អន្តរជាតិ
នយោបាយអន្តរជាតិ
អាមេរិករងការប្តឹងពីបទសម្លាប់ជនស៊ីវិលដោយប្រើយន្តហោះគ្មានមនុស្សបើកទម្លាក់គ្រាប់
×
ក្រុមគ្រួសារជនរងគ្រោះដែលស្លាប់សារគ្រាប់បែកសហរដ្ឋអាមេរិកកាលពីឆ្នាំ ២០១២ បានសម្រេចដាក់ពាក្យបណ្តឹងជាផ្លូវការប្រឆាំងក្រុងវ៉ាស៊ីនតោន។ សហរដ្ឋអាមេរិករងការថ្កោលទោសដោយសារប្រើប្រាស់យន្តហោះគ្មានអ្នកបើកដើម្បីទម្លាក់គ្រាប់បែកប្រឆាំងក្រុមភេរវជននៅយេម៉ែន ព្រោះយន្តហោះទម្លាក់គ្រាប់ចំជនស៊ីវិល ជាពិសេសក្មេងតូចៗតែម្តង។
សហរដ្ឋអាមេរិករងពាក្យបណ្តឹងរបស់ប្រជាជនយេម៉ែន ដោយសារប្រើប្រាស់យន្តហោះទម្លាក់គ្រាប់គ្មានមនុស្សបើកសម្លាប់ជនស៊ីវិល។ អ្នកដាក់ពាក្យបណ្តឹងប្រឆាំងសហរដ្ឋអាមេរិក គឺក្រុមគ្រួសារជនរងគ្រោះបុរសជនជាតិយេម៉ែន២នាក់ដែលបានស្លាប់បាត់បង់ជីវិតដោយសារគ្រាប់បែកទម្លាក់ពីលើយន្តហោះគ្មានអ្នកបើកកាលពីឆ្នាំ ២០១២កន្លងទៅ។
បើតាមក្រុមគ្រួសារជនរងគ្រោះ ពួកគេបានបញ្ជូនពាក្យបណ្តឹងទៅកាន់តុលាការសហព័ន្ធអាមេរិកហើយ ដោយគេទាមទារឲ្យរដ្ឋាភិបាលក្រុងវ៉ាស៊ីនតោនទទួលស្គាល់ថា ការប្រើប្រាស់យន្តហោះទម្លាក់គ្រាប់បែកកន្លងមកមិនស្របច្បាប់ឡើយ។ ជនរងគ្រោះទាំងពីរមានឈ្មោះថា Salem bin Ali JaberនិងWaleed bin Ali Jaber ហើយពួកគេបានស្លាប់បាត់បង់ជីវិតដោយសារយន្តហោះអាមេរិក ដែលទម្លាក់គ្រាប់បែកប្រឆាំងក្រុមភេរវជននៅយេម៉ែន។ តាំងពីពេលដែលពួកគេស្លាប់ រហូតដល់ពេលបច្ចុប្បន្ននេះ ក្រុមគ្រួសារមិនទាន់ទទួលបានការសូមទោសពីរដ្ឋាភិបាលក្រុងវ៉ាស៊ីនតោនឡើយ។
ក្រុមគ្រួសារអ្នកស្លាប់ មិនចង់បានសំណងជំងឹចិត្តឡើយ។ ពួកគេបានព្យាយាមដាក់បណ្តឹង ដោយក្នុងពាក្យបណ្តឹងនោះបានកំណត់ទាមទារឲ្យរដ្ឋាភិបាលលោក បារ៉ាក់ អូបាម៉ា សូមអភ័យទោសប្រជាជនយេម៉ែនដែលរងគ្រោះដោយសារគ្រាប់បែកនេះដែរ។ អ្វីដែលសំខាន់ ពួកគេបានលើកយកបញ្ហាដែលកើតឡើងកន្លងមក ដែលរដ្ឋបាលលោក អូបាម៉ា សុខចិត្តចេញមុខសូមអភ័យទោសជាផ្លូវការចំពោះការទម្លាក់គ្រាប់បែកច្រឡំដោយសម្លាប់ចំណាប់ខ្មាំងជាប្រជាជនអាមេរិកម្នាក់និងជនជាតិអ៊ីតាលីម្នាក់ដែរ។ ពួកគេចង់ឲ្យអាមេរិកធ្វើចំពោះប្រជាជនយេម៉ែនដូចអ្វីដែលអាមេរិកធ្វើចំពោះប្រជាជនខ្លួនដែរ ដោយគ្មានការរើសអើងដូចបច្ចុបុ្បន្នឡើយ។
ចាប់តាំងពីព្រឹត្តិការណ៍វាយប្រហារអាគារពាណិជ្ជកម្មពិភពលោកឆ្នាំ ២០០១ សហរដ្ឋអាមេរិកបានបន្តប្រើប្រាស់វិធានការព្រៃផ្សៃដោយតាមប្រមាញ់ក្រុមភេរវជនដោយប្រើប្រាស់សង្គ្រាមផង និងប្រើប្រាស់យន្តហោះទម្លាក់គ្រាប់បែកគ្មានអ្នកបើកដូច្នេះផង។ ប្រទេសប៉ាគីស្ថាន និងយេម៉ែនជាដើមនោះសុទ្ធតែជាគោលដៅសំខាន់របស់ក្រុងវ៉ាស៊ីនតោន។ ក្រោយឡើងកាន់តំណែងជាប្រធានាធិបតី លោក បារ៉ាក់ អូបាម៉ា ក៏បានបន្តប្រើប្រាស់មរតកសង្គ្រាមផ្លូវអាកាសបន្សល់ទុកដោយរដ្ឋបាលប៊ូសដើម្បីប្រឆាំងក្រុមភេរវជនដែរ។ ប៉ុន្តែទោះជាយ៉ាងក៏ដោយ ការប្រើប្រាស់យន្តហោះទម្លាក់គ្រាប់របស់សហរដ្ឋអាមេរិក បានក្លាយវិធានការព្រៃផ្សៃអមនុស្សធម៌ ដែលបានធ្វើឲ្យប៉ះពាល់ដល់ជីវិតប្រជាជនស្លូតត្រង់រាប់ពាន់នាក់ដែលគ្នាមិនដឹងអ្វីសោះនោះ៕
© រក្សាសិទ្ធិដោយ thmeythmey.com