អន្តរជាតិ
នយោបាយអន្តរជាតិ
វិបត្តិបំណុលក្រិក៖ លោកអូបាម៉ាស្នើអាល្លឺម៉ង់និងក្រិកឲ្យបង្កើតកិច្ចព្រមព្រៀងមុនកំណត់ ![](https://image.thmeythmey.com/pictures/2015/07/08/872015154101obama-german-chancellor-2.jpg)
×![]()
ប្រធានាធិបតីអាមេរិក លោក បារ៉ាក់ អូបាម៉ា (Barack Obama) បានទូរសព្ទទៅកាន់លោកស្រីអធិការបតីអាល្លឺម៉ង់ អែនជេឡាមឺហ្គែល (Angela Merkel) និងនាយករដ្ឋមន្ត្រីក្រិកលោក អាឡិចស៊ីស ត្ស៊ីប្រាស (Alexis Tsipras) ដើម្បីពិភាក្សារឿងបំណុលក្រិក។ លោក អូបាម៉ា បានបន្តសុំឲ្យភាគីជាពិសេសមេដឹកនាំទាំងប្រឹងប្រែងយ៉ាងណាបង្កើតកិច្ចព្រមព្រៀងមួយ ដើម្បីការពារក្រិកមិនឲ្យចេញពីតំបន់ចាយលុយអឺរ៉ូ។
លោក មុំ ពិទូរ្យ លម្អិតព័ត៌មាននេះ
រដ្ឋបាលលោក បារ៉ាក់ អូបាម៉ា បន្តតាមដានបញ្ហាបំណុលក្រិកយ៉ាងយកចិត្តទុកដាក់ជាទីបំផុត ជាពិសេសក្រោយប្រជាមតិកាលពីថ្ងៃអាទិត្យ។ មុនប្រជាមតិ លោក អូបាម៉ា ធ្លាប់ពិភាក្សាជាមួយអធិការបតីអាល្លឺម៉ង់ម្តងហើយ ដើម្បីរកវិធីសាស្ត្រសង្គោះក្រិក។
ស្រាប់តែព្រឹកថ្ងៃអង្គារម្សិលមិញ លោក អូបាម៉ា បានទូរសព្ទទៅកាន់ប្រមុខរដ្ឋាភិបាលអាល្លឺម៉ង់ និងក្រិកម្តងទៀតដើម្បីជជែករឿងវិបត្តិបំណុលក្រិកសារជាថ្មី។ ក្នុងកិច្ចសន្ទនាម្សិលមិញ លោក អូបាម៉ា បានបន្តស្នើសុំឲ្យមេដឹកនាំប្រទេសទាំងពីរប្រឹងប្រែងឲ្យអស់ពីសមត្ថភាពដើម្បីឈានទៅសម្រេចឲ្យបាននូវកិច្ចព្រមព្រៀងរួមគ្នាមួយឲ្យបានឆាប់ ។ លោកស្រី មឺហ្កែលនិងលោក អូបាម៉ា យល់ស្របថា កិច្ចព្រមព្រៀងល្អមួយនឹងត្រូវសម្រេចឲ្យបាន ដើម្បីការពារប្រយោជន៍ទាំងអស់គ្នា និងដើម្បីជួយក្រិកឲ្យផុតពីវិបត្តិ។
ក្រោយប្រជាមតិ ដែលប្រជាជនក្រិកបោះឆ្នោតថា ទេ ទាត់ចោលសំណើរម្ចាស់បំណុល មេដឹកនាំអឺរ៉ុបបានស្ទុះស្ទារកោះប្រជុំបន្ទាន់នៅក្រុងប្រ៊ុយសែលដើម្បីជជែកគ្នា រកដំណោះស្រាយថ្មី។ ក្រោយកិច្ចប្រជុំ អឺរ៉ុបបានបន្ទន់ឥរិយាបទជាងមុន ដោយអះអាងថា ខ្លួនគោរពការសម្រេចចិត្តរបស់ប្រជាជាតិក្រិក ហើយពួកគេនៅបន្តបើកទ្វារទទួលក្រិក បើសិនក្រិកចាប់អារម្មណ៍ចង់បន្តចរចាកិច្ចព្រមព្រៀងកម្មវិធីដោះបំណុលទៀត។ យ៉ាងណាក៏ដោយ ម្សិលមិញក្នុងកិច្ចប្រជុំបន្ទាន់នៅប្រ៊ុយសែល លោក ត្ស៊ីប្រាស មិនអាចបញ្ចេញផែនការកែទម្រង់លម្អិតមួយ ឲ្យបណ្តាមេដឹកនាំអឺរ៉ុបឃើញ។
ប៉ុន្តែចុងក្រោយពួកគេសម្រេចផ្តល់ឱកាសឲ្យក្រិកជាថ្មី ដោយក្រិកត្រូវបង្កើតផែនការកែទម្រង់ឲ្យអឺរ៉ុបត្រួតពិនិត្យមើលឲ្យបានមុនថ្ងៃព្រហស្បតិ៍សិន ទើបអាចឈានបន្តចរចាលើផែនការ និងចុងក្រោយសម្រេចផ្តល់លុយឲ្យក្រិកទៀតឬក៏អត់។
នាយករដ្ឋមន្ត្រីក្រិកឯណោះវិញបានអះអាងថា លោកត្រៀមខ្លួនរួចហើយក្នុងនាមជាអ្នកតំណាងប្រជាជនក្រិកដើម្បីចរចានិងបង្កើតកិច្ចព្រមព្រៀងមួយបញ្ចប់វិបត្តិ។ លោកកំពុងប្រឹងប្រែងចងក្រងផែនការកែទម្រង់សេដ្ឋកិច្ចក្រិក តបតាមការចង់បានរបស់ម្ចាស់បំណុល ប៉ុន្តែរឿងគោលនយោបាយត្បិតត្បៀតរបស់អឺរ៉ុបនៅតែជាសត្រូវរបស់ក្រិកដដែល។
លោក ត្ស៊ីប្រាសនឹងត្រូវឡើងបកស្រាយបញ្ហារបស់ខ្លួននៅសភាអឺរ៉ុបក្នុងទីក្រុងស្ត្រាស្បួរ (Strasbourg ) នៅថ្ងៃពុធនេះផង ហើយលោកក៏អាចបង្ហាញពីផែនការកែទម្រង់ខ្លះៗដល់បណ្តាមេដឹកនាំអឺរ៉ុបមុនថ្ងៃបញ្ជូនផែនការលម្អិតទៅមេដឹកនាំអឺរ៉ុបថ្ងៃស្អែក។
សូមបញ្ជាក់ថា ក្រិក ប្រកាសថាខ្លួនគ្មានលទ្ធភាពសងបំណុល មូលនិធិរូបីយវត្ថុអន្តរជាតិកាលពីថ្ងៃ ១កក្កដា ក្រោយចរចាមិនត្រូវរ៉ូវគ្នាជាមួយមេដឹកនាំអឺរ៉ុប។ ក្រៅពីនេះក្រិកនឹងត្រូវសងបំណុលទៅធនាគារកណ្តាលអឺរ៉ុបចំនួន ៣.៨ពាន់លានដុល្លារនៅថ្ងៃ ២០កក្កដាខាងមុខនេះ ប៉ុន្តែបើមិនមានកិច្ចព្រមព្រៀង មិនមានជំនួយសង្គ្រោះ ក្រិកត្រូវប្រកាសក្ស័យធន មិនសងបំណុលជាថ្មី ហើយអាចដើរចេញពីតំបន់ចាយលុយអឺរ៉ូផងដែរ៕
© រក្សាសិទ្ធិដោយ thmeythmey.com