អន្តរជាតិ
នយោបាយអន្តរជាតិ
ថៃ បន្តគម្រោងទិញនាវាមុជទឹកពីចិន ទោះសេដ្ឋកិច្ចធ្លាក់ចុះក៏ដោយ ![](https://image.thmeythmey.com/pictures/2015/07/09/submarin.jpg)
×![]()
គម្រោងនៃការទិញនាវាមុជទឹករបស់រដ្ឋាភិបាលថៃ ដែលនឹងត្រូវចំណាយទឹកប្រាក់រាប់ពាន់ លានដុល្លាអាមេរិក ពីរដ្ឋាភិបាលចិន កំពុងទទួលរងនូវការរិះគន់ពីសំណាក់ប្រជាជនថៃ ព្រោះមូលនិធិសម្រាប់គាំពារសុខភាពកំពុងប្រឈមភាពខ្វះខាត។ ទោះយ៉ាងណាក៏ដោយ លោកនាយករដ្ឋមន្ត្រីប្រាយុទ្ធ ចាន់អូចា បានទាត់ចោលមតិរិះគន់ ដោយបញ្ជាក់ថា ការទិញនាវាមុជទឹកពីចិន មិនទាន់ទងបញ្ហាសុខភាពនោះទេ។
ក្រោយពីត្រលប់ពីចូលរួមសន្និសីទកំពូលមេគង្គជប៉ុន លោកនាយករដ្ឋមន្ត្រីថៃ ប្រាយុទ្ធ ចាន់អូចា បានថ្លែងប្រាប់សារព័ត៌មាន ដោយលោកបានច្រានចោលរាល់ការរិះគន់គម្រោងទិញនាវាមុជទឹកបីគ្រឿងពីចិន។
និន្នាការនយោបាយការបរទេសស៊ីជម្រៅរវាងថៃ និង ចិន រួមផ្សំជាមួយការពង្រឹងកិច្ចសហការវិស័យយោធាផងដែរនោះ រដ្ឋាភិបាលថៃ បានសម្រេចចុះកិច្ចព្រមព្រៀងជាមួយចិន ដើម្បីទិញនាវាមុជទឹកចំនួនបីគ្រឿង។ បើយោងតាមគម្រោងនោះ ថៃនឹងត្រូវចំណាយទឹកប្រាក់ រាប់ពាន់លានដុលា្លរអាមេរិក ដើម្បីទិញនាវាទាំងនោះ។
ជុំវិញបញ្ហានេះ គេឃើញមានប្រតិកម្មច្រើនពីសំណាក់គណបក្សយោបាយថៃធំៗ ក៏ដូចជាប្រជាជនទូទៅផងដែរ។ ពួកគេថា រដ្ឋាភិបាលថៃ គួរតែចាប់អារម្មណ៏លើបញ្ហាសុខភាពរបស់ ប្រជាជនក្រីក្រ និង កសិករដែលកំពុងប្រឈមមុខការខ្វះខាតមូលនិធិគាំទ្រ ជាផ្តោតលើការទិញអាវុធ។ បន្ថែមពីនេះ ពួកគេក៏បានចោទប្រកាន់រដ្ឋាភិបាលថៃដែរ ដែលមិនបានធ្វើឲ្យមានកំណើនសេដ្ឋកិច្ច ព្រោះមិនមានការកសាងទំនុកចិត្តជាមួយអ្នកវិនិយោគ ចំណាយថវិការដ្ឋខ្ជះខ្ជាយទៅលើការទិញនាវាមុជទឹកទៅវិញ។ ពួកគេលើកយក រដ្ឋប្រហារកន្លងមកធ្វើជាហេតុផល ដែលអ្នកវិនិយោគមិនហ៊ានដាក់ទុនវិនិយោគនៅថៃ។
ឆ្លើយតបជាមួយនឹងការចោទប្រកាន់នេះ លោកនាយករដ្ឋមន្ត្រីប្រាយុទ្ធ បានបញ្ជាក់ថា «សូមកុំ ទាញគម្រោងទិញនាវាមុជទឹក ទៅបពាក់ព័ន្ធនឹងបញ្ហាសុខាភិបាលនៅថៃ។ រដ្ឋាភិបាល នឹងពិចារណាដោះស្រាយបញ្ហាទាំងពីរដោយប្រុងប្រយត្ន័»។ លោកបន្ថែមទៀតថា គម្រោងទិញអាវុធនេះ គឺត្រូវបានរៀបចំឡើងរយៈពេល១០ឆ្នាំមកហើយ។ មួយវិញទៀត ការទិញនាវានោះ ក៏មិនមែនត្រូវធ្វើឡើង នៅថ្ងៃស្អែកឬ ខានស្អែក និងយកទៅធ្វើសង្គ្រាមនោះទេ តែវានឹងធ្វើប្រទេសផ្សេងទៀតកាន់តែខិតមកថៃ៕
© រក្សាសិទ្ធិដោយ thmeythmey.com