អន្តរជាតិ
នយោបាយអន្តរជាតិ
×![]()
ដោយ: ថ្មីៗ
នាយករដ្ឋមន្ត្រីជប៉ុនលោក ស៊ីហ្សូ អាបេ បានអញ្ជើញទៅទស្សនិច្ចនៅក្នុងប្រទេសអ៊ុយក្រែនកាលពីថ្ងៃសៅរ៍ម្សិលមិញ ដោយលោកបានជួបពិភាក្សាជាមួយប្រធានាធិបតីអ៊ុយក្រែន Petro Poroshenko ។ គោលបំណងនៃទស្សនកិច្ចគ្មានអ្វីក្រៅពីបង្ហាញជំហរគាំទ្ររបស់រដ្ឋាភិបាលជប៉ុនក្នុងការដោះស្រាយបញ្ហានៅអ៊ុយក្រែន ហើយទស្សនិកិច្ចស្របពេលដែលលោកអាបេត្រូវអញ្ជើញទៅអាឡឺម៉ង់ដើម្បីចូលរួមក្នុងកិច្ចប្រជុំក្រុមប្រទេស ៧ផងដែរ។
លោក ជាវ សំណាង លម្អិតព័ត៌មាននេះ៖
នាយករដ្ឋមន្ត្រីជប៉ុន ស៊ីហ្សូ អាបេ បានប្រកាសថា ជប៉ុននឹងបន្តជួយរដ្ឋាភិបាលអ៊ុយក្រែនក្នុងការដោះស្រាយបញ្ហាជម្លោះប្រដាប់អាវុធបច្ចុប្បន្ននៅភាគខាងកើត។ លោកបានថ្លែងប្រាប់លោក Petro Poroshenko ប្រធានាធិបតីអ៊ុយក្រែនថា លោក ជំទាស់រាល់ការប្រើប្រាស់ដំណោះស្រាយយោធានៅភាគខាងកើត ហើយលោកប្តេជ្ញាថា នឹងជួយជ្រោមជ្រែងស្វែងរកដំណោះស្រាយសព្វគ្រប់បែបយ៉ាង ដើម្បីដោះស្រាយបញ្ហាអ៊ុយក្រែន។ លោក អាបេ ថ្លែងបែបនេះ ស្របពេលដែលលោក អញ្ជើញទៅទស្សនកិច្ចនៅក្នុងប្រទេសអ៊ុយក្រែនជាលើកដំបូងបំផុត ស្របពេលដែលលោកត្រូវបន្តដំណើរទៅចូលរួមកិច្ចប្រជុំប្រទេសឧស្សាហកម្មលូតលាសទាំង ៧ នៅក្នុងប្រទេសអាឡឺម៉ងផងនោះ។
ដំណើរទស្សនកិច្ចរបស់លោក អាបេ ចំពេលដែលជម្លោះនៅក្នុងតំបន់ភាគខាងកើតចេះតែធ្ងន់ឡើង ដោយសារភាគីជម្លោះបន្តប្រយុទ្ធគ្នាកាន់តែខ្លាំងមិនខ្វាយខ្វល់នឹងកិច្ចព្រមព្រៀងសន្តិភាពឡើយ។ លោក អាបេ បានសង្កត់ធ្ងន់និងប្តេជ្ញាថា លោកនឹងសហការជាមួយបណ្តាប្រទេសសម្ព័ន្ធមិត្តផ្សេងទៀត ដើម្បីជួយអ៊ុយក្រែនដោះស្រាយបញ្ហា ព្រោះជប៉ុននឹងបន្តធ្វើជាម្ចាស់ផ្ទះនៃកិច្ចប្រជុំប្រទេស ៧នេះ នៅឆ្នាំក្រោយទៀត។
កន្លងមកជប៉ុនបានដើរតួនាទីសំខាន់ក្នុងការផ្តល់ជំនួយហិរញ្ញវត្ថុដល់ប្រទេសអ៊ុយក្រែនក្នុងការដោះស្រាយបញ្ហាសេដ្ឋកិច្ច ហើយប្រទេសជប៉ុនក៏តែងតែប្រកាសមិនទទួលស្គាល់ការទទួលយកទឹកដី Crimea របស់រុស្ស៊ីកន្លងមកដែរ។ អ្វីដែលសំខាន់ជប៉ុនក៏ដាក់ទណ្ឌកម្មប្រឆាំងរុស្ស៊ីដូចសម្ព័ន្ធមិត្តរបស់ខ្លួនអាមេរិកដែរ។
កិច្ចប្រជុំប្រទេសឧស្សាហកម្មរីកចម្រើនទាំង ៧ នឹងផ្តោតលើការពិភាក្សាជុំវិញបញ្ហាអ៊ុយក្រែននេះ ដោយសហរដ្ឋអាមេរិក និងអាឡឺម៉ង់បានត្រៀមខ្លួនរួចហើយ ដើម្បីស្វែងរកការគាំទ្របន្ថែមពីមេដឹកនាំជាសមាជិក ដើម្បីដាក់ទណ្ឌកម្មប្រឆាំងរុស្ស៊ីបន្ថែមទៀត។ របបដឹកនាំក្រុងវ៉ាស៊ីនតោន បានប្រកាសឲ្យដឹងពីក្តីកង្វល់របស់ខ្លួន នៅពេលដែលការប្រយុទ្ធគ្នារីករាលដាលកាន់តែខ្លាំង និងគំរាមកំហែងកិច្ចព្រមព្រៀងទៀត។ រដ្ឋាភិបាលលោក អូបាម៉ា រំពឹងថា ក្រុមប្រទេស៧ នឹងរួបរួមគ្នាដើម្បីដាក់ទណ្ឌកម្មលើរុស្ស៊ី ដើម្បីបង្ខំឲ្យរុស្ស៊ីដកដៃចេញពីបញ្ហាវិបត្តិអ៊ុយក្រែន។ យ៉ាងណាក៏ដោយកន្លងមករដ្ឋាភិបាលអាមេរិកបានទទួលស្គាក់ថា ការដាក់ទណ្ឌកម្មប្រឆាំងរុស្ស៊ី គ្មានប្រសិទ្ធភាពនោះឡើយ៕
© រក្សាសិទ្ធិដោយ thmeythmey.com
