សង្គមអន្តរជាតិ
អន្តរជាតិ
នយោបាយអន្តរជាតិ
ឈរពីរម៉ោងយ៉ាងតិចក្នុងមួយថ្ងៃនៅកន្លែងធ្វើការ មានប្រយោជន៍ចំពោះសុខភាព
×
ជាទូទៅបុគ្គលិកម្នាក់ៗចំណាយពេលស្ទើរតែ ៧៥% នៃម៉ោងការងាររបស់ខ្លួន ដោយអង្គុយជាប់នៅនឹងកៅអី។ ដើម្បីប្រយុទ្ធប្រឆាំងនឹងភាពអសកម្មនេះដែលឈានទៅដល់ការកើតជំងឺផ្សេងៗ រដ្ឋាភិបាលអង់គ្លេសបានផ្សព្វផ្សាយនូវអនុសាសន៍មួយចំនួនរបស់អ្នកឯកទេសផ្នែកសុខភាពសាធារណៈ ដែលត្រូវបានចេញផ្សាយនៅក្នុងកាសែត Sports Medicine កាលពីដើមខែមិថុនានេះ។
ក្រុមអ្នកឯកទេសសុខភាពបានណែនាំថា ត្រូវឈរយ៉ាងតិចឲ្យបានពីរម៉ោងក្នុងមួយថ្ងៃ នៅអំឡុងពេលធ្វើការ។ បើយកល្អ គឺគួរតែឈរឲ្យបានបួនម៉ោង។ មានន័យថា បុគ្គលិកទាំងឡាយគួរតែឧស្សាហ៍ក្រោកឈរឲ្យបានទៀងទាត់ ហើយការចាកចេញពីកៅអីនេះអាចគណនាស្មើនឹងរយៈពេលពីរម៉ោង។ ការអង្គុយយូរពេកនាំឲ្យប្រឈមមុខកាន់តែខ្លាំងនឹងការកើតជំងឺរ៉ាំរ៉ៃដូចជា ទឹកនោមផ្អែម ដុះក្បាលពោះ និងជំងឺបេះដូងជាដើម។ អ្នកឯកទេសម្នាក់បាននិយាយថា បើអង្គុយកាន់តែយូរ អាយុកាន់តែខោច។
បើតាមទិន្នន័យ អ្នកធ្វើការការិយាល័យអង្គុយនៅស្ងៀមយ៉ាងហោចណាស់ក៏ ៣០ នាទីដែរទើបងើបចេញម្តង។ តាមពិតទៅ ជារៀងរាល់ម៉ោង យើងអាចក្រោកឈរប៉ុន្មាននាទី ដោយការដើរទៅរកកាហ្វេ ឬបន្ទប់ទឹកជាដើម។ ម្យ៉ាងទៀត យើងគួរតែចាប់យកទម្លាប់ឈរនិយាយទូរស័ព្ទ ឬដើរទៅរកមិត្តរួមការងារដើម្បីប្រាប់ពីព័ត៌មានផ្សេងៗ ជំនួសឲ្យការផ្ញើអ៊ីម៉ែល។ នេះជាវិធីងាយៗដែលយើងអាចអនុវត្តបាននៅកន្លែងធ្វើការ៕
© រក្សាសិទ្ធិដោយ thmeythmey.com