សង្គមអន្តរជាតិ
អន្តរជាតិ
ចោរព័ត៌មានវិទ្យាលុកលុយទិន្នន័យព័ត៌មានរបស់មន្ត្រីប៉ូលិសអាមេរិក៤លាននាក់
×![]()
អាមេរិកបានរងការវាយប្រហារជាថ្មីខាងប្រព័ន្ធព័ត៌មានវិទ្យា ជាការវាយប្រហារទ្រង់ទ្រាយធំ។ រដ្ឋាភិបាលអាមេរិកបានផ្តល់ដំណឹងថា ការិយាល័យគ្រប់គ្រងបុគ្គលិករបស់រដ្ឋាភិបាល ហៅជាភាសាអង់គ្លេសថា Office of Personnel Management (OPM) បានរកឃើញកាលពីខែមេសាថា កុំព្យូទ័ររបស់រដ្ឋាភិបាលជាច្រើនគ្រឿង ត្រូវបានចោរព័ត៌មានវិទ្យាចូលលុកលុយលួចយកទិន្នន័យសន្ធឹកសន្ធាប់។ គឺជាទិន្នន័យព័ត៌មានរបស់មន្ត្រីប៉ូលិសបច្ចុប្បន្ន និងអតីតប៉ូលិសប្រមាណ៤លាននាក់។
គេនៅមិនទាន់ដឹងថា តើការវាយប្រហារនេះ បានប៉ះពាល់ទៅដល់លោកអូបាម៉ា មន្ត្រីជាន់ខ្ពស់រដ្ឋាភិបាលនិងចារកិច្ចអាមេរិកដែររឺយ៉ាងណាទេ។ ការិយាល័យOPM គិតថា ជនរងគ្រោះអាចមានចំនួនច្រើនលើសពីនេះ។ OPM បានស្នើអោយមានការសងជំងឺចិត្ត១លានដុល្លារដល់ជនរងគ្រោះទាំងនោះ ប្រសិនបើអត្តសញ្ញាណរបស់ពួកគេត្រូវបានគេលួចយកទៅប្រើប្រាស់។
ទីភ្នាក់ងារFBI កំពុងតាមស៊ើបអង្កេតបញ្ហានេះ និងសន្យាថា មិនអោយជនល្មើសរួចខ្លួនទេ។ ក្នុងពេលកំពុងស៊ើបអង្កេត គ្រប់គ្នាកំពុងសង្ស័យលើចិន ប៉ុន្តែឯកអគ្គរដ្ឋទូតចិនប្រចាំសហរដ្ឋអាមេរិក បានបដិសេធការចោទប្រកាន់ យ៉ាងដាច់អហង្កា។ អ្នកនាំពាក្យការទូតចិនបានលើកឡើងថា ការចោទប្រកាន់ឆាប់រហ័សពេក សបង្ហាញពីភាពមិនចេះទទួលខុសត្រូវ។ ចិនអះអាងថា រដ្ឋធម្មនុញ្ញខ្លួនហាមឃាត់មិនអោយមានបទឧក្រិដ្ឋផ្នែកព័ត៌មានវិទ្យាទេ បើទោះជាធ្វើឡើងក្នុងទ្រង់ទ្រាយណាក៏ដោយចុះ។
អាមេរិកបានសុំអោយមន្ត្រីប៉ូលិសដែលរងគ្រោះទាំងនោះធ្វើការប្រុងប្រយ័ត្នខ្ពស់។ ការវាយប្រហារផ្នែកព័ត៌មានវិទ្យាបានកើនឡើងខ្ពស់នៅសហរដ្ឋអាមេរិក ក្នុងប៉ុន្មានខែចុងក្រោយនេះ។ ចោរព័ត៌មានវិទ្យាតែងចូលទៅលុកលុយក្រុមហ៊ុនធំៗ ដូចជាក្រុមហ៊ុនធានារ៉ាប់រង Anthem រឺក៏ Sony Pictures Entertainment ជាដើម៕
© រក្សាសិទ្ធិដោយ thmeythmey.com
