អន្តរជាតិ
នយោបាយអន្តរជាតិ
ពូទីន៖ គ្មានការប្រឈមមុខគ្នាដោយនុយក្លេអ៊ែរឬសង្គ្រាមត្រជាក់ថ្មីឡើយ ![លោក ពូទីន និយាយថា នាយករដ្ឋមន្ត្រីកាណាដា ចូលចិត្តហៃអើតាមអាមេរិក](https://image.thmeythmey.com/pictures/2015/06/21/putin_harper_photo.jpg)
លោក ពូទីន និយាយថា នាយករដ្ឋមន្ត្រីកាណាដា ចូលចិត្តហៃអើតាមអាមេរិក
×![]()
ប្រមុខរដ្ឋរុស្ស៊ី លោក វ្ល៉ាឌីមៀ ពូទីន បានថ្លែងថា ពិភពលោកនឹងមិនធ្លាក់ចូលក្នុងស្ថានភាពប្រឈមមុខគ្នាដោយប្រើអាវុធនុយក្លេអ៊ែរ ឬសង្គ្រាមត្រជាក់ទម្រង់ថ្មីឡើយ។ ប៉ុន្តែយ៉ាងណាក្តី មេដឹកនាំរូបនេះបានថ្លែងការពារការបង្កើនចំនួនអាវុធនុយក្លេអ៊ែររបស់រុស្ស៊ី ជាពិសេសការបង្កើនលុយធ្វើទំនើបកម្មយោធា និងបំពាក់អាវុធទំនើបដល់ទ័ព។ លោកថា វាជាសិទ្ធិស្វ័យការពារ ទប់ទល់សត្រូវខាងក្រៅប៉ុណ្ណោះ។
ប្រធានាធិបតីរុស្ស៊ី លោកវ្ល៉ាឌីមៀ ពូទីន បានអញ្ជើញប្រមុខស្ថាប័នរបស់ទីភ្នាក់ងារព័ត៌មានពិភពលោកចំនួន១២ ដើម្បីពិភាក្សគ្នា ដាច់ដោយឡែកពីវេទិកាសេដ្ឋកិច្ចនៅ St. Petersburg កាលពីម្សិលមិញនេះ។ ក្នុងជំនួបបិទទ្វារនាទីក្រុងម៉ូស្គូនេះ លោក ពូទីន បានបកស្រាយថា ការបន្ថែមក្បាលគ្រាប់នុយក្លេអ៊ែរលើកាំជ្រួចបាញ់ឆ្លងទ្វីប៤០ដើម ដើម្បីដាក់បម្រើដល់វិស័យការពារជាតិរុស្ស៊ី មិនមែនជាសញ្ញាបញ្ជាក់ថា សង្គ្រាមត្រជាក់ថ្មីជិតមកដល់ឡើយ ហើយវាក៏គ្មានន័យថារុស្ស៊ីត្រៀមប្រឈមមុខជាមួយអ្នកណាដោយប្រើអាវុធប្រល័យលោកនោះដែរ។
ការលើកឡើងរបស់ប្រមុខរដ្ឋាភិបាលក្រុងមូស្គូ ចង់សម្តៅន័យថា ពិភពលោកនឹងមិនប្រឈមវិបត្តិនុយក្លេអ៊ែរដោយការប្រឈមមុខគ្នាធ្ងន់ធ្ងររវាងមហាអំណាចដែរ។ ប៉ុន្តែលោកបានសង្កត់ធ្ងន់ថា ការសម្រេចចិត្តធ្វើបែបនេះក៏ដោយសារតែមានការចល័តទ័ព កសាងកម្លាំង និងមានគម្រោងដាក់អាវុធធុនធ្ងន់តាមបណ្តោយព្រំដែនរុស្ស៊ីរបស់បណ្តារដ្ឋណាតូ ជាពិសេសមហាអំណាចអាមេរិកប៉ុណ្ណោះ។
លោកពូទីន បញ្ជាក់ជាថ្មីប្រាប់បណ្តាប្រធានស្ថាប័នភ្នាក់ងារព័ត៌មានពិភពលោកថា រុស្ស៊ីមិនមែនជាអ្នកឈ្លានពានឡើយ ហើយក៏មិនចង់ឲ្យមានការប្រកួតប្រជែងកម្លាំងទ័ពដ៏គ្រោះថ្នាក់ដូចគ្នាដែរ ប៉ុន្តែវាមិនអាចប្រកែកបានឡើយដែលថាវាជាកាតព្វកិច្ចរបស់រុស្ស៊ីក្នុងការធានាសុវត្ថិភាព និងទប់ស្កាត់ឲ្យបានការគំរាមកំហែងផ្នែកសន្តិសុខជាដើម។ បើតាមសម្តីលោក ពូទីន រាល់ការពង្រាយឬបន្ថែមសព្វាវុធ រួមទាំងការធ្វើទំនើបកម្មវិស័យការពារជាតិផងនោះ គឺដើម្បីទប់ទល់រាល់ការគំរាមកំហែងរបស់បក្សសម្ព័ន្ធយោធាណាតូ ដែលកំពុងតំឡើងសាច់ដុំយោធាធំឡើងៗ នៅក្បែរៗរបងផ្ទះរុស្ស៊ីដោយគ្មានខ្លាចរអែងបន្តិចសោះនោះ។
ដោយឡែក ប្រធានាធិបតីរូបនេះបានរិះគន់ការរឹបអូសទ្រព្យសម្បត្តិរដ្ឋរុស្ស៊ីនៅក្នុងរដ្ឋអឺរ៉ុបកន្លងមកនេះ ដោយលោកបញ្ជាក់ហើយថារស្ស៊ីនឹងតបតវិញ ដោយមិនឱនឲ្យគេជាន់ក្បាលតាមចិត្តទេ។ ចំណែកបញ្ហាផ្សេងទៀតលោកក៏បានឆ្លើយសំនួរនានាពាក់ព័ន្ធបញ្ហា FIFA និងការធ្វើជាម្ចាស់ផ្ទះនៃការប្រកួតនាពេលខាងមុខផងដែរ។
ចំណុចសំខាន់មួយទៀត លោកក៏បានឆ្លៀតឱកាសវាយប្រហាររដ្ឋាភិបាលកាណាដាផងដែរ ជាពិសេសចម្អកឲ្យសម្តីរបស់នាយករដ្ឋមន្ត្រី Stephen Harper អំឡុងសន្នីសីទកំពូលក្រុមប្រទេស៧ នៅអាឡឺម៉ង់។ កាលនោះ នាយករដ្ឋមន្ត្រីកាណាដា បានថ្លែងវាយប្រហាររុស្ស៊ីជុំវិញបញ្ហាសមាជិកភាពដែលត្រូវគេព្យួរចេញពីក្រុមដោយសារលូកដៃក្នុងបញ្ហាអ៊ុយក្រែន ដោយលោកលើកឡើងថារុស្ស៊ីមិនអាចមានឱកាសត្រលប់មកវិញឡើយ។ លោក ពូទីនបានតបវិញថា ករណីនេះ នាយករដ្ឋមន្ត្រីកាណាដានឹងនិយាយថា រុស្ស៊ីគួរត្រលប់មកវិញ ប្រសិនបើសហរដ្ឋអាមេរិកបង្ហើបថា រុស្ស៊ីគួរតែត្រលប់មកជាសមាជិកក្រុមប្រទេសនេះវិញ។ សម្តីលោកពូទីន ចង់បញ្ជាក់ថា កាណាសម្រេចចិត្តនិងធ្វើអ្វីៗរណប និងតម្រូវតែចិត្តក្រុងវ៉ាស៊ីនតោនប៉ុណ្ណោះ៕
© រក្សាសិទ្ធិដោយ thmeythmey.com