អន្តរជាតិ
នយោបាយអន្តរជាតិ
លោក ប្រាយុទ្ធបន្តកាន់អំណាច២ឆ្នាំទៀតមិនខ្លាចការជេរដាក់បណ្តាសារ ![](https://image.thmeythmey.com/pictures/2015/06/08/prayuth-chan-ocha_afp.jpg)
×![]()
កំណែទម្រង់នយោបាយជាគោលដៅសំខាន់របស់របបសឹកក្រុងបាងកក មុននឹងមានការរៀបចំការបោះឆ្នោតនិងផ្ទេរអំណាចទៅឲ្យរបបស៊ីវិលវិញ។ គ្មានសញ្ញាណាមួយបញ្ជាក់ថា ពន្លកប្រជាធិបតេយ្យនឹងផុសឡើងនៅក្នុងរាជាណាចក្រថៃឆាប់ៗឡើយ។ កំណែទម្រង់នៅបន្តទៅមុខ ខណៈរដ្ឋធម្មនុញ្ញថ្មីដ៏ចម្រូងចម្រាសកំពុងស្ថិតក្រោមការកែប្រែមុនអនុម័តដាក់ឲ្យប្រើប្រាស់។ លោកនាយករដ្ឋមន្ត្រី ប្រាយុទ្ធចាន់អូចា បានបញ្ជាក់ថាលោកអាចបន្តកាន់តំណែងពីរឆ្នាំទៀតទម្រាំកែទម្រង់ចប់សព្វគ្រប់ មិនខ្លាចការជេរដាក់បណ្តាសារឡើយ។
លោក មុំ ពិទូរ្យ លម្អតព័ត៌មាននេះ
រយៈពេលជាងមួយឆ្នាំហើយក្រោយពេលមានចលនារដ្ឋប្រហារឥតបង្ហូរឈាមដែលរៀបចំឡើងក្រោមការដឹកនាំដោយឧត្តមសេនីយ៍ប្រាយុទ្ធចាន់អូចា ថៃនៅតែបន្តស្ថិតក្រោមអំណាចដឹកនាំបែបយោធា។ ថ្មីៗនេះ អ្នកសារព័ត៌មានបានចោទសួរឧត្តមសេនីយ៍នាយករដ្ឋមន្ត្រី ប្រាយុទ្ធ ចាន់អូចា ជុំវិញការការបោះឆ្នោតសាកល និងការបន្តក្តាប់អំណាចរបស់លោកនៅពេលខាងមុខ។ កន្លងមកក្រុមប្រឹក្សាកំណែទម្រង់ជាតិថៃ រួមទាំងសភាថៃផងនោះបានបង្ហាញការគាំទ្រចំពោះការបន្តយុទ្ធនាការកំណែទម្រង់របស់លោក ប្រាយុទ្ធ និងការពន្យារពេលផ្ទេរអំណាច។
ក្នុងបទសម្ភាសន៍ជាមួយអ្នកសារព័ត៌មានកន្លងមក លោកប្រាយុទ្ធអាចទប់អារម្មណ៍បានមិនបង្ហាញការច្រឡោតតោតតូងដូចមុនឡើយ។ លោកបានឆ្លើយតបទៅកាន់អ្នកសារព័ត៌មានវិញយ៉ាងច្បាស់ថា លោកនឹងបន្តកាន់អំណាចពីរឆ្នាំទៀត ដើម្បីកែទម្រង់សង្គមថៃឲ្យប្រសើរ មុនរៀបចំការបោះឆ្នោតជាសាកលដើម្បីផ្ទេរអំណាចទៅរបបស៊ីវិលវិញ។ លោកបានសង្កត់ធ្ងន់ថាលោកគ្មានបានប្រយោជន៍អ្វីបន្តិចឡើយពីការបន្តកាន់អំណាចជាប្រមុខរដ្ឋាភិបាលនេះ ប៉ុន្តែប្រជាជនថៃចង់ឲ្យលោកដឹកនាំការកែទម្រង់នយោបាយទើបលោកបន្តក្តាប់អំណាចបន្តទៀត។
យ៉ាងណាក៏ដោយលោក ប្រាយុទ្ធនៅតែអះអាងម្តងជាពីរដងថា លោកមិនកាន់តំណែងដើម្បីតែអំណាចប៉ុណ្ណោះទេ តែលោកកាន់តំណែងប្រកបដោយភាពស្របច្បាប់ ដើម្បីធ្វើឲ្យសង្គមថៃល្អប្រសើរ។ សម្រាប់លោក ប្រាយុទ្ធ រាល់ការកែទម្រង់និងគោលនយោបាយរបស់រដ្ឋតែងមានអ្នកគាំទ្រ និងអ្នកប្រឆាំងវាជារឿងធម្មតា។
បើតាមសម្តីរបស់ឧត្តមសេនីយ៍យោធានេះ កំណែទម្រង់របស់រដ្ឋាភិបាលលោក ផ្តោតសំខាន់លើសណ្តាប់ធ្នាប់សង្គម ផ្សះផ្សាជាតិ និងវិស័យកសិកម្មរបស់ថៃ។ លោកប្រាយុទ្ធទំនងជាត្រូវការពេលវេលាប្រហែល ២ឆ្នាំទៀតដើម្បីសម្រេចជោគជ័យក្នុងការកំណែទម្រង់ស៊ីជម្រៅនេះ។ អ្វីដែលគួរឲ្យភ្ងាក់ផ្អើលលោក ប្រាយុទ្ធបានលើកឡើងយ៉ាងច្បាស់ថា លោកដឹងមុនហើយថាការបន្តកាន់អំណាចរបស់លោកពីរឆ្នាំទៅមុខនឹងធ្វើឲ្យប្រជាជនមួយចំនួនខឹងសម្បារជេរដាក់បណ្តាសារលោក ប៉ុន្តែលោកជឿថា គេជេរលោកកាន់តែខ្លាំង លោកនឹងកាន់តែរឹងមាំបន្តដឹកនាំនិងកែទម្រង់ប្រទេសឲ្យជោគជ័យ។ ឧត្តមសេនីយ៍យោធាខាងលើ បានប្រាប់អ្នកសារព័ត៌មានផងថា នៅពេលកំណែទម្រង់ជោគជ័យ ប្រជាជនថៃនឹងយល់ច្បាស់ពីលោកមិនខាន។
គួរបញ្ជាក់ថា ពាក្យកំណែទម្រង់ជាតិស៊ីជម្រៅ បានក្លាយជាលែសមួយសម្រាប់មេដឹកនាំយោធា ប្រើប្រាស់ដើម្បីការពារការបន្តកាន់់អំណាចប្រកបដោយភាពស្របច្បាប់ ប៉ុន្តែបើមើលពីប្រសិទ្ធភាពនៃការកំណែទម្រង់ហាក់ដូចជាគ្មានអ្វីជាដុំកំភួននោះឡើយ ។
© រក្សាសិទ្ធិដោយ thmeythmey.com