នុងតំបន់ ចិនមិនដែលចាត់វិធានការណ៍ណាមួយ ដែលអាក្រក់នៅលើតំបន់ជម្លោះនោះទេ។
គួរបញ្ជាក់ថា ការប្រឈមមុខគ្នា ដែលឈានដល់កម្រិតប្រកាសអាសន្ននេះ គឺដោយសារតែ ការចូលទៅកាន់កាប់តំបន់ជម្លោះ ដែលមិនទាន់បានកំណត់ពីព្រំប្រទល់ច្បាស់លាស់។ យ៉ាងណាក៏ដោយ គេសង្កេតឃើញ នៅក្នុងតំបន់ជម្លោះនេះ រាល់ប្រទេសណាដែលហ៊ានប្រឈមនឹងចិន តែងតែទទួលបានមេរៀនយ៉ាងចាស់ដៃ។ ដូចករណី កាលពីឆ្នាំ២០១៤កន្លងមក កងទាហានល្បាតចិន បានបាញ់ពន្លិចទូកនេសាទរបស់វៀតណាម ដែលចូលនេសាទលើតំបន់ដែលចិនបានចាត់ទុកថា ស្ថិតក្រោមដែនអធិបតេយ្យរបស់ខ្លួន៕
© រក្សាសិទ្ធិដោយ thmeythmey.com
