សង្គមអន្តរជាតិ
អន្តរជាតិ
គ្មានអ្នកណាអាចទាញក្រិកចេញពីតំបន់ចាយលុយអឺរ៉ូឡើយ
× មេដឹកនាំអឺរ៉ុប មានបារាំង និងអាឡឺម៉ង់កំពុងមរមាញឹកជជែកពិភាក្សាគ្នារកដំណោះស្រាយបញ្ហាបំណុលរបស់ក្រិក។ ប្រធានាធិបតីបារាំង អធិការបតីអាឡឺម៉ង់ ប្រធានគណកម្មការអឺរ៉ុប ប្រធានធនាគារកណ្តាលអឺរ៉ុបនិងនាយិកាមូលនិធិអន្តរជាតិបានជួបពិភាក្សាគ្នានៅប៊ែកឡាំង។គេជឿជាក់ថាការជួយដោះបំណុលក្រិក នឹងអាចជួយក្រិកមិនឲ្យចាកចេញពីតំបន់ចាយលុយអឺរ៉ូ។
រយៈពេលប៉ុន្មានថ្ងៃចុងក្រោយនេះ បញ្ហាក្រិក គ្មានលទ្ធភាពសងលុយម្ចាស់បំណុល បានធ្វើឲ្យសហភាពអឺរ៉ុបឈឺក្បាលវិលមុខកាន់តែខ្លាំង។ ថ្វីត្បិតតែបញ្ហានេះស្មុគ្រស្មាញក៏ដោយចុះ មេដឹកនាំសហភាពអឺរ៉ុបដូចជាបារាំងនិងអាឡឺម៉ង់ផងនោះ កំពុងឆ្ការដៃឆ្ការជើងរកដំណោះស្រាយដើម្បីជួយបន្តក់សាច់ប្រាក់ខ្លះដល់រដ្ឋាភិបាលក្រិកដើម្បីសងបំណុលគេ។
កាលពីថ្ងៃចន្ទកន្លងទៅ ប្រធានាធិបតីបារាំងលោក ហ្វ្រង់ស្វ័រ ហូឡង់ និងលោកស្រីអធិការបតីអាឡឺម៉ង់ អែនជេឡា ម៉ាហ្កែល បានជួបពិភាក្សាគ្នាក្នុងកិច្ចប្រជុំបន្ទាន់មួយហើយកិច្ចប្រជុំនេះមានការចូលរួមពីប្រធានគណកម្មការអឺរ៉ុប និងម្ចាស់បំណុលក្រិកមានប្រធានធនាគារកណ្តាលអឺរ៉ុប និងនាយិការមូលនិធិរូបីយវត្ថុអន្តរជាតិផងដែរ។ ជុំវិញការប្រជុំរកដំណោះស្រាយជួយក្រិកនេះដែររដ្ឋមន្ត្រីក្រសួងសេដ្ឋកិច្ចអាឡឺម៉ង់លោក Sigmar Gabriel បានសង្កត់ធ្ងន់ថា វាជារឿងត្រឹមត្រូវបំផុតដែលមេដឹកនាំអឺរ៉ុបមានបារាំង និងអាឡឺម៉ង់ ចាំបាច់ត្រូវដោះស្រាយបញ្ហាបំណុលក្រិក ព្រោះបើសិនក្រិកក្ស័យធនមិនអាចសងបំណុលគេបាន វាប្រាកដណាស់ថានឹងធ្វើឲ្យប៉ះពាល់យ៉ាងខ្លាំងដល់តំបន់អឺរ៉ូទាំងមូល។
ថ្មីៗនេះ រដ្ឋាភិបាលក្រិកបានបញ្ជូនសេចក្តីព្រាងចំណុចសំខាន់មួយចំនួនជុំវិញការចរចាបង្កើតកិច្ចព្រមព្រៀងដោះស្រាយបំណុលក្រិក ទៅម្ចាស់បំណុលរួចរាល់ហើយ។ យ៉ាងណាក៏ដោយម្ចាស់បំណុលបានបញ្ជាក់ថាចំណុចដែលក្រិកដាក់ចេញមកក្នុងសំណើរចុងក្រោយនេះមិនទាន់គ្រប់គ្រាន់ឡើយ។ ក្រិកនៅមានបញ្ហាច្រើនទៀតដែលត្រូវដោះស្រាយ។
រដ្ឋាភិបាលលោក Alexis Tsiprasចាំបាច់ត្រូវកែទម្រង់ចំណុចសំខាន់មួយចំនួនដែលអឺរ៉ុបចង់បានសិន មុនអឺរ៉ុបទម្លាក់សាច់ប្រាក់ឲ្យដើម្បីដោះស្រាយបំណុល។ បញ្ហាសំខាន់ដែលអឺរ៉ុបទាមទារឲ្យក្រិកកែប្រែ ហើយក្រិកនៅតែប្រឆាំងគោលនយោបាយត្បិតត្បៀត និងបដិសេធកែបទម្រង់បញ្ហាប្រាក់សោធននិវត្តន៍ និងបញ្ហាទីផ្សាកម្លាំងពលកម្មជាដើម។
បញ្ហាសំខាន់ដែលមេដឹកនាំអឺរ៉ុបទាំងនេះចាំបាច់ត្រូវប្រឹងប្រែងដើម្បីជួយក្រិក ដោះស្រាយរឿងសងលុយម្ចាស់បំណុលអន្តរជាតិនេះ គឺដោយសារពួកគេមិនចង់ឲ្យក្រិកដើរចេញពីតំបន់អឺរ៉ូ ឬចេញពីសហភាពអឺរ៉ុបនៅពេលណាមួយខាងមុខ។ បើសិនបើក្រិកគ្មានលុយសងគេ ហើយក្ស័យធន វាច្បាស់ណាស់ថាក្រិកនឹងចាកចេញ។ ម្យ៉ាងប្រទេសមហាអំណាចមួយចំនួនដូចជារុស្ស៊ី និងចិន កំពុងព្យាយាមចែរចូវប្រទេសក្រិកផង និងសន្យាជួយក្រិកប្រសិនបើក្រិកមានបញ្ហាប្រឈមនោះ។
យ៉ាងណាក៏ដោយ ស្របពេលដែលមេដឹកនាំអឺរ៉ុបស្វះស្វែងរកដំណោះស្រាយ អ្នកវិភាគជឿជាក់ថា អឺរ៉ុបអាចចនឹងរកដំណោះស្រាយសមរម្យមួយសម្រាប់ជួយក្រិកមុនថ្ងៃ ៣០ខែមិថុនានេះ ដើម្បីធានាថាក្រិកនឹងមិនប្រឈមបញ្ហាក្ស័យធនឡើយ។ចំណែកប្រមុខធនាគារកណ្តាលក្រិកនៅជឿជាក់ថា គ្មានអ្នកណាមួយអាចទាញក្រិកចេញពីតំបន់ចាយលុយអឺរ៉ូបានឡើយ ហើយក្រិកនឹងនៅបន្តស្នាក់នៅក្នុងតំបន់ចាយលុយអឺរ៉ូទៅមុខទៀត៕
© រក្សាសិទ្ធិដោយ thmeythmey.com