អន្តរជាតិ
បញ្ហាបំណុលក្រិកនៅតែបន្តរ៉ាំរ៉ៃ ពិបាកដោះស្រាយឲ្យជ្រះស្រឡះ
× ថ្ងៃសុក្រនេះ ជាថ្ងៃដែលរដ្ឋាភិបាលក្រិកត្រូវសងបំណុលដំណាក់កាលទី១ ជាទឹកប្រាក់៣០០លានអឺរ៉ូ ដល់មូលនិធិរូបិយវត្ថុអន្តរជាតិIMF។ ប៉ុន្តែ ថ្ងៃព្រហស្បតិ៍ម្សិលមិញ រដ្ឋាភិបាលលោកអាឡិចស៊ីស ស៊ីប្រាស បានសុំIMFអោយលើកពេលសងបំណុលទាំង៤ដំណាក់កាល ទៅថ្ងៃ៣០មិថុនាចុងខែនេះវិញ។ IMF ក៏ព្រមតាមសំណើរបស់ក្រិក ដោយរំលឹកទៅក្រិកវិញថា បំណុលសរុបដែលត្រូវសងនៅចុងខែ គឺមាន១៦០០លានអឺរ៉ូ។
សូមស្តាប់ការពន្យល់ របស់ ខន ចំប៉ា
ជាមួយរដ្ឋាភិបាលក្រិកថ្មីមកពីបក្សឆ្វេងនិយម បញ្ហាបំណុលក្រិក គឺមិនងាយដោះស្រាយជ្រះស្រឡះទេ។ ថ្ងៃដែលត្រូវសងបំណុល ក្រិកនៅតែមិនអាចសងបំណុល ហើយថែមទាំងសុំពន្យារពេលសងទៀត។ គិតពីចុងទសវត្សឆ្នាំ១៩៧០មក ក្នុងនាមជាសមាជិកមូលនិធិរូបិយវត្ថុអន្តរជាតិ IMF ប្រទេសក្រិកអាចសុំសងបំណុលផ្សេងៗ ជាសរុបក្នុងថ្ងៃតែមួយបាន ចៀសវាងសងច្រើនដំណាក់កាលនាំស្មុគស្មាញ។
ហេតុនេះហើយ ទើបរដ្ឋាភិបាលក្រុងអាថែនសុំលើកពេលសងបំណុលសរុប៤ដំណាក់កាល ទៅចុងខែមិថុនាវិញ ជាជាងសងតែមួយដំណាក់កាល នៅថ្ងៃសុក្រនេះ។ ក្រិកត្រូវសងបំណុល IMF ៤ដំណាក់កាលផ្សេងគ្នា ក្នុងខែមិថុនានេះ។ IMF ក៏នៅតែអនុគ្រោះតាមសំណើក្រិក ទោះជាក្រិកទាត់ចោលសំណើត្បិតត្បៀតថវិកាដែលម្ចាស់បំណុលទាំងឡាយ ស្នើឡើងក៏ដោយចុះ។
កន្លងមក ម្ចាស់បំណុលក្រិក មានដូចជាIMF រឺក៏ធនាគារកណ្តាលអឺរ៉ុប BCE បានជួបប្រជុំជាមួយរដ្ឋាភិបាលក្រិករាប់មិនអស់ តែនៅតែរកកិច្ចព្រមព្រៀងមិនបាន។ ក្នុងកិច្ចប្រជុំថ្ងៃពុធទី៣មិថុនាសប្តាហ៍នេះ ម្ចាស់បំណុលបានដាក់សំណើមួយទៀត ទៅរដ្ឋាភិបាលក្រិក។ តែថ្ងៃ៤មិថុនាម្សិលមិញ ក្រិកក៏ទាត់ចោលសំណើនោះភ្លាម ដូច្នេះ គ្មានកិច្ចព្រមព្រៀងអ្វីចេញរួចទេ។ ហេតុអ្វីបានជាក្រិកបដិសេធសំណើម្ចាស់បំណុលបែបនេះ?
បើមើលខ្លឹមសារចំបងក្នុងផែនការរបស់ម្ចាស់បំណុលដែលស្នើនៅថ្ងៃ ៣មិថុនា ម្ចាស់បំណុលចង់អោយក្រិកកាត់បន្ថយចំណាយទៅលើប្រាក់ចូលនិវត្តន៍ ចាប់ពីខែកក្កដាខាងមុខនេះទៅ។ សម្រាប់ឆ្នាំ២០១៥នេះ ក្រិកត្រូវតែបន្ថយចំណាយនេះអោយបានពី០,២៥% ទៅ០,៥% នៃផលិតផលសរុបក្នុងស្រុក, ហើយអោយបាន១% សម្រាប់ឆ្នាំ២០១៦ ។ ក្រិកមិនអាចអនុវត្តន៍តាមបានទេ ព្រោះថាប្រាក់ចូលនិវត្តន៍ការងារ អាចអោយមនុស្សចាស់ទាំងនោះយកទៅជួយកូនចៅពួកគេ ដែលកំពុងគ្មានការងារធ្វើបាន។ វាជាការជួយសម្រាលបន្ទុករដ្ឋាភិបាលផងដែរ។ បើចង់អោយកាត់ចំណាយប្រាក់ចូលនិវត្តន៍ ទាល់តែដោះស្រាយអោយមានការងារធ្វើក្នុងស្រុកអោយបានសិន ព្រោះជនគ្មានការងារធ្វើនៅក្រិកមានច្រើនណាស់ ហើយរដ្ឋាភិបាលក៏មិនអាចជួយប្រាក់កាសពួកគេបានច្រើនដែរ។
ក្នុងគំរោងផែនការស្នើថ្ងៃ៣មិថុនានេះដែរ ម្ចាស់បំណុលក៏បានទាមទារអោយដំឡើងពន្ធទំនិញមូលដ្ឋាន ពី៦,៥% ទៅ១១%ដែរ។ មើលទៅ គឺជាពន្ធធ្ងន់កតែម្តង។ ហេតុនេះហើយបានជាសំណើដែលម្ចាស់បំណុលក្រិកដាក់មកគ្រាន់តែដាក់ភ្លាម ក្រិកក៏បដិសេធភ្លាមដែរ។ ម្ចាស់បំណុលស្រមៃថា ក្រិកអាចត្បិតត្បៀតប្រាក់មួយចំនួនបាន បើកាត់ចំណាយប្រាក់ចូលនិវត្តន៍នេះ។ ប៉ុន្តែ បញ្ហាវាប្រទាក់ក្រឡាគ្នា មិនអាចដោះស្រាយស្រួលដូចគិតបានឡើយ។
ម្យ៉ាងទៀត បើរដ្ឋាភិបាលក្រុងអាថែនធ្វើតាមម្ចាស់បំណុល ដោយកាត់បន្ថយប្រាក់ចូលនិវត្តន៍ វាជាការដើរផ្ទុយពីគោលនយោបាយឆ្វេងនិយម របស់បក្សកាន់អំណាចស៊ីរីហ្សា ជាការក្បត់ពាក្យសន្យា ក្នុងពេលបោះឆ្នោតកន្លងមកទាំងស្រុង។ បើដូច្នេះមែន បក្សផ្សេងៗក្នុងស្រុកប្រាកដជាចំអករដ្ឋាភិបាលលោកអាឡិចស៊ីស ស៊ីប្រាស មិនខានទេ ព្រោះថា បើបក្សទាំងនោះកាន់អំណាច ក៏ពួកគេបដិសេធសំណើម្ចាស់បំណុលដូចគ្នាដែរ។
បំណុលក្រិក មិនងាយដោះស្រាយចេញឡើយ ព្រោះក្រិកស្ទើរតែក្ស័យធុន ទោះជាខំត្បិតត្បៀតចំណាយគ្រប់ទិសទៅហើយក្តី។ ចង់អោយក្រិកសងបំណុល ម្ចាស់បំណុលត្រូវតែអធ្យាស្រ័យអោយបានច្រើន។ មិនខុសពីពាក្យដែលគេតែងលើកឡើងថា ពេលទារបំណុល ម្ចាស់បំណុលត្រូវអង្វរកូនបំណុលទេ។ ប៉ុន្តែ បំណុលក្រិកមិនមែនជាបញ្ហាស្រួលដោះស្រាយ ដូចក្នុងការរស់នៅប្រចាំថ្ងៃទេ។ វាជាបញ្ហារបស់ប្រទេសមួួយ របស់ប្រជាជាតិមួយទាំងមូល ដែលមិនអាចលេងសើចបានឡើយ ព្រោះវាអាចប៉ះពាល់ដល់សេដ្ឋកិច្ចប្រទេសមួយទៀត រឺសេដ្ឋកិច្ចតំបន់ចាយលុយអឺរ៉ូបាន៕
© រក្សាសិទ្ធិដោយ thmeythmey.com