អន្តរជាតិ
នយោបាយអន្តរជាតិ
×![]()
អាជ្ញាធរឥណ្ឌាបានផ្តល់ព័ត៌មាននៅថ្ងៃសៅរ៍ម្សិលមិញថា ក្រុមឧទ្ទាមម៉ៅនិយមបានចូលទៅចាប់មនុស្សសន្ធឹកសន្ធាប់ដល់ទៅ២៥០នាក់ នៅភូមិមួយឈ្មោះថាMorenga ស្ថិតក្នុងរដ្ឋChhattisgarh ភាគកណ្តាលប្រទេស។ ហេតុការណ៍នេះបានកើតឡើងកាលពីល្ងាចថ្ងៃសុក្រ តែប៉ុន្មានម៉ោងប៉ុណ្ណោះ មុនទស្សនកិច្ចរបស់នាយករដ្ឋមន្ត្រីណារិនដ្រា ម៉ូឌី នៅរដ្ឋភាគកណ្តាលនេះ។ ក្រុមឧទ្ទាមជំទាស់នឹងការសាងសង់ស្ពានមួយកន្លែង លើទន្លេ ដោយសារយល់ថា ស្ពាននេះងាយអោយកងទ័ពឥណ្ឌាចូលទៅរកចាប់ក្រុមខ្លួនបានយ៉ាងស្រួល។
ហេតុការណ៍ចាប់ជំរិតអ្នកភូមិ បានកើតឡើងនៅសង្កាត់Sukma ចំងាយតែ៨០គីឡូម៉ែត្រប៉ុណ្ណោះ ពីកន្លែងដែលនាយករដ្ឋមន្ត្រីឥណ្ឌា ត្រូវធ្វើសន្ទរកថា។ តំណាងរាស្ត្រម្នាក់បានប្រាប់ថា ក្រុមឧទ្ទាមបាននាំអ្នកភូមិឆ្លងកាត់ព្រៃ ធ្វើដំណើររហូតដល់ភ្នំតូចមួយនៅជិតនោះ។ មេដឹកនាំរដ្ឋChhattisgarh បានសន្យាធ្វើគ្រប់យ៉ាងដើម្បីទទួលបានការដោះលែងអ្នកភូមិមកវិញ។ អាជ្ញាធរប្រាប់ថា បានបញ្ជូនមនុស្សទៅចរចាជាមួយក្រុមឧទ្ទាមរួចហើយ។
នៅឥណ្ឌា ក្រុមឧទ្ទាមម៉ៅនិយមឧស្សាហ៍ចាប់ជំរិតមនុស្សណាស់។ ប៉ុន្តែ មិនធ្លាប់ចាប់យកមនុស្សសន្ធឹកសន្ធាប់ដូចពេលនេះទេ។ ជាទូទៅ ចំណាប់ខ្មាំងជាច្រើនតែងត្រូវបានដោះលែងមកវិញ។ ក្រុមបះបោរម៉ៅនិយមមានវត្តមានតាមរដ្ឋប្រមាណជាង២។ ពួកគេតស៊ូដើម្បីសិទ្ធិជនជាតិភាគតិច និងប្រជាកសិករដែលគ្មានដីធ្លីនឹងគេ។ មានមនុស្សរាប់ពាន់នាក់បានស្លាប់ ដោយសារការបះបោរ ចាប់ពីឆ្នាំ១៩៦៧មក៕
© រក្សាសិទ្ធិដោយ thmeythmey.com
