អន្តរជាតិ
នយោបាយអន្តរជាតិ
លោកស្រី ស៊ូជីទៅចិន ក្រោយរងការរិះគន់ខ្លាំងរឿងរំលោភសិទ្ធិជនជាតិរ៉ូហ៊ីងយ៉ា
×
ប្រធានបក្សប្រឆាំងមីយ៉ាន់ម៉ា និងជាម្ចាស់ពានរង្វាន់ណូបែលសន្តិភាព អ៊ុងសាន ស៊ូជី គ្រោងនឹងទៅទស្សនកិច្ចនៅក្នុងប្រទេសចិនលើកដំបូងបំផុតក្នុ្ងងខែមិថុនានេះ។ ទស្សនកិច្ចរបស់លោកស្រី ស្ថិតក្នុងបំណងស្តារទំនាក់ទំនងឲ្យប្រសើរជាមួយចិនឡើងវិញ។ យ៉ាងណាក៏ដោយ វត្តមានមាតាប្រជាធិបតេយ្យនៅចិន មិនមែនជាសញ្ញាល្អប៉ុន្មានទេ ហើយលោកស្រី ស៊ូជី កំពុងរងការរិះគន់ព្រោះនៅស្ងៀមជុំវិញសំណុំរឿងរំលោភសិទ្ធិជនជាតិរ៉ូហ៊ីងយ៉ា។
ប្រមុខបក្សប្រឆាំងលោកស្រី អ៊ុងសាន ស៊ូជី នឹងធ្វើដំណើរទស្សនកិច្ចជាលើកដំបូងបំផុតទៅកាន់ប្រទេសចិននៅក្នុងខែមិថុនានេះ។ បើតាមអ្នកនាំពាក្យ គណបក្សសម្ព័ន្ធជាតិដើម្បីប្រជាធិបតេយ្យលោក Nyan Win ដំណើទស្សនកិច្ចនេះចាប់ផ្តើមពីថ្ងៃ ១០ ដល់ថ្ងៃ ១៤មិថុនា ហើយលោកស្រីគ្រោងនឹងជួបពិភាក្សាទ្វេភាគីជាមួយប្រមុខរដ្ឋចិនលោក ស៊ី ជីនពីង និងលោកនាយករដ្ឋមន្ត្រី Li Keqiang ផងដែរ។
វត្តមានជាលើកដំបូងបំផុតរបស់មេដឹកនាំបក្សប្រឆាំងមីយ៉ាន់ម៉ានៅក្នុងប្រទេសចិន ជារឿងប្រវត្តិសាស្ត្រមួយ ត្បិតទំនាក់ទំនងរវាងចិននិងមីយ៉ាន់ម៉ាបន្តធ្លាក់ចុះរយៈពេលប៉ុន្មានឆ្នាំចុងក្រោយនេះ។ ក្រោយពេលរបបសឹករលំរលាយ ហើយកកើតរបបពាក់កណ្តាលស៊ីវិលក្នុងឆ្នាំ២០១១នៅមីយ៉ាន់ម៉ា ចំណងការទូតរវាងចិននិងមីយ៉ាន់ធ្លាក់ចុះខ្លាំង។ អំឡុងរបបយោធាកាន់កាប់ មីយ៉ាន់ម៉ាធ្លាប់ពឹងពាក់ក្រុងប៉េកាំងស្ទើរគ្រប់បែបយ៉ាង ប៉ុន្តែរបបថ្មីស៊ីវិល បែរជាគេចពីចិន និងងាកទៅរកប្រទេសរកខាងលិច។ ទណ្ឌកម្មភាគច្រើនត្រូវបានលោកខាងលិចដកចេញពីមីយ៉ាន់ម៉ា ហើយមីយ៉ាន់ម៉ាសប្បាយរីករាយនឹងជំនួយឧបត្ថម្ភ និងចំណងពាណិជ្ជកម្មថ្មីៗជាមួយបណ្តាប្រទេសសេរីទៅវិញ។
យ៉ាងណាក៏ដោយទាំងជារឿងចាស់ ប៉ុន្តែបញ្ហាសំខាន់បំផុតនាពេលបច្ចុប្បន្នគឺចលនាប្រយុទ្ធគ្នារវាងកទ័ពរដ្ឋាភិបាលមីយ៉ាន់ និងក្រុមឧទ្ទាមកូកាងនៅតាមបណ្តោយព្រំដែនចិន។ មីយ៉ាន់ម៉ាក៏បានចោទប្រកាន់ចិនថាជាអ្នកជួយជ្រោមជ្រែងក្រុមឧទ្ទាមឲ្យប្រយុទ្ធជាមួយទ័ពរដ្ឋាភិបាលផងដែរ។ ចិនខឹងសម្បារជាខ្លាំងរហូតបញ្ជូនទ័ពទៅធ្វើសមយុទ្ធតាមព្រំដែនរបស់ខ្លួនវិញ ដើម្បីគំរាមមីយ៉ាន់ម៉ាកុំបន្តធ្វើផ្តេសផ្តាស។
សម្រាប់ក្រុងប៉េកាំង ការរឹតបន្តឹងកិច្ចសហប្រតិបត្តិការនិងចំណងមិត្តភាពជាមួយលោកស្រី អ៊ុងសាន ស៊ូជី ជារឿងសំខាន់បំផុតមួយ ត្បិតចិននឹងអាចប្រើប្រាស់ទំនាក់ទំនងល្អនេះដើម្បីការពារប្រយោជន៍ខ្លួននៅមីយ៉ាន់ម៉ាផង។ លោកស្រី ស៊ូជី ត្រូវបានរបបក្រុងប៉េកាំងចាត់ទុកជាអ្នកនយោបាយដ៏មានឥទ្ធិពលនិងមានប្រជាប្រិយភាពនៅមីយ៉ាន់ម៉ា ហើយភាពស្អិតល្មួតរវាងចិននិងមេបក្សប្រឆាំងរូបនេះក៏អាចបញ្ជាក់ច្បាស់ថា មីយ៉ាន់ម៉ានឹងមិនស្ថិតក្រោមឥទ្ធិពលផ្តាច់មុខរបស់លោកខាងលិចឡើយ។
ប៉ុន្តែរឿងដែលសំខាន់ លោកស្រីត្រូវបានរដ្ឋធម្មនុញ្ញព្រាងក្នុងរបបសឹកហាមមិនឲ្យឈរឈ្មោះសម្រាប់ការបោះឆ្នោតប្រកួតប្រជែងតំណែងប្រធានាធិបតីឡើយ។ គេរំពឹងមុតមាំថា នៅចុងឆ្នាំនេះបក្សលោកស្រីនឹងអាចដណ្តើមអាសនៈបានច្រើន និងទទួលការគាំទ្រច្រើន ដែលអាចជួយត្រួសត្រាយផ្លូវជូនលោកស្រីទៅរកតំណែងប្រធានាធិបតីដោយការកវិសោធនកម្មរដ្ឋធម្មនុញ្ញ។ បើគ្មានការកែប្រែមាត្រាដែលចែងក្នុងរដ្ឋធម្មនុញ្ញ លោកស្រីនៅតែគ្មានវាសនាក្លាយជាប្រធានាធិបតីមីយ៉ាន់ម៉ាដដែល។
រឿងរ៉ាវបច្ចុប្បន្ននៅតែពិបាកស្មានដូចគ្នា លោកស្រីស៊ូជីថ្វីត្បិតត្រូវបានគេចាត់ទុកជាអ្នកនយោបាយដ៏មានប្រជាប្រិយភាពក៏ដោយចុះ រយៈពេលប៉ុន្មានខែចុងក្រោយ លោកស្រីរងការរិះគន់យ៉ាងចាស់ដៃពីសហគមន៍អន្តរជាតិ ប្រជាជន និងសកម្មជនសិទ្ធិមនុស្ស ព្រោះព្យាយាមរក្សាភាពស្ងៀមស្ងាត់ជុំវិញការរំលោភសិទ្ធិសេរីភាពនិងធ្វើទុក្ខបុកម្នេញជនជាតិ រ៉ូហ៊ីងយ៉ា។ ម្យ៉ាងវិញទៀតវត្តមាននិងភាពស្និទ្ធស្នាល់របស់លោកស្រីជាមួយមេដឹកនាំបក្សកុម្មយនីស្តចិន ប្រាកដណាស់ថា វាជារូបភាពអវិជ្ជមានសម្រាប់បញ្ហាប្រជាធិបតេយ្យ៕
© រក្សាសិទ្ធិដោយ thmeythmey.com