អន្តរជាតិ
នយោបាយអន្តរជាតិ
×![]()
នៅ ថ្ងៃសុក្រម្សិលមិញ ប្រធានាធិបតីហ្វីលីពីន បេនីញ៉ូ អាគីណូ បានប្រកាសថា ហ្វីលីពីននឹងចរចាជាមួយជប៉ុន ដើម្បីអោយយន្តហោះនិងកប៉ាល់ជប៉ុនអាចប្រើប្រាស់មូលដ្ឋានទ័ពហ្វីលីពីន ដើម្បីចុះចតចាក់សាំង។
កាលពីថ្ងៃ ព្រហស្បតិ៍ ហ្វីលីពីននិងជប៉ុនបានចុះហត្ថលេខាលើកិច្ចព្រមព្រៀងយុទ្ធសាស្ត្រមួយ ទាក់ទងកិច្ចសហប្រតិបត្តិការយោធា ក្នុងនោះ ប្រទេសទាំង២គ្រោងនឹងបើកសមយុទ្ធរួមគ្នា ហើយក៏នឹងពិភាក្សាពីការលក់សម្ភារនិងបច្ចេកវិទ្យាដែលជប៉ុនលក់ អោយហ្វីលីពីន។ ហ្វីលីពីនធ្លាប់ធ្វើកិច្ចព្រមព្រៀងដូចគ្នាជាមួយអូស្ត្រាលីនិង អាមេរិករួចហើយដែរ។
ម្សិលមិញ លោកអាគីណូបានបង្ហាញបំណងចង់អោយជប៉ុនពង្រាយកងទ័ពនៅ ហ្វីលីពីន ក្នុងសន្និសីទសារព័ត៌មានមួយ នៅក្លឹបអ្នកសារព័ត៌មានជាតិជប៉ុន ក្នុងថ្ងៃដែលលោកអាគីណូត្រូវបិទបញ្ចប់ដំណើរទស្សនកិច្ច៤ថ្ងៃរបស់ លោក នៅប្រទេសជប៉ុន។ ហ្វីលីពីនដែលមានជម្លោះដែនទឹកជាមួយចិន នៅសមុទ្រចិនខាងត្បូង ពិតជាត្រូវការជប៉ុនចៀសមិនរួចហើយ ខណៈចិនកំពុងសាងសង់ពង្រីកកោះសិប្បនិមិត្តរបស់ខ្លួននៅទីនោះ។
បំណងរបស់ប្រធានាធិបតីហ្វីលីពីនក៏បំពេញចិត្តជប៉ុនមិនតិចដែរទេ ព្រោះថា ក្រោយជប៉ុនបាក់មុខក្នុងសង្គ្រាមលោកលើកទី២មក នាយករដ្ឋមន្ត្រីស្ហ៊ីនសូ អាបេ ចង់អោយកងទ័ពជប៉ុនលេចមុខមាត់ឡើងវិញ ក្នុងឆាកអន្តរជាតិ។ កាលពីខែមេសា យោងតាមសារព័ត៌មានReuters ជប៉ុនគ្រោងនឹងចូលរួមល្បាតផ្នែកអាកាសជាមួយអាមេរិក ក្នុងតំបន់ជម្លោះដែនទឹកនៅសមុទ្រចិន ដើម្បីឆ្លើយតបទៅនឹងការគំរាមកំហែងរបស់ចិន៕
© រក្សាសិទ្ធិដោយ thmeythmey.com
