សុខភាព
អន្តរជាតិ
ក្មេងប្រុសអាយុ៦ឆ្នាំម្នាក់ទុកសក់ឲ្យវែង ដើម្បីជួយកុមារមានជំងឺមហារីក
×
អស់រយៈពេលពីរឆ្នាំមកហើយដែលកុមារាជនជាតិអាមេរិកាំង Christian McPhilamy ត្រូវរងនូវការសើចចំអកពីមិត្តភក្តិ និងការចំអន់ពីមនុស្សធំមួយចំនួន ដោយសារតែរូបគេទុកសក់វែងដូចជាក្មេងស្រី។ ប៉ុន្តែ កុមារាដែលពេលនេះមានអាយុ ៨ ឆ្នាំមិនសោកស្តាយអ្វីឡើយ ព្រោះគេមានហេតុផលជាក់លាក់គឺ ជួយកុមារទាំងឡាយដែលកើតជំងឺមហារីក ហើយត្រូវការពាក់សក់ក្លែងក្លាយដើម្បីបិទបាំងក្បាលដែលបានជ្រុះសក់អស់ ដោយសារតែការព្យាបាលដោយគីមីសាស្ត្រ។
ក្មេងប្រុសនេះកើតមានគំនិតមនុស្សធម៌នេះកាលពីឆ្នាំ ២០១២ នៅពេលដែលគេមើលគេហទំព័ររបស់មន្ទីរពេទ្យសម្រាប់កូន និងម្តាយមួយ។ គេបានប្រទះឃើញពាណិជ្ជកម្មមួយដែលជំរុញឲ្យអ្នកប្រើប្រាស់អ៊ីនធឺណែតទាំងអស់ធ្វើការបរិច្ចាគសក់សម្រាប់កុមារមានជំងឺ។ បន្ទាប់ពីនោះ គេក៏ចាប់ផ្តើមទុកសក់។
នៅទីបំផុត កាលពីថ្ងៃពុធកន្លងទៅនេះ ក្មេងប្រុសនេះបានប្រគល់សក់របស់ខ្លួនដែលមានប្រវែង ២៥ ស.ម ទៅឲ្យសមាគម Children With Hair Loss ។ បើតាមសមាគមនេះ ការបរិច្ចាគសក់ពីក្មេងប្រុសគឺជារឿងដ៏កម្រមានណាស់៕
© រក្សាសិទ្ធិដោយ thmeythmey.com