អន្តរជាតិ
នយោបាយអន្តរជាតិ
តួកគីបាតុកម្មប្រឆាំងក្រុងប៉េកាំងព្រោះខឹងរឿងធ្វើទុក្ខបុកម្នេញជនជាតិអ៊ុយហ្គួរ
×![]()
ចលនាប្រឆាំងក្រុងប៉េកាំងកាន់តែផុសផុលឡើងនៅក្នុងប្រទេសតួកគីរយៈពេលប៉ុន្មានថ្ងៃនេះ ដោយពួកគេខឹងសម្បារអាជ្ញាធរចិនរឹតត្បិតសិទ្ធិសេរីភាពសាសនាជនជាតិភាគតិចឥស្លាមអ៊ុយហ្គួរនៅស៊ីនជាំង។ ប្រជាជនតួកគីបានប្រកាសថាខ្លួនបើកទ្វារទទួលបងប្អូនជនជាតិភាគតិចអ៊ុយហ្គួរពីចិន ហើយទាមទារឲ្យចិនបញ្ឈប់សកម្មភាពរើសអើងនេះភ្លាម។ ព្រោះតែរឿងជនជាតិអ៊ុយហ្គួរ ចំណងការទូតរវាងចិន និងតួកគីល្អក់ករកជាខ្លាំង ប៉ុន្តែចិនចាត់ទុកការរឹតត្បិតសិទ្ធិសេរីភាពជនជាតិភាគតិចជាវិធានការការពារសន្តិសុខ។
លោក មុំ ពិទូរ្យ លម្អិតព័ត៌មាននេះ
ក្រសួងការបរទេសចិនបាន ចេញសេចក្តីថ្លែងការដោយផ្តល់ដំណឹងឲ្យប្រជាជនខ្លួនប្រុងប្រយ័ត្ននិងចៀសវាងការធ្វើដំណើរទៅកាន់ប្រទេសតួកគី ព្រោះចលនាបាតុកម្មប្រឆាំងចិននៅតួកគីផុសផុលកាន់តែខ្លាំង។ ចលនាបាតុកម្មកើនឡើងខ្លាំង ក្រោយពេលអាជ្ញាធរចិនហាមមិនឲ្យប្រជាជនអ៊ុយហ្គួរគោរពប្រតិបត្តិតាមពីធីសាសនារបស់ខ្លួនដោយតមចំណីក្នុងអំឡុងពេលបុណ្យរ៉ាម៉ាឌន។ ប្រជាជនតួកគីជាច្រើនរយនាក់បានប្រមូលផ្តុំគ្នាអស់ជាច្រើនថ្ងៃមកហើយដើម្បីបង្ហាញការប្រឆាំងគោលនយោបាយចិនដែលអនុវត្តនៅក្នុងខេត្តស៊ីនជាំងដោយរឹតត្បិតសិទ្ធិសេរីភាពសាសនារបស់ប្រជាជនភាគតិចឥស្លាមអ៊ុយហ្គួរ។
ពួកគេបានទាមទារឲ្យក្រុងប៉េកាំងបញ្ឈប់គោលនយោបាយរើសអើងសាសនា និងប្រកាសបើកទ្វារចំហរទទួលយកប្រជាជនអ៊ុយហ្គួរទាំងឡាយណាដែលចង់ចាកចេញពីខេត្តស៊ីនជាំងផងដែរ។ តាំងពីយូរអង្វែងមកហើយ ប្រជាជនតួកគីតែងតែចាត់ទុកជនជាតិភាគតិចអ៊ុយហ្គួរដែលកំពុងរស់នៅក្នុងទឹកដីចិន ជាបងប្អូនរបស់ខ្លួន ដោយហៅប្រជាជនភាគតិចអ៊ុយហ្គួរថាជាប្រជាជនតួគីស្ថានខាងកើត។
គេសង្កេតឃើញមានប្រជាជនតួកគីជាច្រើនរយនាក់ប្រមូលផ្តុំគ្នាមុខស្ថានកុងស៊ុលចិនប្រចាំតួកគី ដោយមានកាន់បដាដែលមានពាក្យរិះគន់និងថ្កោលទោសក្រុងប៉េកាំងផង។ គេភ័យខ្លាចថា ហិង្សាធំអាចកើតមានឡើង ព្រោះបាតុករបានដុតទង់ជាតិចិន និងកន្លងមកពួកគេបានទៅវាយកម្ទេចភោជនីយដ្ឋានមួយរបស់ចិននៅទីក្រុង អ៊ីស្តង់ប៊ុលម្តងរួចមកហើយ។
បាតុករម្នាក់ដែលបានចូលរួមក្នុងចលនាបាតុកម្មប្រឆាំងអាជ្ញាធរចិន ដែលមិនបានបង្ហាញអត្តសញ្ញាណ បានអះអាងថាអាងខ្លួនចូលរួមបាតុកម្ម ព្រោះមិនអាចឈរមើលរដ្ឋាភិបាលកុម្មុយនីស្តចិនធ្វើបាបបងប្អូនរបស់ខ្លួនឡើយ។ បាតុកររូបនេះបានសង្កត់ធ្ងន់ផងដែរថា ប្រជាជនអ៊ុយហ្គួរនៅស៊ីនជាំង មិនបានប្រព្រឹត្តទោសកំហុសអ្វីឡើយ ហើយគេបានចោទសួរដែរថា វាជាកំហុសមែនទេ គ្រាន់តែពួកគេកាន់សាសនាឥស្លាមនោះ។
ទំនាក់ទំនងរវាងក្រុងប៉េកាំង និងរដ្ឋាភិបាលក្រុងអង់ការ៉ាល្អក់ករកខ្លាំង ក៏ព្រោះតែគោលនយោបាយរើសអើងប្រជាជនឥស្លាមអ៊ុយហ្គួររបស់អាជ្ញាធរចិននៅក្នុងតំបន់ស៊ីនជាំងកន្លងមក។ យ៉ាងណាមិញ ចិនមិនបានបកស្រាយអ្វីច្រើនទេ បើទោះជាមានចលនាបាតុកម្ម និងចលនាប្រឆាំងចិនកើនឡើងនៅតួកគីក៏ដោយ៕
© រក្សាសិទ្ធិដោយ thmeythmey.com
