ជាតិ
ជនជាតិវៀតណាម១,១៦៩នាក់ត្រូវបានបណ្តេញចេញពីកម្ពុជាក្នុងឆ្នាំ២០១៥ កម្លាំងសមត្ថកិច្ចនៃអគ្គនាយកដ្ឋានអន្តោប្រវេសន៍ បានឃាត់ខ្លួនជនជាតិវៀតណាមដែលរស់នៅ និងធ្វើការដោយខុសច្បាប់នៅកម្ពុជាចំនួន១៨នាក់បន្ថែមទៀត នៅថ្ងៃទី១៤ខែកក្កដាឆ្នាំ២០១៥នេះ។ ជនជាតិវៀតណាមទាំង១៨នាក់នោះ គឺជាកម្មករដែលធ្វើការនៅក្នុងរោងសិប្បកម្មកែច្នៃឈើចំនួន៤កន្លែង នៅតាមបណ្តោយផ្លូវ១០៣ និងតាមមាត់ប្រឡាយលូទឹក ស្អុយ ក្នុងភូមិ៤ សង្កាត់ផ្សារដើមថ្កូវ ខណ្ឌចំការមន។
បើតាមលោក អ៊ុក ហៃ សិលា ប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ គិតចាប់ពីខែដើមឆ្នាំ២០១៥ រហូតមកដល់ពេលនេះ អាជ្ញាធរកម្ពុជា បានបណ្តេញជនអន្តោប្រវេសន៍ខុសច្បាប់ចំនួន១២៩២នាក់ រួមមាន៤២សញ្ជាតិ ក្នុងនោះជនជាតិវៀតណាមមានច្រើនជាងគេ គឺចំនួន១១៦៩នាក់។
សូមរម្លឹកថាកាលពីខែចុងមិថុនាកន្លងទៅ សមត្ថកិច្ចនៃនាយកដ្ឋានអន្តោប្រវេសន៍បានបណ្តេញជនជាតិវៀតណាមចំនួន៧៧នាក់ ក្នុងនោះស្រី១១នាក់ ទៅប្រទេសវៀតណាមវិញ តាមច្រកទ្វារអន្តរជាតិបាវិត និងច្រកទ្វារអន្តជាតិក្អមសំណរ បន្ទាប់ពីអាជ្ញាធររកឃើញថាពួកគេពុំមានលិខិតឆ្លងដែន និងធ្វើការដោយខុសច្បាប់នៅកម្ពុជា។ ជនជាតិវៀតណាមទាំងនោះ ត្រូវបានអាជ្ញាធររកឃើញនៅការដ្ឋានសំណង់កោះពេជ្រ សង្កាត់ផ្សារដើមថ្កូវ សង្កាត់ផ្សារថ្មី៣ សង្កាត់វត្តភ្នំ សង្កាត់ផ្សារកណ្តាល១ ខេត្តសៀមរាប និងខេត្តបាត់ដំបង៕
© រក្សាសិទ្ធិដោយ thmeythmey.com