អន្តរជាតិ
នយោបាយអន្តរជាតិ
×![]()
៨ថ្ងៃក្រោយភេរវកម្មសម្លាប់ជនបរទេស៣៨នាក់នៅក្រុងឆ្នេរSousse ប្រធានាធិបតីទុយនីស៊ីBeiji Caïd Essebsi បានប្រកាសដាក់ប្រទេសអោយស្ថិតក្នុងស្ថានភាពអាសន្ន។ លោកBeiji Caïd Essebsiលើកឡើងថា ពីគ្រោះថ្នាក់ដែលអាចនឹងកើតឡើងជាប្រចាំ គំរាមសន្តិសុខជាតិ។
ការប្រកាសរបស់ប្រធានាធិបតីBeiji Caïd Essebsi ដាក់ទុយនីស៊ីអោយស្ថិតក្នុងស្ថានភាពអាសន្ន នៅថ្ងៃសៅរ៍ម្សិលមិញ សបញ្ជាក់យ៉ាងច្បាស់ថា ភេរវកម្មថ្មីៗអាចនឹងកើតឡើងគ្រប់ពេល ក្នុងស្រុក ប្រសិនបើគ្មានការចាត់វិធានការអោយទាន់ពេលវេលាទេ។ ស្ថានភាពអាសន្ននេះ តំរូវអោយកងទ័ពចុះទៅជួយប៉ូលិសក្នុងការការពារសន្តិសុខ។
ទុយនីស៊ីបានរងការវាយប្រហារភេរវកម្មកាលពីជាងមួយសប្តាហ៍មុន នៅក្រុងឆ្នេរSousse ភាគខាងកើតប្រទេស សម្លាប់ភ្ញៀវទេសចរបរទេស៣៨នាក់ ក្នុងនោះ៣០នាក់ជាជនជាតិអង់គ្លេស។ ប៉ូលិសបានចាប់ក្រុមមនុស្ស៨នាក់ ជាក្រុមជាប់ពាក់ព័ន្ធនឹងភេរវកម្មសារមន្ទីរក្រុងទុយនិស ខែមិនាផងដែរ។ ក្រុមនេះធ្លាប់ទទួលការបណ្តុះបណ្តាលនៅSabratha ប្រទេសលីប៊ី ឆ្ងាយពីព្រំដែនទុយនីស៊ីតែជាង១០០គីឡូម៉ែត្រប៉ុណ្ណោះ។ ទុយនីស៊ីបានដកតំណែងមន្ត្រីជាន់ខ្ពស់ច្រើនរូប ក្នុងនោះមានអភិបាលក្រុងSousseផងដែរ។
រដ្ឋាភិបាលទទួលស្គាល់ថា ផ្នែកសន្តិសុខជាតិនៅមានចន្លោះប្រហោង ហើយការគំរាមកំហែងនៅមិនទាន់ផុតរលត់នៅឡើយទេ។ គួររំលឹកថា កាលពីថ្ងៃ១៨មិនា ភេរវកម្មនៅសារមន្ទីរក្រុងទុយនិស បានសម្លាប់មនុស្ស២២នាក់ ក្នុងនោះមានជនបរទេស២១នាក់។ ប៉ូលិសបានគាស់រំលើងបណ្តាញក្រុមភេរវជនមួួយក្រុមដ៏ធំ ហើយគិតថា ធ្វើអោយប្រទេសផុតពីការគំរាមទៅហើយ ប៉ុន្តែ វាជាការគិតខុសទាំងស្រុង។
យោងតាមលោក Kamel Jendoubi ជារដ្ឋមន្ត្រីទទួលបន្ទុកទំនាក់ទំនងជាមួយផ្នែករដ្ឋធម្មនុញ្ញនិង សង្គមស៊ីវិល ទាំងទុយនីស៊ី ទាំងបណ្តាប្រទេសជាមិត្តជាមួយទុយនីស៊ីសុទ្ធតែមានព័ត៌មានថា ការគំរាមកំហែងកំពុងតែកើនឡើង។ គួរបញ្ជាក់ដែរថា ក្រុមជីហាតរដ្ឋអ៊ីស្លាមបានប្រកាសថា ទាំងភេរវកម្មក្រុងទុយនិស ទាំងភេរវកម្មក្រុងឆ្នេរSousse គឺជាស្នាដៃរបស់ក្រុមខ្លួន។
ក្រោយភេរវកម្មក្រុងSousse នាយករដ្ឋមន្ត្រីHabib Essid បានប្រកាសវិធានការសន្តិសុខ មានដូចជាការបិទវិហារសាសនា៨០កន្លែង ដែលមិនបានស្ថិតក្រោមការគ្រប់គ្រងរបស់រដ្ឋ។ ប៉ុន្មានថ្ងៃចុងក្រោយនេះ ប៉ូលិសបានចាប់ផ្តើមបិទវិហារមួយចំនួនដែលពាក់ព័ន្ធជាមួយចលនាអ៊ីស្លាម ជ្រុលនិយម។ ប៉ូលិសក៏បានដកហូតមុខងាររបស់មេសាសនាវិហារទាំងនោះដែរ។ ហេតុការណ៍នេះបានធ្វើអោយអ្នកប្រណិបត្តិសាសនាមួយចំនួនប្រតិកម្មខឹងសម្បារ៕
© រក្សាសិទ្ធិដោយ thmeythmey.com
