កីឡាជាតិ
ជាតិ
កម្ពុជា អស់ឱកាសដណ្ដើមមេដាយនៅកីឡាសាកលវិទ្យាល័យពិភពលោក ![](https://image.thmeythmey.com/pictures/2015/07/13/universaid.jpg)
×![]()
អត្តពលិករបស់កម្ពុជា អស់ឱកាសដណ្ដើមក្នុងការប្រកួតកីឡាសាកលវិទ្យាល័យពិភពលោកលើកទី២៨នៅក្រុង Gwangju ប្រទេសកូរ៉េខាងត្បូង (Universiade Gwangju 2015) ហើយក្រោយធ្លាក់ចេញគ្រប់វិញ្ញាសាទាំងអស់ ស្របពេលព្រឹត្តិការណ៍នេះនឹងប្រារព្ធពិធីបិទនៅថ្ងៃទី ១៤ ខែ កក្កដា ឆ្នាំ ២០១៥ ស្អែកនេះ។
យោងតាមការឱ្យដឹងពីលោក ប៊ូ ជុំសេរី អនុរដ្ឋលេខាធិការក្រសួងអប់រំយុវជន និងកីឡា កម្ពុជា បញ្ចូនកីឡាចំនួន ៤ ប្រភេទទៅចូលរួមប្រកួតក្នុងព្រឹត្តិការណ៍លំដាប់ពិភពលោក នេះ ដោយមានអត្តពលិកចំនួន ១២ រូបដោយក្នុងនោះ កីឡាតេក្វាន់ដូរ៥ រូប មាន អត្តពលកម្ម២ រូប ហែលទឹក០២ រូប និងវាយកូនឃ្លីលើតុ ៣ រូប។
ចំពោះកីឡាវាយកូនឃ្លីលើតុ កីឡាករ ណៃ សារ៉ាវៃ កីឡាករ សារៈ ស៊ូព្រីង និង អ៊ឹង ស្រ៊ូយហួរ ដែលតំណាងឲ្យសាកលវិទ្យាល័យមេគង្គកម្ពុជា បានចាញ់ទាំងបីប្រកួតក្នុងពូល A លើវិញ្ញាសាជាក្រុម។ ពួកគេចាប់ផ្តើមដោយចាញ់រូម៉ា នី ៣-០ ចាញ់ឡេតូនី ៣-១ និងចុងក្រោយចាញ់បារាំង ៣-០ ។ រីឯវិញ្ញាសាវាយគូបុរស ណៃ សារ៉ាវៃ និង អ៊ឹង ស្រ៊ូយហួរ ចាញ់ក្រុមកីឡាករហុងកុង ៣-០ នៅវគ្គ៣២ក្រុមដំបូង។
ចំណែកកីឡាហែលទឹក កីឡាករ ហែមថុនពន្លឺ ដែលតំណាងឲ្យសាកលវិទ្យាល័យវេស្ទើន បានបញ្ចប់ចំណាត់ថ្នាក់លេខ២នៅក្នុង Heat 1 នាការប្រកួតវិញ្ញាសាហែលសេរីចម្ងាយ១០០ម៉ែត្រ ប៉ុន្តែរូបគេថិរវេលារបស់គេមិនគ្រប់គ្រាន់ក្នុងឈានទៅកាន់វគ្គបន្តឡើយ។
ដោយឡែកកីឡាករអត្តពលកម្ម ង៉ែត ភារ័ត្ន តំណាងឲ្យសាកលវិទ្យាល័យវេស្ទើន បានធ្លាក់ចេញពីការប្រកួតវិញ្ញាសារត់ចម្ងាយ១០០ម៉ែត្រ ដោយកីឡាកររូបនេះ មិនបានរត់ទៅដល់គោលដៅឡើយនៅក្នុង Heat ដែលមានកីឡាករសរុប៨រូប។ ចំណែកកីឡាករ ផល សុភ័ក្រ ក៏អស់ឱកាសក្នុងការប្រកួតវិញ្ញាសាររត់ចម្ងាយ ១០០០ ម៉ែត្រ និង ៥០០០ ម៉ែត្រដែរ។
សម្រាប់កីឡាតេក្វាន់ដូ កីឡាការិនី ស៊ឹម រចនា និង ទួន ណាវុធ សុទ្ធតែបានឆ្លងផុតវគ្គជម្រុះលើវិញ្ញាសារៀងៗខ្លួន។ ឈានដល់វគ្គ១/២ផ្តាច់ព្រ័ត្រលើវិញ្ញាសា Individual Poomsae ស៊ឹម រចនា បានបញ្ចប់ចំណាត់ថ្នាក់ទី១៣ក្នុងចំណោមកីឡាការិនី១៥នាក់ ខណៈ ទួន ណាវុធ ស្ថិតនៅចំណាត់ថ្នាក់ចុងគេក្នុងចំណោមកីឡាករ៩នាក់។ ចំណែកវិញ្ញាសា Mixed Pair Poomsae រចនា និង ណាវុធ បានឆ្លងផុតវគ្គជម្រុះ ប៉ុន្តែពួកគេបញ្ចប់ចំណាត់ថ្នាក់ចុងគេក្នុងចំណោម១១នាក់នៅក្នុងការប្រកួតវគ្គពាក់កណ្តាលផ្តាច់ព្រ័ត្រ។
កីឡាករ ទួន ណាវុធ តំណាងរបស់សាកលវិទ្យាល័យវេស្ទើន បានជាប់ត្រឹមចំណាត់ថ្នាក់លេខ ១៧ ស្ទួនក្នុងចំណោមអត្តពលិកចំនួន ៣៨ នាក់ប្រកួតលើវិញ្ញាសាតេក្វាន់ដូ ប្រយុទ្ធទម្ងន់ក្រោម ៦៨ គីឡូក្រាម។ ចំណែកកីឡាការិនី ស៊ន ដាវីន ឈរចំណាត់ថ្នាក់លេខ ៩ ស្ទួន ក្នុងចំណោមបេក្ខជន ២២ នាក់ ក្រោយប្រកួតលើវិញ្ញាសាប្រយុទ្ធទម្ងន់ ក្រោម ៦៧ គីឡូក្រាម។
សម្រាប់កីឡាការិនី ស៊ន សៀវម៉ី ប្រកួតវិញ្ញាសាប្រយុទ្ធនារី ក្រោមទម្ងន់ ៧៣ គីឡូក្រាម បានយកឈ្នះកីឡា ការិនីជនជាតិរុស្សី KURBANOVA Guzel ដោយលទ្ធផល ១១ ទល់ ២ ក្នុងវគ្គ ១៦ នាក់ចុងក្រោយ តែត្រូវបរាជ័យក្រោមថ្វីដៃកីឡាការិនីជនជាតិចិន ZHENG Shuyin ដែលជាម្ចាស់មេដាយមាសឆ្នាំនេះដោយលទ្ធផល ២០ ទល់ ៧ ក្នុងវគ្គ ៨ នាក់ចុងក្រោយ។
Universiade Gwangju 2015 បានបើកពិធីជាផ្លូវការតាំងពីថ្ងៃទី ៣ កក្កដា មកម្ល៉េះដោយដាក់កីឡាចំនួន ២១ ប្រភេទឱ្យអត្តពលិកប្រមាណជាង ១២៩៨៦ នាក់មកពី ១៤៦ ប្រទេសប្រកួតប្រជែងលើវិញ្ញាសា ២៧២ ផ្សេងៗគ្នា។ គិតត្រឹមពេលនេះ ប្រទេសកូរ៉េខាងត្បូង កំពុងឈរនៅលើគេក្នុងបញ្ចីអ្នកដណ្ដើមបានមេដាយច្រើនជាងគេ ក្រោយឈ្នះមេដាយមាស ៤៤ ប្រាក់ ២៨ សំរឹទ្ធ ២៦ សរុប ៩៨ តាមពីក្រោយដោយប្រទេសរុស្ស៊ី ឈ្នះមេដាយមាស ៣២ ប្រាក់ ២៧ សំរឹទ្ធ ៤៤ សរុប ១១៣ គ្រឿង៕
© រក្សាសិទ្ធិដោយ thmeythmey.com