អន្តរជាតិ
ជម្លោះប្រដាប់អាវុធធ្ងន់ធ្ងរខ្លាំងនៅភាគខាងកើតអ៊ុយក្រែនគំរាមកំហែងកិច្ចព្រមព្រៀងសន្តិភាព
× កងទ័ពរដ្ឋាភិបាល និងក្រុមឧទ្ទាមអ៊ុយក្រែនចាប់ផ្តើមបាញ់ផ្លោងដាក់គ្នាកាន់តែខ្លាំងកាលពីថ្ងៃពុធម្សិលមិញនេះ ក្រោយមានការចោទប្រកាន់ពីសំណាក់កងទ័ពអ៊ុយក្រែនថាក្រុមឧទ្ទាមបាញ់ផ្លោងដាក់ពួកគេមុន។ នេះប្រហែលជាការប្រយុទ្ធទ្រង់ទ្រាយធំបំផុត ចាប់តាំងពីភាគីទាំងពីរសម្រេចផ្អាកការប្រយុទ្ធដោយគោរពតាមកិច្ចព្រមព្រៀងទីក្រុង Minsk ទី២ បង្កើតដោយបារាំង អាឡឺម៉ង់ និងរុស្ស៊ីកាលពីខែកុម្ភៈ។
ស្តាប់សំឡេង
រយៈពេលជាង ១ឆ្នាំហើយ ជម្លោះនៅភាគខាងកើតប្រទេសអ៊ុយក្រែនមិនទាន់អាចរកផ្លូវបញ្ចប់ឃើញឡើយ។ ម្សិលមិញនេះជម្លោះប្រដាប់អាវុធចាប់ផ្តើមកើនឡើងខ្លាំង និងធ្ងន់ធ្ងរមិនធ្លាប់មាន ចាប់តាំងពីភាគីព្រមព្រៀងគ្នាផ្អាកការប្រយុទ្ធដោយគោរពតាមកិច្ចព្រមព្រៀង Minsk ទី២ ដែលរៀបចំដោយ បារាំង អាឡឺម៉ង់ និងរុស្ស៊ី។
ការចោទប្រកាន់គ្នាទៅវិញទៅមករវាងភាគីទាំងពីរ ជាដើមចមនៃការប្រយុទ្ធគ្នាឡើងវិញកាន់តែខ្លាំងនេះ ហើយរហូតបង្កឲ្យមានជនស៊ីវិលស្លាប់ផង។ ក្រុមឧទ្ទាមគាំទ្ររុស្ស៊ីបានចោទប្រកាន់ថា ក្រុមកងទ័ពរដ្ឋាភិបាលរំលោភកិច្ចព្រមព្រៀង និងបើកការវាយប្រហារលើខ្លួនមុន ខណៈទាហានរដ្ឋាភិបាលថ្លែងការពារខ្លួនដោយចោទថាក្រុមឧទ្ទាមថាជាអ្នកចាប់ផ្តើមមុន។
បើតាមការឲ្យដឹងពីសំណាក់កងកម្លាំងរដ្ឋាភិបាលក្រុងគៀវ ក្រុមឧទ្ទាមបានបើកការវាយប្រហារលើកងកម្លាំងរដ្ឋាភិបាលដោយប្រើប្រាស់អាវុធធុនធ្ងន់មានកាំភ្លើងធំ និងរថក្រោះ។ ដើម្បីរក្សាស្ថានការណ៍ ទាហានរដ្ឋាភិបាលក៏បានវាយប្រហារតបតវិញ។
ចំណែកខាងក្រុមឧទ្ទាមបានអះអាងថា ទាហានរបស់រដ្ឋាភិបាលអ៊ុយក្រែនគឺជាអ្នកវាយប្រហារលើតំបន់ដែលគេកំពុងកាន់កាប់មុន ដែលបង្ខំឲ្យពួកគេត្រូវវាយប្រហារតបតវិញ។ បច្ចុប្បន្ននេះតំបន់សំខាន់ពីរមាន MariinkaនិងGeorgiivka ដែលនៅមិនឆ្ងាយប៉ុន្មានពីខេត្ត Donetsk នោះកំពុងក្លាយជាទីលានប្រយុទ្ធបង្ហូរឈាមគ្នារវាងកម្លាំងទាំងពីរ។ ប៉ុន្តែយ៉ាងណាក៏ដោយការប្រយុទ្ធគ្នានៅភាគខាងកើតអ៊ុយក្រែន កើនឡើងខ្លាំងពីរបីសប្តាហ៍មកហើយ ហើយមនុស្សយ៉ាងហោចណាស់១៥នាក់រួមទាំងជនស៊ីវិលផងបានស្លាប់ដោយសារការបាញ់ផ្លោងដាក់គ្នានេះ។
ការវាយប្រហារនេះ ក៏បានបង្កគ្រោះថ្នាក់ដល់ក្រុមកម្មករបូមរ៉ែនៅក្នុងតំបន់ក្បែរនោះផងដែរពោលគឺ ក្រុមកម្មករបានជាប់គាំងក្នុងអណ្តូង។ អាជ្ញាធរកំពុងចាត់វិធានការដើម្បីជួយសង្គ្រោះក្រុមកម្មករដែលជាប់គាំងនៅក្នុងអណ្តូង ដើម្បីធានាថាគ្មានអ្នករបួសឬស្លាប់ឡើយ។
គេមិនអាចវាយតម្លៃបានទេ ថាជម្លោះប្រដាប់អាវុធនេះ នឹងកាន់តែរីកធំនិងធ្ងន់ធ្ងរខ្លាំងនៅពេលខាងមុខទៀតដែរឬអត់ទេ ប៉ុន្តែការប្រយុទ្ធគ្នានេះកំពុងគំរាមកំហែងកិច្ចព្រមព្រៀងសន្តិភាពដែលមានស្រាប់។ បើសិនគ្មានវិធានការជំរុញការផ្អាកការប្រយុទ្ធទេនោះ វាប្រាកដណាស់ថា ជម្លោះកាន់តែធ្ងន់ ហើយកិច្ចព្រមព្រៀងសន្តិភាពរបស់លោកខាងលិចនឹងត្រូវគេរំលាយចោលចៀសមិនផុត។
គួរបញ្ជាក់ថា ក្រោយពេលរុស្ស៊ីក្រសោបយកទឹកដី Crimeaប្រជាជនភាគខាងកើតអ៊ុយក្រែនចាប់ផ្តើមក្រោកឈរទាមទារផ្តាច់ខ្លួនពីអ៊ុយក្រែន ប៉ុន្តែរដ្ឋាភិបាលបានចាត់វិធានការក្តៅដោយប្រើប្រាស់កងទ័ពដើម្បទប់ស្កាត់ការទាមទារបំបែករដ្ឋ។ ចាប់តាំងពីពេលនោះមកការប្រយុទ្ធនៅតែបន្ត ហើយជម្លោះប្រដាប់អាវុធនេះសម្លាប់មនុស្សច្រើនជា ៦ពាន់នាក់ និងបង្កឲ្យមនុស្សជាង ១លាននាក់បាត់បង់ជំរក៕
© រក្សាសិទ្ធិដោយ thmeythmey.com