អន្តរជាតិ
នយោបាយអន្តរជាតិ
ឥណ្ឌានិងបង់ក្លាដែសសម្រេចបានកិច្ចព្រមព្រៀងប្រវត្តិសាស្ត្រទាក់ទងនឹងដីភូមិតាមព្រំដែន
×![]()
ក្នុងទស្សនកិច្ច នៅទីក្រុងដាកា ប្រទេសបង់ក្លាដែស ថ្ងៃសៅរ៍ម្សិលមិញ នាយករដ្ឋមន្ត្រីឥណ្ឌា លោក ណារិនដ្រា ម៉ូឌី និងនាយករដ្ឋមន្ត្រីបង់ក្លាដែស លោកស្រី ស្ហែក ហាស៊ីណា បានចុះហត្ថលេខាលើេកិច្ចព្រមព្រៀងជាប្រវត្តិសាស្ត្រស្តីពីដីភូមិនិង ប្រជាជនតាមព្រំដែននៃប្រទេសទាំង។
កិច្ចព្រមព្រៀង ប្រវត្តិសាស្ត្រនេះមានទិសដៅបិទបញ្ចប់វិបត្តិដីភូមិនិងប្រជាជនដែល រស់នៅតាមព្រំដែនរវាងឥណ្ឌានិងបង់ក្លាដែស ជួយអោយពួកគេមានអត្តសញ្ញាណពិតប្រាកដ។ កិច្ចព្រមព្រៀងតំរូវអោយឥណ្ឌានិងបង់ក្លាដែសផ្តោះប្តូរដីភូមិតូចៗ ប្រមាណ២០០ អោយគ្នាទៅវិញទៅមក។ ដីភូមិភាគច្រើនស្ថិតនៅជាប់ព្រំដែនផ្លូវការរវាងប្រទេសទាំង។
គិតជាតួលេខ ដីភូមិប្រជាជនឥណ្ឌាដែលស្ថិតក្នុងទឹកដីបង់ក្លាដែសមាន១០៦ ហើយដីភូមិប្រជាជនបង់ក្លាដែសដែលស្ថិតក្នុងទឹកដីឥណ្ឌាមាន។ ដោយសារតែស្មុគស្មាញបែបនេះ ទើបបានជាប្រជាជនប្រមាណ៥២០០០នាក់នៅទីនោះ គ្មានអត្តសញ្ញាណពិតប្រាកដ បើទោះជាគេដឹងថា ពួកគេត្រូវតែមានសញ្ជាតិឥណ្ឌា រឺក៏បង់ក្លាដែសក្តី។
ប្រភពនៃបញ្ហាចាប់កើតមានចាប់ពីឆ្នាំ១៧១៣ ពេលស្តេច២អង្គមកពីនគរ២ផ្សេងគ្នា ក្នុងជំនាន់នោះ បានយកទឹកដី មកដាក់ភ្នាល់ល្បែងគ្នា។ ម្ល៉ោះហើយបានជាក្សត្រទាំង២កាត់ដីអោយគ្នាទៅវិញទៅមក ពេលឈ្នះរឺចាញ់រៀងខ្លួន ធ្វើអោយប្រជាជនទ្រាំរស់តាមស្ថានភាពនោះតរហូតមក។ ក្នុងឆ្នាំ១៩៤៧ ពេលអង់គ្លេសពុះចែកទឹកដីឥណ្ឌា និងប៉ាគីស្ថាន ដីភូមិទាំងនេះក៏បែកចេញទៅតាមនោះរៀងៗខ្លួនទៀត។ ហើយពេលបង់ក្លាដែសធ្វើសង្គ្រាមផ្តាច់ខ្លួនពីប៉ាគីស្ថាន ក្នុងឆ្នាំ១៩៧១ ដីភូមិនិងប្រជាជនក៏រឹតតែចែកដាច់តាមនោះទៀត។
ដោយសារដីភូមិរបស់ខ្លួនមិនស្ថិតក្នុងប្រទេសដើមកំណើតខ្លួន ប្រជាជននៅតាមភូមិទាំងនេះបានក្លាយជាប្រជាជនដែលគ្មានទឹកដី គ្មានអត្តសញ្ញាណពិតប្រាកដ ហើយអាជ្ញាធរឥណ្ឌានិងបង់ក្លាដែសទៀតសោតក៏ពិបាកនឹងផ្តល់ក្រដាសស្នាម អោយពួកគេដែរ។ យោងតាមកិច្ចព្រមព្រៀងប្រវត្តិសាស្ត្ររវាងឥណ្ឌានិងបង់ក្លាដែស សម្រេចបានម្សិលមិញនេះ ពេលប្រទេសទាំង២ដោះដូរដីភូមិគ្នា ប្រជាជនតាមដីភូមិទាំងនេះអាចមានសិទ្ធិជ្រើសរើសប្រទេស ដែលខ្លួនចង់រស់នៅ៕
© រក្សាសិទ្ធិដោយ thmeythmey.com
