អន្តរជាតិ
ជប៉ុន ៖ ផ្លែទំពាំងបាយជូរ ២៦ គ្រាប់មានតម្លៃជាង ៨ ពាន់ដុល្លារ ![](https://image.thmeythmey.com/pictures/2015/07/11/1172015111520____________________________________________________________.jpg)
×![]()
ផ្លែទំពាំងបាយជូរនៅប្រទេសជប៉ុនពិតជាមានតម្លៃថ្លៃដូចវត្ថុប្រណីតមែន។ កាលពីថ្ងៃព្រហស្បត្តិ៍កន្លងទៅនេះ ផ្លែទំពាំងបាយជូរចំនួន ២៦ គ្រាប់ត្រូវបានលក់ក្នុងតម្លៃឯតទ្គកម្មថ្មីគឺ មួយលានយេន ដែលស្មើនឹងប្រមាណ ៨ ៣០០ ដុល្លារ។ មានន័យថា មួយគ្រាប់មានតម្លៃស្មើនឹង៣១៩ ដុល្លារ។
ផ្លែទំពាំងបាយជូរពូជក្រហមដែលមួយគ្រាប់ៗមានទំហំប៉ុនគ្រាប់បាល់ពីងប៉ុង និងមានទម្ងន់ជិត២០ ក្រាម ត្រូវបានដាក់ឲ្យដេញថ្លៃជាលើកដំបូងក្នុងឆ្នាំនេះនៅKanazawa ចម្ងាយប្រមាណ៣០០ គីឡូម៉ែត្រពីក្រុងតូក្យូ ដោយលក់បានក្នុងតម្លៃបំបែកឯតទ្គកម្មចាស់ដែលថ្លៃត្រឹមតែ ៤ ៥០០ ដុល្លារប៉ុណ្ណោះ។
អ្នកដែលឈ្នះការដេញថ្លៃនេះគឺជាមេចុងភៅនៅសណ្ឋាគារNikko ក្នុងក្រុង Kanazawa ។ លោកបានពន្យល់ថា លោកបានទទួលបញ្ជាពីអ្នកទទួលខុសត្រូវផ្នែកទេសចរណ៍ក្នុងសណ្ឋាគារឲ្យទិញផ្លែទំពាំងបាយជូរនេះឲ្យបាន ទោះត្រូវចំណាយអស់ប្រាក់ប៉ុន្មានក៏ដោយដើម្បីយកទំពាំងបាយជូរយក្សនេះទៅទាក់ទាញភ្ញៀវក្នុងតំបន់ ក្នុងឱកាសនៃការបើកឲ្យប្រើប្រាស់ខ្សែរថភ្លើងល្បឿនលឿនថ្មី។
ជនជាតិជប៉ុនចូលចិត្តជូនអំណោយជាផ្លែឈើប្រណីតៗ ហើយហាងលក់វត្ថុប្រណីតៗក៏រីករាលដាលពេញផ្ទៃប្រទេស បើទោះបីជាសន្ទុះសេដ្ឋកិច្ចមិនសូវស្ទុះខ្លាំងក៏ដោយ។ ជារៀងរាល់ឆ្នាំផ្លែឈើជាច្រើនប្រភេទត្រូវបានដាក់លក់ក្នុងតម្លៃខ្ពស់កប់ពពកក្នុងប្រទេសនេះ៕
© រក្សាសិទ្ធិដោយ thmeythmey.com