ជាតិ
ពីនេះ ពីនោះ
កំណាព្យ៖ កុំ!..កុំ!..ដែលគួរចៀស ![](https://image.thmeythmey.com/pictures/2015/06/20/20620151632182352015161957kamnap.jpg)
×![]()
កុំ!..កុំ!..ដែលគួរចៀស (បទពាក្យ៧)
កុំត្រាប់ជនពាលដៀលអ្នកប្រាជ្ញ កុំអាងអំណាចកាចហិង្សា
កុំត្រចៀកស្រាលតាមគេថា កុំពោលមុសាខុសការពិត។
កុំមើលឃើញទោសថាជាគុណ កុំមើលឃើញបុណ្យថាទិច្ចរិត
កុំឆ្លុះកញ្ចក់ដោយភ្នែកបិទ កុំសង្ឃឹមចិត្តប្រមឹកស្រា។
កុំចាំសំណាងត្រូវខំប្រឹង កុំសន្សំខឹងត្រូវពិចារ
កុំចាងអាងទ្រព្យយសសក្តា កុំពាក់ស្បែកខ្លាជាន់អ្នកក្រ។
កុំខឹងនឹងគោវាយរទេះ កុំបង្ខំបេះទុំមិនល្អ
កុំភ្លេចសីលប្រាំធម៌បវេ កុំភ្លេចធ្វើល្អសាងកុសល។
កុំកាច់ត្រកូលមួលត្រគាក កុំពាំនាំពាក្យឥតហេតុផល
កុំងាកចិត្តវេររេតាមខ្យល់ កុំឲ្យចាញ់កលកាមតណ្ហា។
កុំអួតអុងអាត់មានតែអញ កុំចិត្តកំណាញ់ជាប់អាត្មា
កុំយករឿងគេមកបរិហារ កុំបង់មេត្តាដាច់ស្មោះត្រង់។
កុំចង់បានច្រើនកើនលោភៈ កុំជាប់ជំពាក់នឹងចំណង់
កុំធ្វើតាមចិត្តដែលខ្លួនចង់ កុំចោលបោះបង់ទុព្ធមាគ៌ា៕
និពន្ធដោយ៖ហឹម ឆាន់, កែសម្រួល៖វិឆ័យ សុភី
© រក្សាសិទ្ធិដោយ thmeythmey.com