ជាតិ
នយោបាយជាតិ
មេបក្សកម្ពុជាចាញ់ឆ្នោតបន្តស្ថិតក្នុងតំណែង តែមេបក្សនៅអង់គ្លេសត្រូវចុះចេញពីតំណែង ![](https://image.thmeythmey.com/pictures/2015/05/09/politics.png)
×![]()
ភ្នំពេញ៖ ប្រធានគណបក្សនយោបាយនៅក្នុងប្រទេសកម្ពុជាគ្មានការទទួលខុសត្រូវក្នុងការដឹកនាំបក្សរបស់ខ្លួនទេ។ នៅក្នុងប្រទេសអង់គ្លេស មេគណបក្សប្រឆាំងចំនួនបីរូបបានប្រកាសចាកចេញពីតំណែងភ្លាមៗ និងជាបន្តបន្ទាប់ បន្ទាប់ពីគណបក្សអភិរក្សនិយមប្រកាសឈ្នះឆ្នោតបន្តដឹកនាំប្រទេសមួយអាណត្តិបន្ថែមទៀត។
ក្រោយពីចាញ់ឆ្នោតភ្លាមលោក Ed Miliband ប្រធានគណបក្សការងារប្រកាសលាលែងចេញពីតំណែង ហើយនិយាយទៅកាន់សមាជិករបស់លោកថា៖«លោកសុំទោស លោកមិនអាចប្រជែងយកជ័យជម្នះបានទេ។ នេះគឺជាការខកចិត្ត និងជារាត្រីដ៏អាក្រក់សម្រាប់គណបក្សការងារ»។
លោក Nick Clegg ប្រធានគណបក្សប្រជាធិបតេយ្យសេរីនិយមដែលបានបាត់បង់កៅអីចំនួន៤៩បានប្រកាសលាលែងចេញពីតំណែងដោយលោកនិយាយថា៖«នេះគឺជាការឈឺឆាប់ដ៏ពិតប្រាកដមួយ និងជារាត្រីទណ្ឌកម្មដ៏សាហាវសម្រាប់គណបក្សប្រជាធិបតេយ្យសេរីនិយម»។ លោក Nigel Farage ប្រធានគណបក្សឯករាជ្យអង់គ្លេស ក៏បានប្រកាសលាលែងចេញពីតំណែងដែរ។
ការលាលែងរបស់មេបក្សប្រឆាំងទាំងបីបានធ្វើឡើងកាលពីថ្ងៃទី៨ខែឧសភាម្សិលមិញ បន្ទាប់ពីគណបក្សអភិរក្សនិយមរបស់លោក David Cameron ទទួលជោគជ័យលើការបោះឆ្នោតដោយទទួលបានអាសនៈចំនួន៣៣១ លើ៦៥០កៅអី។
ទាក់ទងនឹងការលាលែងនេះ អ្នកវិភាគសង្គមនយោបាយនៅក្នុងប្រទេសកម្ពុជាចាត់ទុកថា មេដឹកនាំគណបក្សនយោបាយនៅក្នុងប្រទេសអង់គ្លេសបង្ហាញការទទួលខុសត្រូវជាងមេដឹកនាំគណបក្សនយោបាយនៅក្នុងប្រទេសកម្ពុជា។ លោក អ៊ូ វីរៈ អ្នកវិភាគនយោបាយឯករាជ្យនិយាយថា៖«គណបក្សប្រជាជនកម្ពុជាបាត់កៅអីច្រើន ជាធម្មតា លោក ហ៊ុន សែន ត្រូវតែទទួលខុសត្រូវ។ ព្រះអង្គម្ចាស់ នរោត្តម រណឫទ្ធិ រឹតតែមិនត្រូវដឹកនាំគណបក្សហ្វ៊ុនស៊ិនប៉ិចតទៅទៀតឡើយ ពីព្រោះដឹកនាំពីឈ្នះទៅចាញ់ហើយនោះ»។
លោក គល់ បញ្ញា នាយកប្រតិបត្តិអង្គការសង្កេតការណ៍បោះឆ្នោត Comfrel បានអត្ថាធិប្បាយថា មេដឹកនាំបក្សនៅក្នុងប្រទេសអង់គ្លេសមានភាពចាស់ទុំផែ្នកនយោបាយ និងបង្ហាញពីការទទួលខុសត្រូវរបស់ខ្លួនក្នុងនាមជាមេដឹកនាំ។ បើយោងតាមលោក គល់ បញ្ញា មិនចាំបាច់និយាយរឿងចាញ់ឆ្នោតផង សូម្បីតែបាត់បង់ចំនួនកៅអី ក៏មេដឹកនាំពិចារណា ឬសម្រេចចិត្តចុះចេញពីតំណែងទៅហើយនៅក្នុងប្រទេសអង់គ្លេស។ ស្ថានភាពគណបក្សប្រជាជនកម្ពុជាដែលបាត់បង់កៅអី ហើយបើស្ថិតនៅក្នុងប្រទេសអង់គ្លេសវិញ តំណែងមេដឹកនាំក៏ត្រូវបានគេលើកយកមិនពិចារណាដែរ៕
© រក្សាសិទ្ធិដោយ thmeythmey.com