អន្តរជាតិ
នយោបាយអន្តរជាតិ
ហុងគ្រីរដ្ឋអឺរ៉ុបដំបូងបំផុតចូលរួមគម្រោង«ខ្សែក្រវ៉ាត់មួយវិថីមួយ»របស់ចិន
×
ប្រទេសហុងគ្រីបានក្លាយជារដ្ឋអឺរ៉ុបដំបូងគេបំផុតដែលចុះអនុស្សារណយោគយល់គ្នាជាមួយក្រុងប៉េកាំងដើម្បីចូលរួមក្នុងគម្រោង«វិថីសូត្រ»របស់ចិន។ ការក្លាយជាសមាជិកនៃគម្រោងសេដ្ឋកិច្ចជាសញ្ញាវិជ្ជមានមួយសម្រាប់ការរឹតបន្តឹងចំណងសេដ្ឋកិច្ច ពាណិជ្ជកម្មរវាងមហាយក្សចិន និងបណ្តារដ្ឋនៅអឺរ៉ុប។
រដ្ឋមន្ត្រីការបរទេសចិនលោក Wang Yi និង រដ្ឋមន្ត្រីការបរទេសហុងគ្រី Peter Szijjarto បានសម្រេចឯកភាពគ្នាចុះហត្ថលេខាលើអនុស្សារណៈយោគយល់គ្នា ដោយត្រួសត្រាយផ្លូវដល់ក្រុងBudapest ក្លាយជាសមាជិកមួយនៃគម្រោង «ខ្សែក្រវ៉ាត់មួយវិថីមួយ»របស់ចិនដែលបានបង្កើតកាលពីថ្មីៗកន្លងមក។ ការចុះហត្ថលេខានេះរៀបចំឡើងនៅក្នុងប្រទេសហុងគ្រី នៅពេលដែលប្រមុខការបរទេសចិន ធ្វើទស្សនកិច្ចនៅក្នុងប្រទេសហុងគ្រី។ ហុងគ្រីបានក្លាយជារដ្ឋអឺរ៉ុបដំបូងបំផុតមួយដែលសម្រេចចូលរួមក្នុងគម្រោងរបស់ក្រុងប៉េកាំងនេះ ហើយការចូលរួមរបស់ហុងគ្រីនេះដែរ ជាសញ្ញាមួយបញ្ជាក់ថាចំណងសេដ្ឋកិច្ច និងពាណិជ្ជកម្មរវាងចិន និងអឺរ៉ុបនឹងកាន់តែប្រសើរឡើង។
ក្នុងពិធីចុះហត្ថលេខានេះ រដ្ឋមន្ត្រីការបរទេសចិនបានថ្លែងថា របបដឹកនាំក្រុងប៉េកាំងស្វាគមន៍រាល់សមាជិកថ្មីផ្សេងទៀតជាពិសេសប្រទេសតំបន់អឺរ៉ុបដែលចង់ចូលរួមក្នុងគម្រោងលើកកម្ពស់ចំណងសេដ្ឋកិច្ចដែលបង្កើតឡើងដោយចិន។ ក្រោយចុះហត្ថលេខា ភាគីហុងគ្រីបានបង្ហាញក្តីរំពឹងថា ខ្សែក្រវ៉ាត់មួយ វិថីមួយរបស់ចិននឹងនាំមកដល់ប្រយោជន៍យ៉ាងច្រើនសម្រាប់ប្រទេសហុងគ្រីផ្ទាល់ ហើយអ្វីដែលសំខាន់ហុងគ្រីក៏សង្ឃឹមថានឹងអាចពន្លឿនការសាងសង់ផ្លូវរថភ្លើងភ្ជាប់ពីហុងគ្រី ទៅកាន់ប្រទេសស៊ែប៊ី។ កន្លងមករដ្ឋាភិបាលចិនបានបន្តជួយផ្គត់ផ្គង់បណ្តាប្រទេសនៅក្នុងតំបន់អឺរ៉ុប ជាពិសេសផ្តល់លុយផ្តល់កាក់និងសាងសង់ផ្លូវរថភ្លើងភ្ជាប់ហុងគ្រីជាមួយស៊ែប៊ីផងដែរ។
គំនិតផ្តួចផ្តើម« ខ្សែក្រវ៉ាត់មួយ វិថីមួយ» របស់ក្រុងប៉េកាំង ជាគម្រោងពិសេសមួយដែលបង្កើតឡើងក្នុងគោលបំណងបង្កើនការផ្សាភ្ជាប់រវាងរដ្ឋនានាទូទាំងពិភពលោកជាមួយចិន ជាពិសេសលើកកម្ពស់ការសហប្រតិបត្តិការគ្នាលើ ផ្នែកសេដ្ឋកិច្ចនិងពាណិជ្ជកម្មផងដែរ។ រដ្ឋាភិបាលចិនមានគម្រោងប្រើលុយរាប់ពាន់លានដុល្លារដើម្បីគាំទ្រគម្រោងកសាងហេដ្ឋារចនាសម្ព័ន្ធជាពិសេសផ្លូវរថភ្លើង ផ្លូវ Highways បំពង់បង្ហូរប្រេងនិងឧស្ម័នតាមសមុទ្រ និងសំណង់ជាច្រើនផ្សេងទៀតឆ្លងកាត់អាស៊ីកណ្តាល អាស៊ីខាងត្បូង អាស៊ីខាងលិច អាស៊ីខាងត្បូង និង តំបន់អឺរ៉ុបផងដែរ៕
© រក្សាសិទ្ធិដោយ thmeythmey.com