សង្គមអន្តរជាតិ
អន្តរជាតិ
បារាំង៖ គោមួយក្បាលរត់ទៅពួនសម្ងំលាក់ខ្លួនដោយមិនចង់ចូលក្នុងទីសត្តឃាត
×
ដូចជាមិត្តភក្តិរបស់វាផ្សេងទៀតដែរ សត្វគោមួយក្បាលបានសម្តែងឲ្យឃើញថា វាមិនចង់បញ្ចប់ជីវិត ដោយត្រូវក្លាយជាសាច់គោបន្ទះក្នុងចានសម្រាប់មនុស្សបរិភោគឡើយ។
កាសែតប្រចាំតំបន់ Lyon របស់បារាំងបានចេញផ្សាយកាលពីថ្ងៃព្រហស្បត្តិ៍នេះថា សត្វគោមួយក្បាលនៅក្នុងភូមិដ៏តូចមួយនៃតំបន់ Rhône-Alpes បានព្យាយាមប្រឆាំង នៅពេលដែលគេដឹកវាឲ្យដើរចូលទៅទីសត្តឃាត។ សត្វគោនោះបានបំផ្លាញរបស់របរសព្វបែបយ៉ាង រួចក៏រត់គេចបាត់ទៅ។ វាបានទៅសម្ងំលាក់ខ្លួនក្នុងបរិវេណសហគ្រាសលក់គ្រឿងសំណង់មួយដែលស្ថិតនៅក្បែរនោះ។
ដោយបារម្ភខ្លាចក្រែងសត្វគោនោះរត់ឡើងទៅលើផ្លូវជាតិ អាជ្ញាធរបានបិទផ្លូវលេខ ៧ ជាបណ្តោះអាសន្ន ដើម្បីរង់ចាំឲ្យកងអាវុធហត្ថចល័ត ៩ នាក់ចុះមកអន្តរាគមន៍។ នៅទីបំផុត គេក៏អាចគ្រប់គ្រងសត្វគោនោះបាន បន្ទាប់ពីចាក់ថ្នាំឲ្យវាដេកលក់ចំនួន ៥ ម្ជុល។
ដោយសារជាតិថ្នាំ វាអាចមានជីវិតរស់នៅក្នុងក្រោលជាមួយមិត្តរបស់វាបានបន្តទៀត ព្រោះថាគេមិនអាចយកវាទៅកាប់យកសាច់បានឡើយក្នុងរយៈពេលមួយខែ។ តែមួយខែក្រោយ ម្ចាស់វានឹងយកវាទៅកាន់ទីសត្តឃាតសាជាថ្មី ដោយជៀសមិនផុត៕
© រក្សាសិទ្ធិដោយ thmeythmey.com