សង្គមអន្តរជាតិ
អន្តរជាតិ
ហិង្សាប្រឆាំងជនស្បែកខ្មៅរុកកួនសង្គមអាមេរិកកាន់តែខ្លាំង ![](https://image.thmeythmey.com/pictures/2015/06/19/ame.jpg)
×![]()
ឃាតករវ័យ ២១ឆ្នាំដែលបានសម្លាប់មនុស្ស៩នាក់សុទ្ធតែជាប្រជាជនស្បែកខ្មៅនៅវិហារ Charleston នារដ្ឋSouth Carolina ត្រូវបានប៉ូលីសចាប់ខ្លួននិងស្ថិតក្រោមការសួរចម្លើយ។ គេសន្និដ្ឋានជាបឋមថា ជនដៃដល់វ័យក្មេងនេះស្បែកសនេះ ប្រព្រឹត្តបទឧក្រិដ្ឋ ព្រោះតែមានផ្នត់គំនិតស្អប់ខ្ពើមនិងអើសរើងប្រជាជនស្បែកខ្មៅ។ អំពើហិង្សាប្រឆាំងប្រជាជនស្បែកខ្មៅនេះកំពុងក្លាយជារឿងស្មុគស្មាញបំផុតសម្រាប់សង្គមអាមេរិក។
មានសំឡេង៖
Dylann Roof ជាឈ្មោះឃាតករវ័យ ២១ឆ្នាំ ដែលបានសម្លាប់រង្គាលមនុស្ស៩នាក់ក្នុងវិហារសម្រាប់ប្រជាជនស្បែកខ្មៅដែលស្ថិតនៅភាគខាងត្បូងអាមេរិកក្នុងរដ្ឋ South Carolina។ ករណីបាញ់សម្លាប់មនុស្សគ្មានញរញើតនេះកើតឡើងកាលពីយប់ថ្ងៃពុធ ហើយវាជាករណីឧក្រិដ្ឋកម្មប្រឆាំងប្រជាជនស្បែកខ្មៅដែលធ្ងន់ធ្ងរបំផុតកម្រមាននៅក្នុងសហរដ្ឋអាមេរិក។ ក្នុង ចំណោមមនុស្ស ៩នាក់ មានម្នាក់ជាសមាជិកសភាស្បែកខ្មៅរបស់រដ្ឋ និងស្ត្រី៦នាក់ ។ ជនរងគ្រោះដែលព្រឹទ្ធសមាជិកបក្សប្រជាធិបតេយ្យប្រចាំរដ្ឋ South Carolina លោក Clementa Pinckney មានវ័យ ៤១ឆ្នាំ ហើយលោកជាអ្នកនយោបាយដ៏មានប្រជាប្រិយភាពបំផុតដែលតស៊ូ រកយុត្តិធម៌ដល់ប្រជាជនស្បែកខ្មៅ និងបញ្ចប់បញ្ហានិទណ្ឌភាពបង្កឡើងដោយមន្ត្រីប៉ូលីសស្បែកស។
គេសន្និដ្ឋានជាមុនហើយថា ករណីសម្លាប់មនុស្សរង្គាលនេះ គឺដោយសារតែជនល្មើសមានគំនិតស្អប់ខ្ពើមនិងរើសអើងប្រជាជនស្បែកខ្មៅ។ ប៉ុន្តែសកម្មភាពនេះត្រូវបានគេហៅថា ជាអំពើភេរវកម្មក្នុងស្រុកនៅសហរដ្ឋអាមេរិក។
បើយោងតាមមន្ត្រីប៉ូលីសដែលបានតាមប្រមាញ់ឧក្រិដ្ឋជន ជនល្មើសបានចូលទៅក្នុងវិហារអស់ពេលប្រហែល ១ម៉ោង មុនចាប់ផ្តើមធ្វើសកម្មភាពបាញ់សម្លាប់អ្នកទៅវិហារ។ ប៉ុន្តែជាបឋម គេសន្និដ្ឋានថា ជនល្មើសនេះធ្វើសកម្មភាពតែម្នាក់ឯង និងមិនមានការសហការគ្នាជាមួយអ្នកណាផ្សេងទៀតទេ។ ក្រោយសម្លាប់មនុស្សអស់៩នាក់ ជនបង្កនេះបានបើករថយន្តរថយន្តគេចខ្លួនដោយចំណាយពេល៤ម៉ោងធ្វើដំណើរដល់រដ្ឋ North Carolina ឯណោះ។ ក្រោយចាប់ខ្លួនបានជនល្មើសត្រូវគេបញ្ជូនមក South Carolina វិញដោយមានការធ្វើបត្យាប័នបញ្ជូនខ្លួនផងដែរ។ បច្ចុប្បន្នជនល្មើសកំពុងស្ថិតក្រោមការឃុំឃាំង និងស្ថិតក្រោមការសួរចម្លើយរបស់ប៉ូលីស។
ការសម្លាប់រង្គាលជនជាតិស្បែកខ្មៅនៅអាមេរិក បានធ្វើឲ្យប្រជាជនអាមេរិកដើមកំណើតអាហ្វ្រិកឯទៀតខឹងសម្បារជាខ្លាំង ហើយពួកគេបានទាមទារឲ្យមានការរកយុត្តធម៌ពេញលេញដល់ពួកគេផង។ បញ្ហាសម្លាប់ប្រជាជនស្បែកខ្មៅ គឺជារឿងចម្រូងចម្រាសដែលកើតមានយូរមកហើយ និងជាបញ្ហាចាក់ស្រេះមិនងាយដោះស្រាយចេញដែរ។ រឿងរ៉ាវដដែលនេះនៅតែបន្តរុកគួនក្នុងសង្គមអាមេរិកនេះ ហើយបញ្ហានិទណ្ឌភាពក៏កើតឡើងជាប្រចាំផងដែរ។
រឿងហេតុសោកសង្រេងថ្មីសម្រាប់ប្រជាជនស្បែកខ្មៅនេះ កើតមានឡើងប្រមាណពីរខែប៉ុណ្ណោះ ក្រោយពេលដែលមន្ត្រីប៉ូលិសស្បែកសបាញ់សម្លាប់ជនសង្ស័យស្បែកខ្មៅម្នាក់ ដែលគ្មានអាវុធក្នុងដៃឈ្មោះ Walter Scott នៅក្នុងរដ្ឋ North Carolina ។ មន្ត្រីប៉ូលីសរូបនេះ កំពុងរង់ចាំការកាត់ទោស ប៉ុន្តែការសកម្មភាពសម្លាប់ប្រជាជនស្បែកខ្មៅគ្មានអាវុធក្នុងដៃនេះ បានជំរុញឲ្យរដ្ឋ South Carolina អនុម័តច្បាប់ ដោយបំពាក់កាមេរ៉ាលើខ្លួនមន្ត្រីប៉ូលិស ទូទាំងរដ្ឋទាំងមូល៕
© រក្សាសិទ្ធិដោយ thmeythmey.com