សង្គមអន្តរជាតិ
អន្តរជាតិ
ការងារក្រៅម៉ោងចំនួន៦ដ៏ល្អបំផុតសម្រាប់និវត្តជននៅសហរដ្ឋអាមេរិក ![](https://image.thmeythmey.com/pictures/2015/07/05/wroking-_tida_.jpg)
×![]()
ក្រោយចូលនិវត្ត មនុស្សជាច្រើនត្រូវការសម្រាក ដើរកម្សាន្ត ឬនៅជួបជុំគ្រួសារ ប៉ុន្តែក្នុងចំណោមនោះ ក៏មាននិវត្តជនមួយចំនួនចង់បន្តធ្វើការងារក្រៅម៉ោងផងដែរ។ យោងតាមទិន្នន័យដែលសិក្សាដោយភ្នាក់ងារ Merrill Lynch Bank of America Corp របស់សហរដ្ឋអាមេរិក និវត្តជនចំនួន៧២ភាគរយ ចង់បន្តកិច្ចការងារក្រៅម៉ោង ដែលកត្តានេះមិនមែនដើម្បីលុយកាក់ជាសំខាន់នោះឡើយ ប៉ុន្តែពួកគេចង់ឲ្យខួរក្បាលមានសកម្មភាព។
គេហរទំព័រការងារ CareerBuilder.com របស់សហរដ្ឋអាមេរិក បានណែនាំការងារក្រៅម៉ោងដ៏ពេញនិយមចំនួន៦សម្រាប់និវត្តជននៅសហរដ្ឋអាមេរិក។ ការងារទាំងនោះរួមមាន៖
១.សាស្ត្រាចារ្យជំនួយ (Adjunct Professor)
សាស្ត្រចារ្យជំនួយ គឺជាសាស្ត្រចារ្យដែលត្រូវគេអញ្ជើញឲ្យបង្រៀនជំនួសសាស្ត្រចារ្យដែលអវត្តមាននៅម៉ោងណាមួយ។ នៅសហរដ្ឋអាមេរិក គេបានកត់សម្គាល់តាំងពីឆ្នាំ១៩៦៩ មកថា និវត្តជនកាន់តែច្រើនបានប្រឡូកក្នុងការងារនេះ។ ការងារនេះ មិនតម្រូវឲ្យមានការត្រៀមសម្ភារៈបង្រៀនច្រើននោះ ឡើយ ហើយអ្វីដែលគួរឲ្យកត់សម្គាល់ ការបង្រៀនតាមអនឡាញកាន់តែមានប្រជាប្រិយភាព។
២.ទីប្រឹក្សាគម្រោង
ចំណេះដឹងមុនចូលនិវត្ត គឺជាទុនដ៏ប្រសើរ។ នេះបើតាមការលើកឡើងរបស់លោក Lauren Griffin អ្នកជំនាញអប់រំម្នាក់របស់អាមេរិក។ ជាមួយនឹងការងារជាទីប្រឹក្សាគម្រោង និវត្តជនអាចទទួលបានការឧបត្ថម្ភពី៥០ ទៅ១០០ដុល្លារអាមេរិកក្នុងមួយម៉ោង។
៣. គណនេយ្យករ/បណ្ណារក្ស
ក្រុមហ៊ុនជាច្រើននៅសហរដ្ឋអាមេរិកនិយមផ្តល់ការងារក្រៅម៉ោងសម្រាប់តំណែងគណនេយ្យករ និងបណ្ណារក្ស។ ការងារនេះអាចផ្តល់ចំណូលប្រមាណ១៧ដុល្លារអាមេរិកក្នុងមួយម៉ោង។ ការិយាល័យស្ថិតិការងាររបស់អាមេរិក បានប៉ាន់ប្រមាណថា នៅឆ្នាំ២០២២ ការងារនេះនឹងកើនរហូតដល់១១ភាគរយ។
៤. អ្នករៀបចំព្រឹត្តិការណ៍/អ្នកសម្របសម្រួលគម្រោង
មនុស្សដែលមានវ័យលើស៥០ឆ្នាំទៅហើយនោះ មិនខ្វះបទពិសោធន័នោះឡើយលើការងាររៀបចំព្រឹត្តិការណ៍ ឬក៏អ្នកសម្របសម្រួលគម្រោង។ ព្រឹត្តិការណ៍ ឬគម្រោងការដែលនិវត្តជនអាចធ្វើបាននោះ ដូចជា ពិធីអាពាហ៍ពិពាហ៍ ខួបកំណើត និងកម្មវិធីផ្សេងទៀត។ និវត្តជនអាមេរិកមួយចំនួនបានប្រើប្រាស់បណ្តាញសង្គមដើម្បីណែនាំពីសេវាកម្មរបស់ខ្លួន។ ការងារនេះ អាចផ្តល់ចំណូលប្រមាណ២២ដុល្លារអាមេរិកក្នុងមួយម៉ោងផងដែរ។
៥. ប្រឹក្សាយោបល់អ្នកជំងឺ
ស្ថានភាពអ្នកជំងឺអាចកាន់តែប្រសើរប្រសិនបើមានការប្រឹក្សាយោបល់ច្បាស់លាស់។ តួនាទីសំខាន់ក្នុងនាមជាអ្នកប្រឹក្សាយោបល់នោះ គឺការរំលឹកអ្នករំលឹកអ្នកជំងឺឲ្យចេះរក្សាសុខភាព លេបថ្នាំតាមពេលកំណត់។ កិច្ចការនេះ ទទួលបានកម្រៃជាមធ្យម១៥ដុល្លារក្នុងមួយម៉ោង ហើយបើនិវត្តជនមានបទពិសោធន៍ និងសញ្ជាបត្រត្រឹមត្រូវពីស្ថាប័នសុខាភិបាលនោះ តម្លៃខ្លួនអាចខ្ពស់ជាងនេះ។
៦. គ្រូបង្រៀនវគ្គបំប៉នសមត្ថភាព
ការបើកបង្រៀនវគ្គបំប៉នផ្សេងៗទៅតាមជំនាញដែលខ្លួនចេះ គឺជាការងារដ៏ពេញនិយមមួយផងដែរសម្រាប់និវត្តជននៅសហរដ្ឋអាមេរិក។ ភាគច្រើន ពួកគាត់បង្រៀនក្មេងៗជិតខាងផ្ទះរបស់ខ្លួន ដូចជាមុខវិជ្ជាគណិតវិទ្យា ឬជំនាញលេងព្យាណូ ជាដើម។ កិច្ចការនេះ មានតម្លៃខ្លួនពី៩ ទៅ ២០ដុល្លារអាមេរិកក្នុងមួយម៉ោង៕
© រក្សាសិទ្ធិដោយ thmeythmey.com