សង្គមអន្តរជាតិ
អន្តរជាតិ
×![]()
ដោយ: ធីតា
ភាពក្រីក្រដ៏ស្រួចស្រាវបានប៉ះពាល់កុមារម្នាក់ក្នុងចំណោមបីនាក់ក្នុងប្រទេសអេស្ប៉ាញ ដែលស្ថានភាពនេះរឹតតែធ្ងន់ធ្ងរ ហើយប្រឈមនឹងប្រែក្លាយទៅជាភាពរ៉ាំរ៉ៃដ៏អាក្រក់មួយ នេះបើតាមការសិក្សាដែលត្រូវបានផ្សព្វផ្សាយកាលពីថ្ងៃសុក្រកន្លងទៅនេះនៅក្រុង Madrid ។
៧ ឆ្នាំបន្ទាប់ពីការស្រុតចុះនៃវិស័យអចលនទ្រព្យក្រោយពីការហើមប៉ោងជ្រុលនៃវិស័យនេះ ដែលបានបំផ្លាញការងាររបស់មនុស្សរាប់លាននាក់ ប្រទេសនេះបានក្លាយទៅជាប្រទេសទីពីរនៅអឺរ៉ុបដែលមានតួលេខកុមាររស់នៅក្នុងភាពក្រីក្រខ្ពស់ បន្ទាប់ពីប្រទេសរូម៉ានី។
បើតាមការអង្កេតពីកុមារក្រីក្រ និងវិបត្តិសេដ្ឋកិច្ច ដែលត្រូវបានធ្វើឡើងពីអំឡុងឆ្នាំ ២០០៤ ដល់ឆ្នាំ ២០១២ កុមារ ១/៤ មានឪពុកម្តាយដែលគ្មានការងារធ្វើទាំងពីរនាក់ បើធៀបនឹងឆ្នាំដំបូងនៃការចាប់ផ្តើមការសិក្សា តួលេខនេះមានតែ ១៥% ទេ។ មិនតែប៉ុណ្ណោះ អនីតិជនម្នាក់ក្នុងចំណោមដប់នាក់រស់នៅក្នុងគ្រួសារដែលមានសមាជិកបួននាក់ (មនុស្សចាស់ពីរនាក់ និងក្មេងពីរនាក់) ហើយដែលមានចំណូលតិចជាង ៦៣២ អឺរ៉ូ ដើម្បីរស់ប្រចាំខែ។
នៅចុងបញ្ចប់នៃការសិក្សាឆ្នាំ ២០១២ បានបង្ហាញថា ភាពក្រីក្រនេះបានប៉ះពាល់កុមារម្នាក់ក្នុងចំណោមដប់នាក់ បើធៀបនឹងកាលពី ៨ ឆ្នាំមុន តួលេខមានត្រឹមតែ ៦% ប៉ុណ្ណោះ។ នៅពេលនេះ គេសន្មតថា ស្ថានភាពនេះប៉ះពាល់កុមារម្នាក់ក្នុងចំណោមបីនាក់។ ប៉ុន្តែ ពុំទាន់មានទិន្នន័យច្បាស់លាស់អំពីឆ្នាំថ្មីៗនេះនៅឡើយទេ។
នៅឆ្នាំ ២០១៥ នេះ សេដ្ឋកិច្ចអេស្ប៉ាញនឹងឡើងក្នុងរវាង ៣% ។ ទោះជាយ៉ាងណាក៏ដោយ ២៣,៨% នៃប្រជាជនសកម្មនៅមិនទាន់មានការងារធ្វើនៅឡើយ៕
© រក្សាសិទ្ធិដោយ thmeythmey.com
